Tân Thanh urak ini hu palei 3 saong palei 9 lac dom palei nao dahlau dalam bruk jak ba mikva K’Ho pala dâu raong tằm ngan saong 90 baoh sang, mikva labik ini diukrai meng phun cà phê saong padai sa vụ di dom labik gluh bok, labik taneh dhaong. Min 2 thun jiak di ini, dom labik ngak padai sa vụ dahlau nan hu bak hijao dom bein dâu. Ong Nguyễn Hải Quân – phaok Chủ tịch iek gah kinh tế xã Tân Thanh, brei thau: “harei camereip huyện peih tal pato bruk ngak, mikva K’Ho oh thei tut angan  nao bac pala dâu raong tầm. Hadei di nan, xã palih jalan jak ba urang jakar palei, abih di nyu nan lac adei saai dalam dhar kapul urang kamei nao bac saong ngak iek dahlau piah meng nan mikva bac megru”. Saai K’Rin – akaok dhar kapul urang kamei palei 3, sa dalam dom urang nao dahlau dalam bruk raong tằm di labik ini daok brei thau lac: “dahlau deih, langiu di pala cà phê, mikva tok raong pabui, raong menuk. Meng harei bac bruk raong tằm, dom adei saai hu bruk ngak, duah hu jien tame”.

Urak ini di Tân Thanh, mikva jeng daok raong tằm angaok giá, ngan saong phun jien tuk camereip piah blei pajaih saong giá abih jaik 4 triệu đồng min. Hu thau, yaok bilan sa baoh sang di labik ini meda raong dua lứa tằm. Yaok lứa raong mikva mek hu takik di abih 45 kh kén sa hợp baoh. Yaom kén urak ini jaik 90.000 đồng sa kg. Eng sang saai Ka Uých hut al 4 sào dâu hala praong. Lac sang raong tằm hu năng suất di abih dalam palei, saai meda raong gối đầu dom lứa tằm saong sa bilan mek 4 mbang kén. Saai Ka Uých brei thau ilamu: “khin raong tằm ye brei pala dâu dahlau di tuk raong 6 bilan, brei palih ruah pajaih dâu cao sản piah samar hu thu hoạch sang năng suất glaong. Pala dâu raong tằm, phun jien takik, oh caong ralo urang ngak, urang taha daok di sang jeng brei tằm mbang hu. Yaok harei, drei tok abih jaik sa tuk piah cakak dâu ka tằm mbang, tukvak daok veik meda nao ngak puh. Tằm mbuan raong, yaom lac kein laba mek tame sa mbang oh glaong, min duah hu jien gam gam dalam thun.

Saai Ka Phi  - akaok dhar kapul urang kamei palei 9, jeng daok kanal “Dahlau daih mikva drei oh thei thau raong tằm. Thei mboh anek tằm jeng huac, kayua nyu yau anek halak. Urak ini abih huac ye, sang halei jeng raong. Meng raong tằm bo mikva thau khik hacih saat labik daok, kayua meyah oh khik hacih, ye tằm nyu ruak abih”.

Mboh bruk pala dâu raong tằm rủi ro takik lac jalan patagok kinh tế l;agaih saong urang nông puk aplei, nan ye UB bhap bini xã Tân Thanh daok pachreih patagok bruk ngak ini, abih di nyu nan lac dalam bhum mikva bangsa takik asal Tây Nguyên. Saai Nguyễn Hải Quân, brei thau: “Meng dom tal pachreih nông saong bac megru meng dom baoh sang urang Kinh raong tằm meng lavik samar, nan ye  ilamu raong tằm di mikva bangsa takik asal Tây Nguyên daok di labik ini biak siam. Tằm raong chất lượng siam, jit ruak angaok tằm takik rah tabiak. Eng bruk pacang cakak jit ruak, mikva ngak biak siam meng bruk rami ramik hacih sa-at, pandar jru njauk quy định, nan ye chất lượng dom lứa tằm biak samu gauk”.

Tui bruk rami ramik bhum pala dâu raong tằm tal thun 2020, Lâm Đồng meda patagok tal 9.000 ha dâu dalam tỉnh, jien buh tame ngak jaik 100 tỷ đồng saong padang 80 mô hình raong tằm pataom sa labik praong. Piah ngak hu yau nan, brei hu bruk rik pren di mikva bangsa takik asal Tây Nguyên daok di bhum taneh ini./.