Sang ong Vắn A Há, urang bangsa Nùng daok di thôn Lương Đông, bal sit Lương Sơn, huyện Bắc Bình, tỉnh Bình Thuận hu labaih 8 sào taneh bồi tapen kraong Lũy, thau lac darak pasar blei dom janih njam patam, baoh karaoh tuk tết. Sang ong Há hu pala 3 sào lasun hala, mblang taneh daok veik, ong pala dom janih yau: tangeiy, ratak dom janih.

Ong Há brei thau, dalam dom thun tapa langiu di phun padai, dom phun njam patam ini hu ba jien tame grap tanat luac thun ka sang ong, dom urang anek hu mbang bac tal labik tal dhua meng hu dom mblang taneh njam patam ini. Bahrau ini, sang ong Há jeng yau mikva hu pala dom janih phun njam patam di labik taneh bồi ini jeng khut abih kayua dom mbang hajan ribuk dalam thun, nan ye vụ njam pala piah pablei tuk Tết, oh daok hu rilo janih yau dom thun dahlau. Ong Vắn A Há, thôn Lương Đông, ban sit Lương Sơn, huyện Bắc Bình, Bình Thuận brei thau: “Meda lac, angaok mblang taneh ini sang dahlak tok pala rilo lasun hala, tangeiy paik ndo piah pablei tuk tết. Sang dahlak jeng ngak mbang hu meng mblang taneh ini caga hu aia luac thun, taneh haluk siam rilo nan ye pala ngak luac thuan, ngak brei hu jien tame tani tanat ka sang.”

Oh ta-eng hagait sang ong Há, rilo sang karei di thôn Lương Đông jeng pala dom janih njam patam piah duah jien cai pandar dalam dom harei tết. Taong abih mblang taneh bồi ini hu labaih 10ha taneh pala njam patam yau: lasun hala, tangeiy saong ratak dom janih…. Dom mblang taneh ini jaik tapen kraong, nan ye mikva pandar máy bơm aia piah pruh ka phun pala, nan ye taneh pak ini hu pala ngak luac thun. Yaom lac, tok hu labaih 10ha min jien ba mai ka mikva pak ini biak tani tanat. Kuhria rah tapa yaok sang tok hu dua klau sào taneh di labik ini, min jien mek tame yaok thun glaong jang rilo mbang dut haong ngak hamu, ngak apuh. Rai diuk di mikva thôn Lương Đông cakrok patagok yau harei ini, binah prong lac mai meng bruk pala njam patam ini. Sa-ai Vắn Nhật Diễn, thôn Lương Đông, ban sit Lương Sơn, huyện Bắc Bình, t.Bình Thuận ndom lac: “Sang dahlak jeng yau mikva pak ini rilo meng pala lasun hala paih pablei tuk tết. Dahlau diah, angaok mblang taneh ini mikva  pala tangeiy lai, min kayua darak pasar oh tani tanat nan ye mikva salih tapa paka njam patam piah pablei tuk tết ini..”

Luac thun, dom sang pala njam patam pak ini, tuk halei jeng kham merat glang iek dom bein njam piah hu jien mek tame, dom harei jaik si Tết pak ini biak jar var, chreih chai jang tuk harei, tui nan rilo sang pala njam meda hu jien mek tame biak rilo, daong ka mikva paglaong rai diuk, piah uan raok Tết bui sambai saong ginup meda jang./.