Bahrau ini, di van ngak bruk haong Sở Pato megru bal raya HCM saong Nyaom biai pataom iek veik thun bac 2017-2018, ba tabiak bruk ngak ka thun bac 2018-2019 di bal raya, Ủy viên Bộ Chính trị, Bí thư Thành ủy TPHCM Nguyễn Thiện Nhân brei thau, meyah cân đối hu kadung jien karja ye meng thun bac 2019, bal raya meda brei miễn jien bac ka anek saih pakat Trung học cơ sở di 24 quận, huyện. Sở Pato megru saong Sở Jien padai bal raya HCM hu jao bruk pambuak gauk ba tabiak jalan ngak piah samar ba đề án Miễn jien bac ka anek saih pakat trung học cơ sở tagok Hội đồng bhap bani bal raya dalam puac thun ini. Bí thư Thành ủy Nguyễn Thiện Nhân lac: “TPHCM daok ginum biai meyah cân đối hu kadung jieng karja ye oh mek jien bac pakat trung học cơ sở. Meyah ngak siam ye bilan 1/2019 bal raya ba tabiak ngak bruk ini. Jalan ngak di bal raya dalam bruk ngak ini oh njauk lac kayua ralo bhap bani oh đóng hu jien bac ka anek bo brei mboh hatai saneng nao bac lac quyền di công dân saong piah ka taong abih manuac urang hu trách nhiệm ba anek nao bac. Pakat bac halei bal raya phổ cập ye bhap bini njauk ba anek nao bac.”.

Caong khin di bal raya HCM tuk ba tabiak đề án ini lac piah ka taong abih anek saih pakat trung học cơ sở thei thei jeng hu nao bac. Kadha ini ngak ka ralo urang ngak amaik ngak ame mboh bui sambai kayua hu yau nan meda patrun meneing naong trak saong hu mbuan lagaih jang piah kuhria ka bruk bac da-a suai lavik di anek bhik di drei. Amuk Nguyễn Thị Thanh Thủy, urang amaik hu anek daok bac di sang bac Trung học cơ sở Trần Văn Ơn, Quận 1 biak bui sambai tuk mahit bruk ini pak di tuk tame thun bac bahrau: “Tuk pang mehit bruk ini sang dahlak thei jeng bui sambai kayua drei trun hu meneing yaom jien ka anek bac. Meyah TPHCM kham merat ngak hu bruk ini mada palagaih ka taong abih anek saih meng tal 6 tal tal 9 hu nao bac, abih di nyu lac anek kamuan dom sang kan kandah. Ini lac jalan biak siam ka anek kamuan drei. Bruk ini di bal raya HCM meda ngak jeng hiệu ứng biak siam kayua nyu hu tính nhân văn.”.

Jeng hu hatai saneng yau nan, amuk Trần Thị Hoài Thư, sa urang daok di quận Bình Thạnh mboh lac quyết định ini brei mboh bruk saneng tal, klah rabha di urang pal akaok bal raya haong bhap bani. Lac sa urang amaik hu anek daok bac tal 8 di bal raya HCM, yaok thun tuk tame thun bac, dom khoản thu dalam nan hu gam jien bac di anek ngak ka amuk duh hatai biak ralo. Sang oh ginup meda hagait nan ye yaom jien ini lac prong dalam yaom jien mek tame di dua hadiuk pasang. Kayua yau nan ye, amuk Thư caong khin bal raya samar ba tabiak ngak bruk ini piah ka ralo baoh sang trun hu sa pok jien oh sit. AMuk Trần Thị Hoài Thư lac: “TPHCM ye langiu dom quận nội thành labik dom urang ngak amaik ngak ame meda hu ginup meda hasit ye jeng daok biak ralo huyện ngoại thành, labik nan dom urang ngak amaik ngak ame jeng biak kan kandah. Meyah urang halei hu 2 urang anek gam nao bac ye naong trak ka jien padai biak prong. Tui Dahalk bruk miễn jien bac ini njauk peih ngak samar jang halei siam jang nan piah klah rabha dom kan kandah haong bhap bani.”.

Oh ta-eng hagait urang ngak amaik ngak ame bo dom urang daok ngak bruk gah pato megru jeng mboh biak njauk hatai haong đề án ini di bal raya HCM. Thau lac meda gaok biak ralo cuang kandah min ralo menuac jeng caong mong jalan ngak bak tính nhân văn ini samar jeng biak. Kuhria ta-eng thun bac 2017-2018, jien mek tame meng jien bac pakat trung học cơ sở di TPHCM nan lac 321 tỷ đồng. Meyah meng thun bac anak tal, bal raya miễn học phí ka anek saih, bruk cân đối dom khoản thu chi piah pabak tame khoản lahik ini lac oh mbuan. Yau nan min, oh njauk lac yau nan bo drei oh ngak. Ralo urang ndom lac meyah bal raya HCM ngak siam meda lac hình mẫu ka ralo tỉnh bal karei ngak tui. Tui ong Trần Trung Hậu, Phaok Akaok Kapul urang ngak gru pato ban raya HCM, ngak hu bruk ini bal raya meda brei mboh cambaih di abih bruk sangka di drei ka pato pakai menuac urang ka harei hadei: “Meng blaoh khaol dahlak hu mehit lac ong Bí thư Thành ủy Nguyễn Thiện Nhân hu ndom lac meda mong iek veik kadung jien di bal raya HCM saong tui jalan drei hu chủ động, hu sa quy chế karei ye meda roh duah dalam thun 2019 miễn jien bac ka anek saih trung học cơ sở. Ini lac kadha biak bui sambai ka bal raya drei. Caong khin lac Sở Pato megru bal raya HCM meda kham merat tui iek bruk ini saong ngak ka nyu jeng bruk biak.”.

Sa kadha hu Bí thư Thành ủy TPHCM Nguyễn Thiện Nhân brei thau, yaom lac miễn jien bac pakat trung học cơ sở min bal raya jeng njauk patagok đầu tư ka dom sang bac dalam pakat ini. Meyah dom sang bac halei caong khin paglaong chất lượng jang, meda ba tabiak dom jalan ngak piah jak ba dom urang amaik ame halan hatian rik daong binah chênh lệch. Meng hatai kham merat di urang pal akaok bal raya, ralo urang ngak amaik ngak ame jia lac tuk jalan ngak ini hu brei tapa, uranaih hu bac da-a siam jang, mbuan lagaih jang./.