Mintri Công an brei thau, dom janih ma túy tổng hợp daok yam takai tame sang bac 

Pasak kuhria mboh dahlau bruk langik tasik kuhria mboh lac, dalam dom harei anak tal, hajan biak praong di rilo labik dalam dom tỉnh di Trung Bộ meda dui atah lavik harei, abih di nyu lac tuk áp thấp nhiệt đới haong ribuk gam saong hangin đông bắc. Hajan ia sua dom harei anak tal jeng biak kan kandah kan si kuhria mboh dahlau. Meng Hà Tĩnh – Phú Yên meda hu mbang ia sua praong saong biak praong, meda praong di abih kuhria meng dahlau mai. Di bhum Nam Bộ, meng harei 17-21/10, meda hu mbang ia ndik glaong di abih kuhria meng akaok thun mai, abih di nyu lac di TPHCM meda dauk ia, ia tagok tal tabung glaong.

Mintri pato magru bahrau hu harak payua tal Hội đồng pakat negar taong yaom tapuk siphau môn Tiếng Việt tal 1 ka bruk pasang iek, pathau khan ka asal kadha dalam tapuk siphau môn Tiếng Việt tal 1. Harak hu ndem cambaih laih, dom harei tapa, mboh urang ndem rilo ka bruk tapuk siphau môn Tiếng Việt tal 1 hu dom kadha ka oh lagaih ngan haong anek saih. Mintri pato magru hu ieu kakei kapul pasang iek saong khan brei thau dahlau di harei 17/10.

Mintri Công an brei thau, dom janih ma túy tổng hợp daok yam takai tame sang bac meng dom angan yau “tem ba-a”, “bùa dalah”, “ia sambai”, “trà sữa”, “menek pandam”… Yaom lac hu rilo jalan pathau khan, pacang cakak, min jaik di ini, bruk tội phạm saong ma túy jeng daok rah tabiak srau kadau, bruk pandar ma túy haong ma túy tổng hợp daok tagok rilo, pataom tame dam dara uraniah bahrau praong,  anek saih saong sinh viên. Tui yaok pataom, dalam labaih 230.000 urang nghiện daok hu tui iek ye dom urang umo meng 16-30 thun hu tal 48%.

UBND tỉnh Bạc Liêu bahrau peih tabiak danak dak sang mac Điện hangin Hòa Bình 5 (vaktu 1) di xã Vĩnh Thịnh, huyện Hòa Bình. Danak dak hu padang ngak di taneh praong 28ha ngan saong 26 mbaik tuabin hangin hu prien khang 80MW, saong yaom phun jien buh tame ngak abih tih lac 3.200 tỷ đồng. Nan lac danak dak điện hangin praong abih di mangaok mbaok haluh di bhum taneran kraong Cửu Long dalam gah pandar năng lượng hacih. Danak dak meda daong patagok kadung jien kanja di pak ni labaih 80 tỷ đồng/ yaok thun.

Jaik 180 urang Việt Nam bahrau hu dom jabat chức năng Việt Nam haong Brunei pambuak bruk ba meng Brunei mai veik taneh ia, dalam nan rilo meng lac urang ngak abih tukvak ngak bruk di Cty Lilama haong dom urang gaok kan kandah karei karei. Hadei di tuk kapal haoh par trun mblang kapal haoh pakat dunya Cần Thơ, dom menuac di sruh kapal haoh nan hu pasang iek prein yava saong hu ba nao daok karei tui adat.

Sarak cakak trun phao ndao bahrau (START-3) di Nga saong Mỹ meda hu mbaok tangin dahlau di tuk rahtabiak bruk pilih ruah Tổng thống Mỹ di akaok bilan 11. Truyền thông Mỹ khan lac, rajaei di Tổng thống Donald Trump brei thau ka harak sanya, rilo meng lac dua negar meda pambuak viek bruk ginum biai dalam adit anak tal. Harak cakak trun phao ndao nan, lac harak patakik ngak phao ndao di gah Nga saong Mỹ, abih tukvak di bilan 2 thun hadei.

Tui 1 roh duah bharau di dom urang ilamu Australia hu ba tabiak angaok Tạp chí Virus học harei ini (12/10), virus SARS-CoV-2 meda diuk hu angaok mbaok labik jangaih tapak lavik jang virus ruak cúm. Dom urang ilmau mboh lac virus ba tal Covid-19 meda diuk hu tal 28 harei angaok màn hình phone tangin, jien ba-ar, thủy tinh, pasei pasiak haong katak. Tapa roh duah ini jeng brei mboh lac bruk rao tangin gam gam saong ngak hacih dom mbaok pandap meda daong pacang cakak virus njaom mbak dalam bhap bini.

Gah Di cư dunya brei thau, 390 urang tame negar suan hukum, dalam nan hu gam urang kumei saong ranaih bahrau hu chraong daong di lingiu tasik Libya. Tui yaok pataom, meng akaok thun 2020 tal urak ni, hu jaik 9.500 urang tame negar suan hukum hu daong saong hu nao veik Li-bi. Langiu di nan, hu 196 urang metai saong 275 urang lahik. Tal urak ni, rilo urang nduac klaak taneh ia jeng daok pilih ruah Li-bi lac negar padeih takai piah duah jalan tapa Địa Trung Hải piah nao tapa châu Âu./.

Urang lang: M. Phương – Thu Thảo – 12/10 15:44:10