Mikva Cam phường 13 pasram padhih tui kreih camin Wa Ho

***

Meng caong khin paglaong pren yava, jhul lihik ruak kik saong ngak tui panuac pato di Wa lac: “ yaok sa bhapbini ieuk, nan lac abih taneh ia ieuk, yaok sa urang khang kadang, nan lac abih taneh ia khang kadang”. Bruk pasram padhih, pabak ka pren yava lac bruk di yaok urang anit taneh ia. Yaok harei pasram hasit thể dục, harei halei jeng pasram ye darah nduac siam, hatai chreih chrai, yau nan lac pren khang”,  adei saai urang kumei Cam di phuong 13, quận 3, ban raya Hồ Chí Minh hu padang kapul nao takai. Jeng bruk bhian randap, yaok harei tal 5 tuk pagaiy ye dom saai ieu gauk nao takai. Tuk akaok mereip hu dom saai kayua limek labaih kilo saong ruak tagok darah njauk pasram. Hadei di sa bilan pasram mboh pren yava khang siam, adei saai biak chreih bui. Saai Ay sah, akaok Tổ dân phố  16, phường 13, quận 3, urang pasram hu labaih sa bilan ini mai ndom lac : urak ini hu meng 10 tal 15 adei saao pasram . Meng pasram thể dục dahlak mboh drei sami samal jang, hatai bui sambai jang, hu taom gaok rilo menuac urang jang.

Saai Damila daok di phường 13, quận 3, urak ini lac urang papar sap di rayo papar binguk ban raya Hồ Chí Minh khan lac : hadei di sa harei ngak bruk glaih glan, hu pasram yoga gam gam, saai hu pren yava khang kadang, ngak bruk siam lagiah. 

Daok dom adei anek saih hadei di tuk bac di sang bac, dom adei bhian nao tal dom kalup kapul daok jaik sang pasram dom môn padhih daong ka rup pabhap glaong tagok, yau ye : taong mbanh, caoh mbanh, nduac takai…Urak ini, dalam dom harei puac adit, dom adei bhian pasram saong gauk, tacei pato gauk alamu taong mbanh. Pasram padhih daong dom adei hu pren yava khang kadang, plaih hu bruk pataom gauk mein dom bruk jhak. 

Urak ini, bruk pasram thể dục hu jeng bruk bhian randap di bhapbini Cam daok di  phường 13, quận 3, ban raya Hồ Chí Minh ./.