Kapul  Điện lực Việt Nam (EVN) peih bruk brei thau ka nền tảng điện ia harei  tabung sang  EVNSOLAR

Mesup ni  9/9, Nyaom biai akaok mintri Ngoại giao ASEAN mbang ka  53 (AMM 53) song dom mbang nyaom pagam tal hu peih tabiak . Brei panuac peih nyaom biai, Thủ tướng rajaei Nguyễn Xuân Phúc- CT ASEAN 2020, ndom lac: “Pambuak pagam song caga palagaih oh lac angan ieu di  2020 saoh bo bruk nan gam song kuhria caga song bruk ngak hu jeng  “angan je ” di ASEAN, dong ka khol drei tangin dalam tangin, pacang caga kan kandah, jum pataom, ba gauk yam tapa riyak hangin, khang hatai yam tagok”.

Meng akok jit  ruak Covid-19 rah tabiak tal urak ini, gah Bol lin Biên phòng dalm negar duah mboh hu labaih 17.400 mbang urang tame negar suan hukum tapa jalan sit, tapen negar, dalam nan urang tame negar suan hukum di dom tỉnh gah Barak negar tagok rilo. Anak bruk urang tame negar suan hukum rah tabiak dalam srau kadau  di dom jalan taphia negar, Bộ Tư lệnh Bộ đội Biên phòng ginum biai online ngan saong 25 tỉnh hu jalan taphia negar brei pakhang dom bruk khik iek jalan tapen negar, pacang urang tame tabiak negar suan hukum, brei khik bruk ngak po di bhum taneh,  gam pakhang bruk pacang jit Covid-19 pambak tabiak. Urak ini, Bộ Tư lệnh Bộ đội Biên phòng daok khik labaih 1.600 kapol khik iek, brei hu mbaok 24/24 di jalan peih sit tapen negar.

Mesup ni, di ban raya HCM, Kapul  Điện lực Việt Nam (EVN) peih bruk brei thau ka nền tảng điện ia harei  tabung sang  EVNSOLAR. Nền tảng EVNSOLAR tuk camereip hu pandar angaok blah  web labik http://solar.evn.com.vn. Nền tảng ni pabak khaw tin tong abih ka dom po đầu tư lac boh sang , doanh nghiệp hu tabung sang, khin patagok danak dak  điện ia harei tabung sang. Meng nền tảng ni, tuai damuai khin caik  điện ia harei tabung sang  mbuan si duah, pagam pambuak song  nhà thầu halei hu angan hu yaom lagaih, song dom gilang pariak, gah jien ndua dong brei mesraiy piah ngak. Po đầu tư điện ia harei tabung sang meda tong yaom hu chất lượng di danak dak hu ngak salah bloh song tài khoản piah khan veik ka  chất lượng pandap, dịch vụ jip angaok nền tảng EVNSOLAR.

Yaok rituh uirang ngak nong di dom huyen Trà Cú, Cầu Ngang, Cầu Kè, Càng Long, Tiểu Cần, Châu Thành, tỉnh Trà Vinh daok bui sambai kayua baoh gấc hu labik pablei tani tanat, duah jien tame labaih 250 trieu đồng sa hecta sa thun. Urak ini tỉnh ini hu labaih 300 baoh sang urang nong pala phun gấc ngan saong taneh praong jaik 200ha. Meng tuk gấc hu ba tame jeng pandap ngak tabiak jru; abih di nyu nan lac ngak menyek gấc pablei tabiak negar langiu, yaom gấc tuk halei jeng dang di tanut 13.000 đồng sa kilo saong hu rilo doanh nghiep, công ty pambuak bruk blei veik tapa dom HTX di bhum hu taneh pala praong.

Bruk sa po sang di ban  Thủ Dầu Một, tỉnh Bình Dương caik tabiak boh sang  6 balik brei ka  sinh viên kathaot meng dom  tỉnh mai  Bình Dương bac  hu brei dok saoh bahrau ba tagok  mạng xã hội mesup ni hu yaok rituh urang klah rabha, pok meyaom anak bruk ngak bak makna siam mekre ni. Po sang lac ong  L, dok di  phường Chánh Nghĩa, ban  Thủ Dầu Một brei thau, ong ieu urang jakar Phòng Công tác sinh viên – sang bac  học Bình Dương palih ruah dom sinh viên biak kan kandah piah dong brei . Tapa duah thau di urang vak VOV, ong  L.  hu biak rilo bhap bini di  Bình Dương thau tal kayua abih drei dalam bruk ngak pahla xã hội, bhian dong ka dom urang gaok kan kandah .

Hu takik  di nyu 59 taneh ia brei pakauk bhap bini Indonesia tame negar kayua urang njom ruak Covid-19 dalam bhap bini negar ini daok tagok rilo. Rajaei taneh ia ini hu ngak bruk saong dom taneh ia piah brei pacadu bruk tame negar karei di urang Indonesia. Yau nan min, mbiah tal urak  ini tok hu Tiểu vương quốc Ả rập Thống nhất, Hàn Quốc saong  Trung Quốc njauk hatai brei peih jalan gah dulich ka Indonesia piah ngak dom danak dak praong di negar saong dom mbang par drah samar di rajaei.

Cục yaok pataom negar  Hàn Quốc harei ni (9/9) hu ba tabiak pathau khan brei mboh lac dalam bilan 8, dom urang ngak hu bruk ngak di  Hàn Quốc lac  27.085.000 urang, trun  274.000 urang duh song thun dahlau . Yau nan dom urang ngak hu bruk ngak  trun 6 bilan gam gam meng di bilan  3, mbang patrun atah di abih dalam 11 thun, hadei di mbang patrun dui atah  8 bilan , meng bilan 1 tal bilan  8 thun 2009, tuk vak hadei di mbang srau kadau jien padai dunya. Cục yaok pataom pakat negar langyah jalan palih ruah dalam bilan 8 dreih yau bilan 7, daok gaok kan kandah kayua jirt ruak Covid-19 dui atah song bilan hajan dui atah. 

Labaih 75 mbang apui khuah glai praong daok rah tabiak grauk labik di negar Mỹ, dalam nan hu bang California trak abih. Gah daong padam apui khuah  bang California brei thau dalam 33 thun tapa, oh ka mboh tuk halei bo hu tal 800.000 hecta glai apui khuah abih dalam sa thun. Nan oh ka ndem tal bilan pandiak bhang dui atah ba tal apui khauh glai daok labaih 2 bilan tra meng padeih. Daok di bang Washington, 80% sang danaok di ban sit Malden saong rilo baoh sang di Pine City jaik di nan khut tayak kayua apui khuah glai./.

Urang lang: Hani Pha – Ái Nghiêm – 09/09 15:46:01