Harei 1/9/2017 , njauk tame harei 10 bingun bilan zulhijjah (lac bilan 12 saka Islam), labaih 45 ribau urang Cam Islam bui sambai uan raok harei Roya Aidil Adha. Ini lac 1 dalam 2 harei Roya praong dalam thun di urang Cam Islam, hu makna yau harei Tết. Hanipha, urang vak di rayo sap ndom Việt Nam daok di ban raya Hồ Chí Minh hu kadha vak brei thau ka brui bui sambai mbang Roya Aidil Adha di mikva Cam Islam.

Tỉnh An Giang, labik hu labaih16 ribau urang Cam Islam daok di 5 huyện, ban sit. Dom thun tapa, hu bruk sangka di Đảng saong Karja, radiuk di mikva Cam labik ini dak harei dak hadah hadai tagok. Ngan saong urang Cam Islam, harei Roya lac tuk padeih abih bruk hit piah nao samen di sang megik hu rilo berkat. Sang halei jeng hu rami ramik siam mekre, tuan gom hadah rilo samo piah taduan Roya Haji. Dalam dom harei Roya Haji, rilo tuai dalam saong lingiu taneh ia mai tal dom paei Cam An Giang piah duah thau adat cambat tanarakun, hu mikva Cam pak ini biak rap ar.

Daok ngan saong mikva urang Cam Islam daok di xã Xuân Hưng, huyện Xuân Lộc, tỉnh Đồng Nai, labik hu labaih 1000 sang, harei Roya Haji ini, palei Cam Xuân Hưng biak bui sambai, urang halei jeng caga ka drei dom blah khan ao bahrau, siam di abih. Piah mbang Roya, meng rilo harei dahlau, mikva hu ngak dom janih ahar di bangsa, yau nâm-keng, say-ka-ya, ha-bum…piah payak tuai mai zirah gauk saong tadhau ayuh ka gauk dom panuac siam mekre di abih.  7 tuk mesup, taong abih urang likei nao tal Sang megik samen roya, bloh brei salam gauk, likau maaf  gauk.Ong Haji Hamid, hakim sang megik Nourul Ehsan, xã Xuân Hưng, huyện Xuân Lộc, tỉnh Đồng Nai brei thau: Meng hu bruk sangka di Ðảng saong Nhà nước, urak ni raiduk di mikva Cam hu tani tanat saong dak harei dak ginup meda jang. Lingiu di roya haji, dom harei rija, roya karei di bangsa Cam, karja palei jeng hu peih bruk me-in sambai, daoh tamia, dit blong saong dom bangsa karei dalam tỉnh.

Di ban raya Hồ Chí Minh, labik hu labaih 6.500 urang Cam Islam daok di 17 quận, huyện. Dalam dom harei ini, yam tame labik hu urang Cam daok di ban raya, labik halei jeng mboh chreih chrai, bui sambai. Urak ini, mikva ngak mbang hu, nan ye sang halei jeng hu caga ginup dom janih pandap piah ngak cà ri limo, ngak dom janih ahar meng kan di bangsa piah mbang Roya. Melam Roya, abih gauk dalam sang medeih tal kreh melam, dreih yau urang Việt cang giao thừa. Ini jeng lac tuk piah ka abih gauk dalam sang klah rabha dom bruk ngak hu, jeng ye dom brk oh ka ngak hu dalam thun.

Bruk bui sambai di harei Roya Haji hu mboh di grauk labik dalam dom palei Chăm, jeng lac tuk raidiuk di mikva urang Cam dak harei dak tagok. Mikva Cam oh var bruk daong ba di Đảng saong Karja, jak ba gauk diukrai jum pataom, dak padang puk paga, palei negar, khik ramik dom ilamu siam mekre di bangsa drei, rik daong tame bruk khik ramik saong ngak brei kaya meda jang, hadah hadai jang ilamu dom bangsa Việt Nam./.