Tổng cục Yoak pataom, Mentri Kế hoạch saong Đầu tư brei peih bruk pataom iek gah kinh tế di taneh ia

Harak pathau khan di Mban tacei jalan pakat negar pacang caga jit Covid-19 brei thau kuhria meng 18 tuk harei 28/2 mbiah 6 tuk harei 1/3, Viet Nam oh hu urang halei birau njom ruak. Dalam negar  urak ini hu 2.448 urang ruak, dalam nan hu 1.542 mbang urang ruak Covid-19 njom mbak dalam taneh ia, ta-eng Hải Dương hu 665 urang. 10 tỉnh, ban hu tapa 16 harei oh hu thei birau njom ruak, dalam nan hu Ban raya HCM. Mentri Y tế  jeng hu tacei pato bhap bini piah diuk rai hu salamat saong jit Covid-19, njauk brei ngak siam 5 paka: Cuk pataik pacang  pabah; ngak hacah meng jru khử khuẩn; brei pa-atah di gauk; oh pataom rilo manuac; Khan brei thau gah y tế.

Mintri Y tế daok pambuak bruk haong abih dom kapul piah peih bruk klauk jru vaccine Covid-19 praong abih di dalam negar, tui kuhria klauk labaih 100 triệu mbang dalam thun 2021. Pambuak tal bruk labaih 117.000 mbang vaccine AstraZeneca bahrau hu blei mai Việt Nam, akaok mintri Y tế Nguyễn Thanh Long brei thau, mintri Y tế daok gam haong intri pandap mbang saong jru tavao Hàn Quốc taong yaom bruk taong ruak di taong abih vacxin bahrau ngak blaoh ni. Kayua yau nan ye, tukvak klauk jru meda suai jang dut saong kuhria dahlau (lac di akaok bilan 3) piah khik siam salamat di abih saong siam lagaih di bruk klauk vaccine ngan haong bhap bini. Tapa pasang iek tal urak ni brei mboh, vaccine AstraZeneca daong khik caga biak siam, hadei di klauk mbang ka 1 mek hu prein taong ruak 76%, hadei di klauk mbang ka 2 lac 81%. Bruk njauk ndem nan lac, taong abih urang hu klauk vaccine ni oh tamuh ruak trak jang. 

Meng harei ini 1/3, Tổng cục Yoak pataom, Mentri Kế hoạch saong Đầu tư brei peih bruk pataom iek gah kinh tế di taneh ia. Tui kuhria, brei thau di bilan 12. 2021 saong brei thau bruk ngak hu di quý II thun 2022. Tapa bruk pasang iek nan, daong ka Đảng saong Karja mboh hu bruk kinh tế abih gah dalam taneh ia;  thau hu bruk kinh tế jeng yau bruk di yaok gah, yaok bhum palei piah meng nan tacei tabiak dom bruk hu lagaih, kein laba njauk patagok; thau ka dom bruk tavak tavaiy, kan kandah njauk brei kham merat yam tapa; abih di nyu lac ba tabiak hu dom sarak, jalan racei ba tame ngak piah cak rok patagok  kinh tế samar, khang kajap.

Cục Cảnh sát hình sự mintri Công an bahrau pambuak haong dom kapul pagam tal, Công an huyện Thanh Trì, Hà Nội, jabat hình sự Công an tỉnh Cao Bằng taong tayah sa kapul pablei salih anek kuman biak praong, daok di rilo tinh, ban di dalam negar. Jabat công an daong hu 4 anek kaman angaok jalan njauk urang ba nao pablei tapa Trung Quốc; cap khik saong mboh hu 4 urang amaik pablei anek; sa amaik daok metain hu 8 bilan. Langiu di nan daok mboh hu 2 urang amaik jaik manek karei hu ba tapa Trung Quốc.   Ni lac jalan pablei salih anek kaman biak praong, hu bruk pambuak gauk di rilo urang dalam saong langiu negar. Cục cảnh sát hình sự hu tui iek dom bruk ngak di kol ni dalam sa tukvak suai lavik dahlau di nan. Urak ni, bruk ni daok hu peih praong piah duah thau.

Melam kabroi 28/2, sa mbang khuah praong rahtabiak di ấp 4, xã Tân Lập, huyện Đồng Phú, tỉnh Bình Phước. apui khuah dalam bien baoh kayau, jaik haong labik công nghiệp Hà Mỵ, ngak palai pajoa abih labaih 10.000 mét vuông bien baoh kayau dalam nan hu baoh durien, panat, chôm chôm… pala hu 4 thun di sang bein nan. Kayua bein hu daning vil tamdar glaong labaih 3 mét, po bien oh hu mbaok di nan, nan ye bruk padam pui gaok rilo kan kandah. Hadei di jaik 1 maong, pui khuah meng padam hu abih.

Rajaei Đức hu ba tỉnh Moselle di bhum Đông Bắc di France, jaik taphia jalan tapen negar haong Đức tame angan kareik pambang saong patakik nao mai meng harei 2/3 kayua huac bruk tamuh tabiak di biến thể virus Sars-CoV-2.  Bruk ni hu ba tabiak hadei di tuk tỉnh Moselle tamuh tabiak khang dalam dom adit tapa dom urang njom Covid-19 pambuak tal dom biến thể virus Sars-CoV-2, abih di nyu nan lac biến thể meng Nam Phi, njom mbak khang jang saong pacang veik vắc-xin Covid-19 glaong jang. Tui jabat y tế France, urak ni hu tal 60% dom urang njom di tỉnh Moselle lac kayua biến thể virus meng Nam Phi.

Tổng thống Mỹ dahlau dieh ong Donald Trump harei 28/02 hu kadha vak brei thau di harei puac abih di mbang ginum biai bruk ngak chính trị bảo thủ (CPAC). Ni lac kadha brei thau camriep di ong Trump meng di tuk padeih bruk. Dalam panuac brei thau di drei, ong Trump  lac dalam jalan bo ong saong dom urang pachreih tui di drei atah di ni 4 thun meda daok saui damai meng tamat gam tui di nan jeng ndem tal bruk meda tabiak pilih ruah di thun 2024.Ong Trump jeng hu chỉ trích dom sarak di Tổng thống Dân chủ Joe Biden dalam dom asal kadha dalam nan hu sarak brei menuac tame negar.

Yam tapa rilo urang pacacah mai meng 15 bang di Đức, muk Anja Kallenbach – umo 33 thun, lac amaik di 2 anek – harei kabroi (28/2) hu jeng hoa hậu Đức thun 2021. Ni lac mbang ka 2, urang kumei umo rilo saong hu pasang blaoh, mek hu tanut glaong abih dalam pacacah hoa hậu Đức. Ngan haong asal kadha “pok manyaom dom urang kumei naih ghieh”, meng thun 2020, dom kapul peih bruk pacacah hoa hậu Đức hu salih rilo adat ka bruk peih danak dak yau peih praong umo ka urang pacacah hu mbaok tame tal 39 thun, saong brei urang hu pasang tame pacacah. 

Urang lang: Thu Thảo – Ái Nghiêm – 01/03 10:58:03