Jit ruak Covid-19 rah tabiak srau kadau ngak kan kandah biak praong tal jalan metro ka 1 (Bến Thành – Suối Tiên) di TPHCM

Mintri Y tế brei thau: tui bruk roh duah, ngak iek samar yau urak ini, meda lac tal bilan 5/2021, dom janih vắc-xin Covid-19 kayua Việt Nam ngak meda hu ba tabiak klauk rilo ka bhap bini. Jeng tui Mintri Y tế, hadei di labaih 2 adit tamuh veik, tal urak ini jit Covid-19 daok pasang iek hu di 12/13 tỉnh, ban. Bruk di Hải Dương jeng daok kan kandah, meda dui atah tuk dom urang ruak oh ka trun takik, abih di nyu lac di huyện Cẩm Giàng ngan saong labik ngak kong hu biak rilo urang ngak.

Jit ruak Covid-19 rah tabiak srau kadau ngak kan kandah biak praong tal jalan metro ka 1 (Bến Thành – Suối Tiên) di TPHCM, tui kuhria brei kadun tuk vak peih pajeng tuai tapa thun 2022. Dalam thun 2021, MBan khik ramik jalan pasei đô thị ban raya HCM hu ngak salah bloh harak gar brei thau yaom ODA kandong veik meng kadung jien Trung ương; ngak salah bruk mbaoh tangin tame harak mesraiy phun jien ka 4; peih iek labik angaok glong Long Bình – Bình Thái, pamong tal bruk peih iek tong abih song peih bruk pajeng tuai dalam thun 2022. Urak ni, jalan metro ka 1 (Bến Thành – Suối Tiên) hu ngak salah 82% bruk ngak.

UBND tỉnh Bình Thuận hu harak payua Mintri Công thương, Tập đoàn Điện lực Việt Nam, Pasak rami ramik jalan điện negar, caong brei khik ramik halau ia pabak ka bruk ngak nong saong ia pandar bilan pandiak thun 2021 di Đức Linh, Tánh Linh. 2 palei ini daok dalam bhum kraong La Ngà, ia piah pala drak saong piah pandar dalam bilan pandiak mai meng bruk peih jamriak phát điện pambuak haong ia mai meng thủy điện Hàm Thuận – Đa Mi. Min ia saong tukvak peih jamriak di thủy điện dalam bilan 1/2021 biak takik duk saong bruk pandar ia bo palei hu tut angan blaoh. Urak ini, di Tánh Linh haong Đức Linh hu labaih 1.000 ha padai daok kurang ia pruh.

Harei18/2, UBND tỉnh Kiên Giang hu pasang iek bruk glut jaleih jalanar pacang Quốc phòng di huyện An Minh. Tui sở ngak nong song patagok palei pala tỉnh, takai tasik An Biên - An Minh atah abih tih labaih 70km, dalam nan hu labaih 50km njauk glut jaleih. Tỉnh hu samar drah brei thau bruk glut jaleih takai tasik, ar tasik song rabha phun jien chip, peih bruk pasiam veik labaih 27km ar pacang. Urak ni dalam tỉnh dok 23,2km ar njauk glut jaleih oh ka pasiam. UBND tỉnh njauk hatai pandar phun jien 150 tỷ đồng hu Trung ương dong piah samar langyah song pasiam veik.

UB bhap bini tỉnh Điện Biên brei padeih bruk peih harai pataom Hoa Ban thun 2021. Ini lac bruk hu peih ngak yaok thun di ban sit Điện Biên Phủ, ngan saong rilo bruk ilamu, thể thao, ravang me-in, ndung bak ilamu dom bangsa dalam. Min kayua jit ruak Covid-19 rah tabiak srau kadau, piah ngak siam bruk pacang caga jit, Điện Biên oh peih harei pataom Hoa Ban 2021 haong harei pataom ilamu Thể thao Du lịch tỉnh mbang ka VII.

Kuhria tal harei 18/2, tong abih urang metai kayua Covid-19 di châu Phi tagok 100.000 urang. Bruk ni tok samu sa binah urang njom di châu lục khác yau châu Âu atau Bắc Mỹ, min, bruk njauk duh hatai lac bruk njom mbak samar ngak ka dom sang iek ruak oh daok labik brei ka menuac ruak. Urang metai dok tagok samar di grauk labik dalam châu Phi, abih di nyu nan labik gah merong song Nam Phi (labik meblah jiak sa meteh urang njom di abih bhum taneh ni). Urak ni, urang metai dalam dom urang njom Covid-19 di châu Phi lac 2,6%, glong jang dut song tanut 2,3% di dunya.

Kanja Nga brei thau, meda peih bruk klauk iek vắc-xin pacang caga Covid-19 Spút-níc Vê janih njoh tame dhung tui 3 tukvak di ban ine Mát-xcơ-va. Bruk patagok vắc-xin janih njoh tame dhung hu daong patagok bruk pacang jit di dhung haong tarakaong. Jru ini oh salih ka bruk klauk jru pacang, min hu peih ngak piah daong pabak. Tui Mintri Y tế Nga, tal urak ini hu 600.000 menuac di ban ine hu klauk jru pacang caga.

Dalam sa kham merat pacang cakak bruk njom mbak di Covid-19 dalam bhap bini, Hong Kong (Trung Quốc) hu peih bruk klauk vắc-xin Covid-19 ka dom urang njauk klauk dahlau di harei 26/2 anak tal. Hu 24 pasak klauk jru pandar vaccine di hãng BioNTech (Đức), dalam tuk 5 labik karei hu pabak vaccine di công ty Sinovac (Trung Quốc). Ni lac 2 janih vaccine hu labik ni brei adat pandar chip./.

Urang lang: M. Phương – Hani Pha – 20/02 08:06:37