Daong brei kadung an sinh ka labaih 100 rabau menuac pablei vé số

Mintri Lao động Thương binh saong Xã hội brei thau, urak ini dalam taneh ia daok peih bruk 4 triệu kadung an sinh. 23 tỉnh, ban pa-ath di gauk hu daong brei ka labaih 100 rabau menuac pablei vé số. Daok bruk peih ngak Sarak 68, hu labaih 15 triệu menuac hu daong 8.400 tỷ đồng, 1 triệu 200 rabau menuac ngak bruk tự do hu daong labaih 2.100 tỷ. Min jeng daok hu dom tỉnh ban daok huac trách nhiệm nan ye bruk daong ka bhap bini meng kadung jien karja daok suai damuai. Nan lac 2 tỉnh Bến Tre, Vĩnh Long ka oh mek jien meng kadung jien karja piah daong ka urang; 9 tỉnh ka oh daong jien menuac padeih harak pambuak bruk ngak, lac: Bà Rịa-Vũng Tàu, Tiền Giang, Vĩnh Long, Hậu Giang, Sóc Trăng, An Giang, Kiên Giang, Bạc Liêu, Phú Yên….

Meng harei ini (30/8), UBND TP. HCM brei adat ka gah jao pandap công nghệ (ieu katut lac shipper) haong 20.000 menuac ngak di labik pablei lẻ hu ngak bruk. Dom shipper di 8 quận bhum bhing meriah brei hu klauk takik di abih lac 1 mbang vaccine saong dut iek samar mboh lac âm tính haong COVID-19 1 harei 1 mbang tui mẫu gộp 3 urang. Dom menuac jao pandap di 14 quận huyện daok veik jeng brei hu klauk takik abih 1 mbang vaccine saong test samar mboh âm tính 2 harei 1 mbang. Công an TP.HCM jeng brei pabak jaik 20.000 harak nao jalan ka dom menuac ngak di labik pablei lẻ.

Hội Liên hiệp urang kumei Việt Nam bahrau ba tabiak tui jalan online danak dak “Triệu paok pandap klah rabha anit ranam". Tui nan, yaok pok pandap yaom 300.000 đồng, meng jien mbaok atau meng pandap hu ba tal tangin bhap bini, hội viên, urang kumei, uraniah daok gaok kan kandah kayua jit ruak Covid-19, piah ka yaok urang hu sahanang hatai  “thei daok halei daok nan”, pachreih hatai haong Đảng, karja pacang caga jit ruak”. Abih tih dom pok pandap dalam harei camereip peih bruk ieu daong, hu tal 72.256 pok, yaom labaih 21 tỷ đồng.

Anak bruk rah tabiak srau kadau di jit ruak Covid-19,  Tây Ninh brei patah di gauk tui Sarak 16 di Thủ tướng Chính phủ 14 harei tra, meng mon 12 melam 30/8. UBND tỉnh ieu bhap bini daok di sang, thei daok halei daok nan, langiu di bruk praong njauk nao. Daok bhap bini dalam labik njauk pacang veik, oh brei tabiak truh sang. Sở Jalan mbak pajeng ba Tây Ninh brei thau, meng harei 25-29/8, tỉnh taduan raok labaih 1.500 menuac meng TP.HCM. Taong abih jeng hu dut iek SARS-CoV-2 saong hu klauk pacang COVID-19. Tapa nan, mboh hu 16 urang dương tính,

Harei 29/8, di xã Sơn Mỹ, huyện Hàm Tân, tỉnh Bình Thuận, 2 radaih pajeng 63 urang bangsa H’Mông peih nao Nghệ An. 63 urang ini palei Nghệ An daok ngak mbang di Bình Thuận min lahik bruk ngak, caong khin nao palei saong hu Bình Thuận daong brei tui hatai caong khin. UBND tỉnh tabiak abih jien pajeng ba, jien mbang menyum angaok radaih, brei radaih pajeng tal palei saong jao ka tỉnh Nghệ An di labik taduan raok, ngak njauk bruk pacang caga jit Covid-19 dalam luac tuk vak nao jalan.

Japon daok pamaong tal bruk klauk ginup vaccine ka rahra di bilan 10 atau bilan 11 anak tal, saong sanya klauk veik mbnag ka 2 vaccine pacang COVID-19 di akaok thun 2022. Dom menuac hu klauk dahlau mbang 1 lac dom menuac ngak y tế haong urang praong thun. Urak ini Japon daok pamaong tal bruk klauk ginup ka 80% rahra. Urak ini, bruk klauk ginup di taneh ia ini hu 43%. Tui Mintri Y tế Japon, domsang iek ruak dak harei dak bak mebuac ruak tuk dom urang njom COVID-19 daok tagok glaong, hu tal 118 menuac njom COVID-19 njauk taong ruak di sang.

Hadei di 15 harei Taliban meblah quyền pasang iek taneh ia, min jeng oh ka hu Rajaei di Áp-ga-nít-xtan. Quyền bộ trưởng Brei thau saong Ilamu gam lac urang brei panuac di Taliban,  Zabiullah Mujahid harei 29/8 khan lac Taliban meda padang salah angan Rajaei bahrau dalam 2 adit tal Taliban hu pok ngak cảnh sát trưởng blaoh ka taong abih 34 tỉnh dalam taneh ia.

Rabuk khang pakat 4 Ida dui par tabung sang di sa sang iek ruak dalam palei di bang Louisiana (Mỹ) hadei di tuk tuh tame harei 29/8. Tổng thống Joe Biden hu pasang iek mbaoh tangin njauk hatai brei tabiak bruk samar drahka 2 bang Louisiana haong Mississippi dahlau di tuik ribuk Ida tuh tame. Vệ binh Quốc gia bang Louisiana brei 4.000 lin haong 5.000 menuac caga pacang rabuk. Thun 2005, rabuk khang Katrina bahrau lac pakat 3 min ngak brei labaih 1.800 menuac metai, ngak tayah rilo sang danaok, jaleih ar pacang saong ia dauk dalam di ban New Orleans./.

Urang lang: M. Phuong – Ai Nghiem – 30/08 10:26:05