Uỷ ban Palih ruah tỉnh Bà Rịa –Vũng Tàu page ini hu peih bruk palih ruah aval ka dom gah ngak bruk di tasik

Mesup ni (4/5), di Muinyim Quân khu 7 hu peih bruk parang iek “Quốc hội Việt Nam – dom vaktu salih bahrau song patagok”. Parang iek dui atah meng harei ni tal abih bilan 5/2021, Parang iek hu labaih 200 thaot binguk, harak gar, pandap panda ka dom vaktu salih bahrau song patagok di Quốc hội Việt Nam. Tapa nan piah paglong hatai sahneng di urang jakar, urang lin, bhap bini ka jalan ngak, makna prong di bruk palih ruah urang ka Quốc hội; padang sa jalan ka bruk chính trị, hatai sahneng, bruk ngak, ngak siam bruk dalam mbang palih ruah anak tal.

Uỷ ban Palih ruah tỉnh Bà Rịa –Vũng Tàu page ini hu peih bruk palih ruah aval ka dom gah ngak bruk di tasik, oh lagaih piah hu mbaok palih ruah njauk harei palih ruah di negar lac 23/5 anak tal. Tui nan, Bộ Tư lệnh Bhum 2 Hải Quân (2 labik), Lữ đoàn 171, Bộ Tư lệnh Bhum Cảnh sát tasik 3 saong Công ty Vietsovpetro hu peih bruk brei cử tri nao palih ruah aval abih di taneh ia. Bruk palih ruah rah tabiak dalam siam mekre, njuak jalan peih ngak, njauk tui bruk ba tabiak. Taong abih cử tri nao buh phieu ginup abih.

Tal mesup ni (4/5), hu 9 tỉnh ban dalam negar brei anek saih padeih bac piah pacang caga jit Covid-19. Mintri pato megru hu panuac ieu dom labik pato pakai samar padang jalan pacang meyah jit ruak rah tabiak dalam sang bac. Gam haong nan, patagok bruk pathau khan, pato pakai paglong hatai sahneng, bruk ngak di urang jakar khik ramik, urang ngak, gru pato anek saih song amaik ame ka dom jalan pacang caga jit.

UB bhap bini tỉnh Ninh Thuận birau hu công điện drah samar iew brei takik peih ngak dom bruk pataom rilo manuac. Tỉnh bei padeih dom bruk yau: dom lễ hội, labik nao tabak, darak melam, wuan bar, labik chiat tamia, karaoke, dom bruk pasram the thao pataom rilo manuac (yau bilik pasram yoga, pasram gym...); dom dich vụ massage, dich vụ ma-in điện tử, mbang nyum, mbang lakhah rilo manuac…Tukvak meng harei 4/5/2021 mbiah tal tuk hu panuac brei thau birau.

Di Bình Thuận, mesup ni, Sở Y tế tỉnh hu tabiak harak brei thau bruk samar duah menuac nao tal dom labik di Đà Nẵng lac: quán Bar New Phương Đông, quán Karaoke TK dalam harei 28/4; Hotel Phú An meng harei 29/4 tal 1/5; sang iek ruak Hoàn Mỹ dalam harei 2/5. Bruk duah urang nan lac kayua di Đà Nẵng hu urang njom Covid-19. Dahlau di nan, Sở Y tế Bình Thuận jeng hu panuac kakei tong abih urang jakar , công chức, viên chức, urang ngak mai meng 6 tỉnh hu jit ruak lac: Hà Nam, Hưng Yên, TPHCM, Hà Nội, Yên Bái, Vĩnh Phúc brei dut iek âm tính meng hu mai ngak bruk veik.

Dalam 24 tuk tapa, dunya hu 667 ribau urang njom Covid-19, dalam nan Ân Độ meblah meteh ngan saong labaih 355 ribau urang – dang akok di dunya; patui nan lac Mỹ ngan saong jaik 39 ribau urang. Bruk jit ruak di châu Âu mboh hu siam jang tuk urang njom ruak dalam bhum trun 19% dalam 1 adit tapa. Min di châu Á, jit ruak rah tabiak trak ngan saong abih tih urang njom ruak birau tagok tal 7% dalam sa adit tapa.

Mintri Y tế Indonesia bahrau khan lac duah mboh biến thể di virus SARS-CoV-2 meng Ấn Độ song Nam Phi di Jakarta song Bali, dalam nan hu sa urang ruak negar langiu metai. Indonesia brei thau hu 7 biến thể njom tame negar ni. Tổng thống Indonesia tabiak sarak dui atah tukvak takik ngak dom bruk praong pataom rilo menuac mbang ka 7 meng harei 4 tal 17/5. Sarak ni jeng hu peih prong tabiak tal 30 tỉnh ban dalam negar.

Sa bala kapal gilai biak trak rah tabiak di Bangladesh tuk sa gilai cao tốc pajeng takik abih 30 tuai saong gilai pajeng cuah ginuh tame gauk angaok kraong Padma. Cảnh sát Bangladesh brei thau lac daong sraong hu 5 urang daok diuk saong srong tagok hu 25 ueang metai, tui kuhria daok rilo urang daok lahik. Bala jalan kraong ribaong bhian rah tabiak di Bangladesh, taneh ia hu yaok rituh kraong ribaong. Dom urang ilamu ndom lac, bruk oh bhian pasiam veik gaiy gilai, tanut chuan salamat daok cadu di dom sang mac ngak kapal gilai saong pajeng trak nan lac makna ba tal bala./.

Urang lang: Ái Nghiêm – Hani Pha – 04/05 15:58:22