Mintri Y tế brei salih jalan taong ruak Covid-19 dalam tuk urang njom ruak tagok samar, labaih 251.000,  ngak trak damak khang ka dom labik iek ruak. Tui nan, taong abih sang iek ruak dalam negar daok brei taduan raok urang ruak Covid-19 saong ngak iek bruk taong ruak F0 di sang. Lingiu dom sang iek ruak dã chiến, dom sang iek ruak karei brei neh jeng dua, gam iek ruak karei gam taong ruak Covid-19. Dom sang iek ruak brei caga takik abih 40% dom papan ndih iek ruak ka urang ruak Covid-19.

Thành ủy TP.HCM brei thau, TP daok brei pa-atah di gauk tui sarak 16 hadei di harei 15/8. Urak ini, jit ruak di ban raya daok khang, dom urang ruak daok dang veik dalam bản đồ Covid-19, mboh yau daok trun min oh khang kajap. Dom menuac metai haong menuac ruak bahrau yaok harei daok glaong, saong hadei di harei 15/8, dom menuac ruak bahrau yaok harei jeng daok di tanut labaih 3.000. Kayua yau nan ye, ban raya padang jalan patagok bruk pacang caga jit dalam vaktu meng 15/8 tal 15/9. Yaok tukvak hu yaok bruk ngak cambaih laih, khang hatai tal harei 15/9 meda pasang iek hu jit ruak.

  Sở Pato Megru ban Đà Nẵng brei thau, kayua jit Covid-19, dom labik pato megru meda peih thun bac bahrau saong brei pato – bac online meng harei 5/9 saong miễn taong abih jien bac ka thun bac 2021-2022.  Kayua rilo gru haong anek saih daok dalam labik pacang veik, labik daok karei nan ye bruk di yaok labik nyu karei di gauk, kan ngak yau gauk hu. Kayua yau nan ye, Sở Pato Megru Đà Nẵng ndom lac, bruk pato – bac online lac jalan daong, oh lac jalan pato. Meyah jit ruak oh ka hu pasang iek, sở meda hu tacei pato cambaih laih ka bruk pato saong bac bài bahrau online ka anek saih tui jalan ba tabiak di Mintri Pato Megru.

  Tijuk dalam  8 huyện, ban sit di tỉnh Bà Rịa-Vũng Tàu daok brei ngak tui Sarak 16 pabak 10 harei tra kuhria meng harei 16/8, daok huyện Côn Đảo brei ngak tui Sarak 15. Tui gah y tế tỉnh, meng tuk paatah di gauk mbang ka 2 (meng harei 2/8 tal ini), dom F0 di tỉnh daok trun meneing. Min urang ruak trak tagok biak rilo. Bà Rịa-Vũng Tàu daok peih bruk pacang jit haong 2 tukvak lac: harei 10-15/8 saong 15-25/8. Tỉnh daok pamaong ngak lac tal harei 25/8 khik bhum  siam mekre salamat ngan saong 81 dalam 82 xã, phường, ban sit.

Dua ribau po sang trọ di Long An brei trun meneing jien pah atau oh mek jien pah labik daok trọ ngan saong yaom jien abih tih labaih 14 tỷ đồng. Kayua jit ruak rah tabiak srau kadau, labaih 10.000 doanh nghiệp, labik ngak pandap, jaik 240 rabau urang ngak, menuac ngak brei padeih ngak. Dalam nan, labaih 55.200 menuac padeih bruk oh hu jien bilan saong jaik 34.100 urang abih tukvak pambuak bruk ngak. Urak ini, dom gah pambuak tal saong po sang trọ di Long An ieu pataom bruk daong di bhap bini, hu yaok tỷ đồng, blei pandap mbang huak daong ka urang daok sang pah dalam tỉnh.

Tui Gah Y tế dunya (WHO), jit Covid-19 di dunya daok biak kan kandah, dom taneh ia brei samar ngak tui panuac ieu pandar ka nyu njauk, lagaih vaccine. Jaik 3 tỷ mbang vắc xin hu parabha di dunya, min bahrau hu 90 triệu mbang dalam nan tapa danak dak COVAX. WHO daok hu panuac ieu peih bruk klauk vaccine ka menuac sia dunya hu takik di abih lac 10% di bilan 9, 40% di puac thun 2021. Bruk ini meda ngak hu tapa bruk samar brei adat pandar di dom taneh ia taong abih  11 janih vaccine hu WHO brei adat blaoh.

Mesruh gauk di Afghanistan daok rah tabiak khang. Rilo taneh ia yau Canda, Na Uy, Đan Mạch, Hà Lan, Đức, Tây Ban Nha… brei thau lac kreik pabah mbang Đại sứ quán dalam tuk gah Taliban daok tame jaik ban ine Kabul. Taliban daok brei cakak dom jalan điện pabak ka ban ine, pacang veik labik ini. Mbiah tal urak ini, Taliban pasang iek hu takik abih lac 18 dalam 34 pasak dom tỉnh ban di Afghanistan. Urang ngak praong di Liên hợp quốc hu panuac lac, bruk di Afghanistan urak ini daok jhul taneh ia ini laik tame bruk rambah rambup bahrau.

Thủ tướng Hy Lạp Ki-ri-a-cos Mít-xô-ta-kís (Kyriakos Mitsotakis) hu panuac lac bruk khuah glai khang di Hy Lạp dalam labaih 1 adit tapa lac bala praong abih gah sinh thái bo taneh ia ini gaok kuhria dalam yaok pluh thun tapa. Dom mbang khuah khang patuh tabiak dalam tuk Hy Lạp daok hu pandiak biak khang saong dui atah di abih kuhria meng thun 1987 tal urak ini. Yaok ratuh urang lin padam pui gam haong kapal haok, trực thăng haong dom janih karei karei mai meng 24 taneh ia hu daong ka bruk padam pui di Hy Lạp. Tui yaok pataom, jaik 100.000 ha glai haong taneh ngak nong njauk pui mbang abih dalam oh ka tal 2 adit./.

Urang lang: M.Phuong -14/8/2021