Hu labaih 30.000 doanh nghiệp pathau khan ka bruk brei jien tết 

Mintri Lao động Thương binh saong Xã hội bahrau pathau khan tagok rajaei ka bruk jien bilan, jien thưởng Tết di urang ngak di thun 2021. Tui nan, hu labaih 30.000 doanh nghiệp pathau khan tanut thưởng Tết Nguyên đán 2021. Tanut thưởng tui kuhria lac samu sa bilan jien bilan, lac 6 triệu 360 rabau đồng/ sa urang, samu 95% tanut jien thưởng Tết thun 2020. Tanut jien thưởng Tết 2021 glaong abih lac 1 tỉ 07 triệu đồng, ka sa urang khik ramik di công ty thiết kế, ngak jamriak laar.

Cục Pajeng ba jalan kapal haok Viet Nam birau hu harak payua samar chip tal dom hãng kapal haok ka bruk langyah ngan saong dom tuai oh nao hu kayua jit COVID-19. Tui nan, Cục pajeng ba jalan kapal haok Viet Nam iew kakei dom hãng kapal haok samar brei salih vé, bayar vé meng jien veik atau voucher meyah tuai caong khin, dalam nan hu gam vé oh brei salih harei atau mong par, oh brei salih labiak nao, oh brei bayar vé ngan saong tuai damuai hu blei vé blaoh min oh nao hu kayua labik nan njauk pacang cakak, brei daok karei di dom jalan par  hãng kapal haok daok peih.

Dom harei jaik di ni, yaok harei ga Biên Hòa (Đồng Nai) taduan yaok ribau menuac mai biyar harak vé radaih pui Tết kayua huac bruk rahtabiak sarau kadhau di jit ruak. Dom tuai hu pablei harak vé radaih pui nao dalam tukvak meng harei 2/2/2021 tal puac harei 28/2/2021 (lac meng 21 bilan mat thun sak takuk tal harei 17 bilan sa thun sak kubao), hu caong salih, biyar vé meda hu dua jalan. Ka sa lac: tuai meda khik veik dalam tukvak lac 1 thun meng harei peih nduac. Mayah tuai caong salih tukvak saong jalan nao meda oh lahik jien salih jalan nao, tok bayar jien chênh lệch yaom vé (mayah hu). Mayah puac thun 2021, tuai oh caong nao radaih pui ye hu biyar abih jien meng harei 1/1/2022. Ka dua lac: mayah tuai hu caong biyar vé harei, jien phí lac 30% yaom vé saong bruk biyar jien ka tuai meda hu peih ngak hadei di 90 harei meng harei biyar vé.

Sở Y tế tỉnh Gia Lai peih bruk jao brei 29 mac suak yawa meng langiu tame VFS-410, yaok mac yaom 106 trieu đồng kayua kapol Vingroup daong dom cơ sở y tế saong hu Mentri Y tế parabah ka tỉnh Gia Lai. Kapol Ecopark jeng hu alin brei ka Mentri Y tế saong tỉnh Hải Dương jien saong mac jamriah PCD Covid-19. Tui nan, kapol Ecopark hu daong 3 tỷ đồng ka dom y bác sĩ labik akaok pacang jit; alin ka tỉnh Hải Dương 10 ribau bộ test dut iek virus SARS-CoV-2, yaom 5 tỷ đồng; daong brei taong abih Balai halang ia nerak y tế, gam saong dom pandap panda, jru hóa chất, jien piah pandar dalam tuk pacang jit ka sang iek ruak dã chiến ka 3 di tỉnh Hải Dương, yaom 5 tỷ đồng.

Hadei di rilo bilan kham marat ngak pasiam, tal urak ni jalan tame labik jaleih taneh lam rilo manuac di xã Phước Lộc, huyện Phước Sơn, tỉnh Quảng Nam hu ngak blah. Dom gah chức năng dalam palei daok peih veik bruk duah 4 urang njauk bala daok lahik di xã Phước Lộc. Trung tá Nguyễn Trung Kiên, urang ba akaok mBan Chỉ huy Quân sự huyện Phước Sơn, tỉnh Quảng Nam brei thau, yaom lac jalan tame labik jaleih hu ngak blaoh, min tok nao hu meng radaih mac. Dom urang njauk bala tal urak ni jaik 4 bilan min dom urang jaka jeng daok kham marat duah.

Tổng thống Mỹ Joe Biden iew bol bala Myanmar brei klaak chip quyền lực, saong brei panuac pasang iek veik bruk taong phạt, hu klaak blaoh meng bruk salaih tapa dân chủ di taneh ia ĐNA ini. Dalam panuac khan,Tổng thống Biden iew dom taneh ia di dunya jak gauk hu sap ndem panuac pauac  piah  pacap bol bala Myanmar klaak quyền lực birau meblah mek dahlau di nan.

Harei kabroi (2/2),Palextin hu peih bruk klauk jru vắc-xin Covid-19 ka urang ngak gah y tế daok di gah akaok pacang caga jit, hadei di tuk taduan hu  2.000 mbang vắc-xin di hãng jru Moderna, Mỹ bo Israel pabak brei. Bruk I-xra-en pabak vắc-xin Covid-19 ka Palextin peih tabiak hadei di tuk rilo kapul nhân quyền ba tabiak panuac ieu Ixraen daong Palextin pacang caga jit. Hu thau, I-xra-en daok lac negar ba akaok di dunya ka bruk klauk jru vắc-xin Covid-19 kuhria tal urak ni.

Harei 2/2, urang dahlau daih ngak bol lin dalam mbang kalin kan Dunya mbang ka 2 di negar Anh, Sir Tom Moore, urang hu thau tal kayua ngak siam bruk jak ba rik jien ngak pahala ralo abih brei ka gah y tế Anh dalam jit praong Covid-19 di thun blaoh, plang lahik kayua Covid-19, umo 100 thun. Amuk patao negar Anh hu payua panuac klak rabha dom pandik pandua tal baoh sang Sir Tom Moore, urang hu bhap bini Anh ieu meng angan anit ranam lac "Đại úy Tom" hadei di tuk danei angan di dunya yau sa baoh kareih ginu ka urang karei pasang ngak tui./.

Urang lang: Thu Thảo - Ái Nghiêm - 3/2