Vac xin hu ngak tabiak dalam negar hu klauk iek angaok 3 urang 

Rajaei brei tabiak Sarak ka bruk daong trun yaom điện, trun jien điện mbang 2 ka urang pandar điện piah lang talaih kan kandah ka bruk ngak pandap, bruk ngak mbang pablei salih dalam tuk gaok kan kandah di jit Covid-19. Tui nan, trun 10% yaom pablei điện pandar meng tanut 1 tal tanut 4; trun taong abih jien điện brei ka dom labik hu pandar piah ngak labik brei daok karei, labik iek ruak ka dom urang mboh yau njom ruak, ka urang njom Covid-19; trun 20% jien điện ka dom labik y tế hu mek ngak labik dut iek, taong ruak ka urang mboh yau njom saong urang njom Covid-19… Tukvak daong trun yaom điện saong trun jien điện lac 3 bilan, bilan 10, 11, 12/2020.

Mintri Y tế brei thau kuhria tal bier harei 17/12 hu gac 2 urang njom Covid-19, hu brei daok karei chip hadei di tuk tame negar di tỉnh Bạc Liêu saong Phú Yên. Tui nan, abih tih urang njom Covid-19 di urak ni lac 1.407, dalam nan 1.263 urang thit ruak. 3 urang camriep hu klauk iek vaccine Nanocovax di dah page harei 17/12 daok hu tui iek prein yava dalam 1 harei dahlau di tuk klauk ka kapul urang halain hatain daok veik.

Mbang par di Vietnam Airlines ba 310 urang Việt Nam meng Đức – negar daok dalam mbang pacang cakak catang kayua jit praong Covid-19 mbang ka 2 – mai veik taneh ia hu par trun di mblang kapal haoh Vân Đồn (Quảng Ninh) tuk mesup ini 18/12. Tuai angaok sruh kapal haoh nan hu uraniah umo ala 18 thun, anek saih, SV bac salah blaoh danak dak bac, urang taha saong dom urang gaok biak kan kandah karei karei. Dalam tuk jit ruak ngak ka bruk nao mai gaok kan kandah, dom jabat lambaok Việt Nam samar pambuak bruk, daong palagaih ka urang Việt Nam mai veik taneh ia hu siam mekre, salamat.

UBND huyện đảo Phú Quý (Bình Thuận) brei thau: tal maong 8 dah page 18/12 daong hu gac ka sa urang di gilai kram, tui nan dom urang hu daong di  gilai Xin Hongnjauk karam lac 11 urang. Kapul daong duah manuac jeng duah mboh 2 rup tau saong daok samar peih bruk duah dom urang daok lahik. Dalam harei ni, dom urang di gilai hu ba tame pulao Phú Quý tui iek prein yava saong pacang caga jit Covid-19 tui adat.

Mesup 18/12, VKSND TPHCM hu panuac caong HĐXX kaoh duas urang dahlau daih ngak akaok mintri GTVT Đinh La Thăng meng 10-11 thun guk ka duas ngak sduan bruk khik iek, ba pandar drap ar karja ngak brei khat lahik, palai pajoa. Ong Thăng daok njauk 30 thun guk dalam 2 bruk ngak suan di Tổng Cty CP ngak menyek Việt Nam, Tập đoàn Dầu khí Việt Nam saong Gilang pariak TMCP Đại Dương. Ong Nguyễn Hồng Trường, dahlau daih ngak Thứ trưởng GTVT meda njauk meng 6-7 thun guk. Daok ong Đinh Ngọc Hệ , dahlau daih ngak thượng tá quân đội  meda njauk guk tal luac rai.

Ủy ban châu Âu brei thau, dom negar dalam Liên minh châu Âu meda peih bruk klauk vắc-xin pacang caga Covid-19 ka bhap bini meng harei 27/12 anak tal. Adat di bruk klauk jru vắc-xin meda hu Ủy ban châu Âu mbaoh tangin brei tabiak. Jalan ba tabiak lac daong khik dom urang labaih 80 thun ahalau di abih, jeng yau dom urang daok diuk saong daok ngak bruk di dom trại dưỡng lão paih daong khik dom urang mbuan njauk ruak kik di abih.

Thái Lan brei pacadu bruk mai ravang me-in ka dom tuai meng 56 taneh ia dalam kham merat jhuk gah du lịch daok gaok kan kandah kayua jit Covid-19. Tuai mai meng dom taneh ia yau Australia, Pháp, Mỹ…meda mai ravang me-in bo oh cang hu visa min brei hu harak lac oh njom  Covid-19 dalam 72 mon dahlau di tuk tagok jalan saong hu labik brei daok karei di hotel. Tuai njauk brei daok pa-atah dalam 2 adit, hu dui atah visa tal 45 harei. Bruk pacang brei takik tame negar di Thái Lan hu daong ka taneh ia pasang iek hu siam jit Covid-19 min ngak brei khat lahik praong gah ngak mbang, kinh tế.

55 radaih tải saong 11 xe pajeng tuai ginuh gauk ba tal bala dui atah 1 km 6 di jalan cao tốc liên bang 80 di bang Pennsylvania – Mỹ ngak ka takik di nyu 2 urang metai. Gah jakar oh brei thau makna ba tal bala njauk lac kayua langik tasik halei oh, min ieu kakei bhap bini daok dalam sang oh tabiak jalan mayah oh hu bruk hagait. Mbang ribuk ia khar praong abih dalam dom thun tapa tuh trun meng bang Bắc Carolina tal Maine, daok ngak gar jalan mbak nao mai di rilo labik saong ngak ka labaih 1.300 mbang par njauk brei padeih par. Dom bang hu ba tabiak bruk samar drak./.

Urang lang: Thu Thảo -Mousaphuong-18/12- 19:00:00