Mban khik ramik jalan pasei đô thị TPHCM peih bruk dui cáp điện angaok jalan metro ka 1 (Bến Thành - Suối Tiên)

Jabat QH brei thau, mbang nyaom ka 53 di UBTVQH mbang XIV hu peih tabiak harei 22/2 di Hà Nội. Tui kuhria, UBTVQH meda brei panuac ramik veik mbang ka bruk ngak, menuac ngak di jabat, kapul nyaom, đơn vị di TW saong tỉnh ban hu ba menuac tabiak piah pilih ruah ka QH mbang XV; pasang iek, brei panuac ka harak pathau khan bruk ngak tukvak 2016-2021 di Rajaei, ka bruk kuhria caga ka mbang nyaom ka 11, QH mbang XIV.

Mintri pato megru hu harak payua ka dom Sở pato megru song dom sang bac Trung học phổ thông di drei ka bruk peih ngak danak dak pato pakai song pacang caga jit Covid-19. Tui nan, Mintri GD-ĐT hu panuac ieu dom Sở GD-ĐT tui bruk di dom tỉnh ban piah pathau khan UBND tỉnh, ban likau panuac tacei ba ka bruk brei anek saih nao bac atau padeih bac di sang bac; samar pasamu bruk pato pakai học kỳ II thun bac 2020-2021. Bruk pato bac tapa jalan online, asal kadha danak dak khik hu ilamu bac daa , bruk pato pakai, palagaih song yaok pakat bac.

Mintri Y tế brei thau dalam thun 2021 Việt Nam ginum biai hu 60 triệu mbang vaccine Covid-19 dalam abih tih 150 mbang daok caong hu. Mintri daok kham merat ginum biai haong dom Cty karei yau Pfizer, Moderna, ginum biai haong Nga saong dom negar karei piah hu rilo jang vaccine. Bruk pandar vaccine hu ngak njauk tui panuac kakei di Gah Y tế dunya, dom bruk pambuak tal pacang caga jit ruak, brei pandar dahlau ka labik hu jit saong labik mbuan njom mbak.

Mesup 19/2, Mban khik ramik jalan pasei đô thị TPHCM peih bruk dui cáp điện angaok jalan metro ka 1 (Bến Thành - Suối Tiên). Ni lac bruk brei mboh tuk salih tapa di danak dak peih ngak kết cấu hạ tầng tapa bruk kuhria caga peih iek. Dalam tuk vak jit Covid-19 ngak kan kandah prong tal bruk padang ngak, danak dak hu ngak salah bloh 82% tong abih bruk lac sa bruk kham merat prong. Metro ka 1 lac jalan pasei đô thị camereip di TPHCM, hu ngak haong yaom jien buh tame lac 43.700 tỷ đồng. Tui kuhria quý 4/2021, radeih pasei hu peih nduac iek angaok glong meng meng mblang Bình Thái mai depot Long Bình (ban Thủ Đức).

Harei 19/2, di huyện Thuận Nam (Ninh Thuận), Trungnam Group peih bruk tabiak mbaok xuân 2021 Danak dak labik bến Cảng Cà Ná mbang ka 1 – Pabah lamnge Cà Ná, praong abih tih 108 ha. Urak ini hu ngak jiak salah labik ar pacang, labik tái định cư ngak hu 90%. Bruk ngak salah mbang ka 1 di danak dak dalam thun 2021 meda lac jalan peih tabiak praong piah ngak jeng 1 labik đô thị ngak kong praong yaok tỷ USD, duh ka bruk pajeng ba pandap di bhum Nam Trung Bộ haong Tây Nguyên.

Harei 19/2, Mỹ tame veik Thỏa thuận khí hậu Paris 2015 hadei di 4 bilan tabiak truh. Tổng thống Mỹ Joe Biden hu dom bruk ngak camereip ba negar ni tame veik bruk kham merat pacang biến đối khí hậu, yau pasiam veik kapul dom cố vấn gah ilamu di tổng thống, tacei ba buh jien tame dom bruk pagam tal nhiên liệu hóa thạch ka gah kinh tế song dong bhap bini gaok kan kandah kayua labik daok njauk palai pajoa.

Karja negar Anh haong Canada tabiak panuac trừng phạt dom urang tướng pan quyền di Myanmar hadei di bruk pajaleih karja taneh ia ini harei 1/2. London khan lac brei pacang veik jien padai drap ar saong oh brei nao mai ngan saong 3 urang tướng bol bala, dalam tuk Ottawa ndom lac meda trừng phạt 9 urang ngak praong di bol bala Myanmar. Dahlau di nan, Hoa Kỳ haong rilo taneh ia phương Tây ba gauk tabiak panuac cagar veik bruk bol bala pajaeih karja. Ngoại trưởng 4 taneh ia lac: Mỹ, Nhật, Úc haong India mboh lac, njauk samar pasiam veik bruk dân chủ di Myanmar, ieu peih palai chip dom chính trị gia daok njauk cap kreik.

Hadei di tuk tamat bruk klauk vaccine ka 9 urang, karja ban Bắc Kinh, Trung Quốc peih praong bruk klauk vaccine pacang Covid-19 ka bhap bini, tui nan tal bilan 5/2021 hu klauk brei saoh ka tong abih bhap bini Bắc Kinh dalam umo meng 18-59, tui jalan halan hatain. Dahlau di nan, Bắc Kinh hu klauk vaccine ka 1,5 triệu y bác sỹ, dom menuac ngak dom gah dịch vụ, urang dahlau deih lac anek saih, dom urang nao ngak bruk di negar langiu../

Urang lang: M. Phương – Hani Pha – 20/02