Sruh kapar haoh pajeng pandap panda meng Hà Nội par trun mnlang kapar ahaoh Đồng Hới

Mintri Y tế hu panuac kakei pacang caga jit bilan hajan ia sua. Tui nan, dalam song hadei di hajan ia sua, anek athur metai, hareik, nerak tathuak… tui jalan ia ngak nerak môi trường, mbuan hu jit ruak pandiak tabiak drah, pandiak dom song dom ruak jalan tung pruac yau tả, thương hàn, meriak meta .v.v… Kayua yau nan ye, bhap bini njauk pacang caga jit, blei saong ngak pandap hacih saat, mbang pandap mbang tasak song ia tasak, bhian rao tangin song sabon. Taphia di nan peih ngak tui jalan lac ia trun tal halei puh ramik tal nan, pataom mek, langyah chip ba nao dar anek athur metai tui tacei pato di urang jakar y tế.

Sa sruh kapar haoh pajeng pandap panda meng Hà Nội par trun mnlang kapar ahaoh Đồng Hới. Hadei di nan, kapul Chữ thập đỏ tỉnh Quảng Bình hu ba pandap nao tal labik bhap bini bhum ia sua daok caong khin. Dom pandap ini, lac di Chữ thập đỏ VN pakat negar daong brei, hu yaom abih tih jaik 1,5 tỉ đồng, hu 400 thùng pandap pandar dalam sang, 300 pa-op tapung halang ia, 300 paok pandap mbang, yaom abih tih labaih 900 triệu đồng saong 500 triệu đồng jien mbaok. Pandap daong ni meda hu samar drak payua tal bhap bini dalam bhum ia sua di Quảng Bình, rilo abih lac dua bhum “pasak ia sua” di huyện Lệ Thủy saong huyện Quảng Ninh.

Harei kabroi, gah dong duah urang gaok bala di Công an tỉnh Thừa Thiên Huế daok mek canô, kapal prong nduac cagar danao thủy điện Hương Điền tagok thủy điện Rào Trăng 3, ba brah, ia hacih, njam patam, xăng menyek song urang ngak daong peih jalan meng thủy điện Rào Trăng 4 tagok thủy điện Rào Trăng 3. Dua jamriak njuk ia biak khang hu ba tal labik glut jaleih, piah pruh ka nyu seik tal patau, haluk angaok mbaok piah duah urang lahik. Jalan ngak ni hu dong patrun pren menuac dalam tuk cang jamriak di jalan roya 71 urak ni oh ka mai tal. Sở jalan mbak pajeng ba tỉnh Thừa Thiên Huế brei thau hu ba 5 radeih múc song 6 urang peih radeih nao tui jalan roya 71. Tui yaok pataom, angaok jalan roya 71 hu tal 40 labik glut jaleih trak.

Đài khí tượng thủy văn bhum Nam Bô mboh lac, langik di Nam Bô saong di ban raya HCM harei ni (21/10) salih tapa jhak, hu hajan rahtabiak di abih dom tỉnh ban dalam bhum. Tui nan ribuk Saudel di Philippines daok tame bhum tasik Biển Đông saong jeng ribuk ka 8. Ribuk ni daok nao gah ia harei trun saong meda khang tagok. Bhum Nam Bộ gaok kan kandah trak dải hội tụ nhiệt đới gam saong ribuk ka 8, nan ye langik meda hu hajan rilo jang. Bier harei saong melam ni meda hu hajan di rilo labik, hu hajan khang saong hu hangin, dalam hangin caga hu rabuk , cakala.

Meng harei 17 - 20.10, hu dom mbang ia ndik akaok bilan 9 tui saka ia bilan tagok glong ngak ka rilo labik dalam ban saong puk palei tapen bhum taneran krong CL ia dauk trak. Di ban Cần Thơ song dom tỉnh: Vĩnh Long, Hậu Giang, Sóc Trăng, Cà Mau..., ia dauk ngak ka rai duik di bhap bini srau kadau, bruk nao mai kan kandah; bruk pablei salih jang yau bruk ngak nong khat lahik trak. Min, tui Viện roh duah biến đổi khí hậu (sang bac ĐH Cần Thơ), pandiak bhang, ia njom mbak khang yau bilan thu thun 2019 meda hu veik. Bhap bini jhui mboh ia dauk rilo bo oh caik hatai sangka, brei caga ia piah pandar saong piah pruh ka phun pala.

Mintri Công thương Nga bahrau ni brei thau, bruk ngak vắc-xin Sput-níc Vê pacang caga Covid-19 di negar ni meda thu rilo jang 5 mbang, tagok tal 1,5 triệu mbang tal bilan 12 anak tal. Nga lac negar camriep abih di dunya brei tabiak janih vắc-xin Covid-19 hu angan ieu lac Sput-níc Vê. Vắc-xin nni hu brei mboh cambaih laih dom siam lagaih saong salamat ngan saong yaok ribau urang halan hatian ngak iek. Mintri Công thương Nga jeng brei thau, negar ni urak ni daok ba tabiak jalan ngak suai lavik ka bruk ngak tabiak vắc-xin Sputnik-V yau haong 15 triệu mbang yaok bilan di akaok thun hadei.

Thủ tướng Anh Boris Johnson hu tabiak bruk brei ba cảnh báo tagok tanut glong di abih ngan saong jiak 3 triệu rahra daok di bhum Manchester gah brak, hadei di tuk negar Anh hu dom urang ruak song metai kayua Covid-19 prong di abih kuhria meng rilo bilan tapa. Yaom lac jalan ngak ni gaok bruk oh njauk hatai di dom karja pak ni kayua khat lahik kinh tế biak prong, saong bruk karja Anh kurang dom jalan dong brei jien ndua, min Thủ tướng Anh brei thau, nan lac jalan ngak, oh hu jalan halei karei piah klah bruk pacang cakak dalam negar.

Liên minh châu Âu daok pasang iek duah thau dom bruk pambuak tal panuac lac jalan langyah di mạng ba tagok thaot binguk saong video Instagram nyu mblo tabiak thông tin saong dữ liệu pambuak tal labaih 5 triệu urang pandar ala 18 tuổi. Bruk ngak ni rahtabiak hadei tuk sa panuac ndem di sa urang roh duah dữ liệu Mỹ David Stier brei thau, Instagram hu brei mboh cambaih địa chỉ email saong số điện thoại di ranaih ka oh thành niên. Tui hukum khik dữ liệu biak catang di châu Âu, công ty praong abih di Instagram lac Facebook meda dang anak bruk taong phat jien glaong abih tal 4% jien mek tame yaok thun – samu saong 2,8 tỷ USD./.

Urang lang: Hani Pha – Thu Thảo – 21/10 15:40:34