Urang negar langiu tame Viet Nam oh brei  dok karei 

Mintri Y tế hu tabiak harak ka bruk pacang caga COVID-19 ngan haong menuac tame meng negar langiu, hu ba tabiak pandar meng harei 1-1-2022. Tui nan, menuac klauk ginup vắc xin brei daok karei di sang 3 harei, menuac oh ka klauk atau klauk oh ka ginup ye brei daok karei 7 harei.. bruk oh kurang hu di menuac tame negar lac brei hu harak dut iek mboh lac âm tính haong SARS-CoV-2 dahlau di tuk tame negar (oh kuhria uraniah umo mala 2 thun).

Sở Lao động-Thương binh saong Xã hội hu ieu kakei UBND Ban raya Hồ Chí Minh brei peih viek bruk daong ka labaih 1 triệu 4 rituh bhap bini njauk kan kandah kayua jit COVID-19 di 3 mbang, mbang biyar jien dui atah tal abih harei 31/12. Dom urang hu dui tukvak daong tal luac harei 31/12/2021 lac dom urang ngak bruk tự do njauk lahik bruk kayua njauk kan kadha di jit praong COVID-19 tui sarak daong di ban raya dalam mbang 1 saong mbang 2; dom sang kathaot, sang jaik kathaot, sang ngak bruk gaok kan kandah hu brei angan min ka oh taduan hu jien daong di mbang ka 2; urang biak kan kandah kayua jit COVID-19 hu brei tame angan min ka oh taduan jien daong di mbang ka 3.

TS.BS Trần Quang Hiền – Yam ndok Sở Y tế tỉnh An Giang brei thau, Sở hu padang ngak blaoh bruk caga klauk pabak saong klauk veik ka menuac hu klauk ginup blaoh. Tui kuhria, adit hadei meda peih bruk klauk ka rahra. An Giang hu panuac caong daong 1,4 triệu mbang vắc xin COVID-19 piah klauk pabak saong klauk veik ka urang umo meng 18 thun tagok. Dalam nan, jaik 500.000 urang caong klauk pabak kayua hu ruak dahlau dalam rup, trun prein pacang ruak hu brei klauk dahlau. Dom menuac daok veik hu klauk dalam bilan 1-2022.

Dah page 17/12, 4 công ty njauk to yaom 4 lô taneh di labik chức năng ka 3, klabik đô thị bahrau Thủ Thiêm di var to yaom harei 10/12 hu ngak salah bruk mbaoh tangin tame harak blei 4 lô taneh nan haong dom jabat chức năng di ban raya HCM. Kayua yau nan ye, dalam tukvak 5 harei ngak bruk meng di harei njauk to yaom, urang njauk to yaom hu mbaoh tangin tame bruk pablei salih drap ar tui njauk adat. Dalam tuk mayah bruk pablei salih drap ar hadei di tuk to yaom rahtabiak njauk tui harak, siam lagaih, kadung jien kanja ban raya meda pataom mek hu paok jien lac 37.346 tỉ đồng blei 4 lô taneh meng dom công ty dalam labaih 100 harei hadei di harei to yaom.

Duh ka Tết thun sak ramaong 2022, urang nong tỉnh Bến Tre daok pala, daok iek glang labaih 10 rabau bingu kiểng dom janih; trun jaik meteh duk saong dom thun dahlau. Abih di nyu lac di huyện Chợ Lách hu jaik 3 triệu yot bingu that, pablei di darak pasar Tết dom labik. Yaom lac taneh pala bingu kiểng duh ka Tết di tỉnh Bến Tre thun ini trun daok takik kayua jit ruak Covid-19 tamuh praong, min bingu kiểng Tết di tỉnh ini meda gaok kan kandah dalam bruk pablei tabiak. Karja saong dom gah chức năng di tỉnh daok duah labik pablei ka bingu kiểng.

Rilo taneh ia di dunya jeng daok ngak catang dom bruk pasang iek jit tamuh gilac viek. Dom urang ngak praong Đức ieu kakei bhap bini trun abih dom bruk pataom rilo manuac dalam mbang raok Giáng sinh anak tal. hadei di 1 tukvak peih tabiak sarak "Diuk haong Covid-19", Rajaei Hàn Quốc jeng hu brei adat pandar peih ngak dom bruk paatah di gauk dalam 1 bilan mateh, camriep meng harei ini 18/12 piah pacang caga haong dom urang njom ruak daok tagok glaong di taneh ia ini. Rajaei Nhật Bản brei thau meda peih bruk pabak harak adat klauk vắc-xin caga Covid-19 meng harei 20/12. 

Urang njauk Covid-19 njom Omicron dalam taneh ia camereip abih di Trung Quốc hu khan brei thau di harei kabroi 16/12 di ban Quảng Châu. Ini lac urang ruak hu gam tal urang tame negar njom anek ruak ini bahrau hu mboh dom harei dahlau di nan.Dom urang ilamu ndom lac, meda hu hagait nan oh ka lagaih dalam pacang caga, kayua 2 urang ini oh taom gaok gauk, atau kayua virus hu prein njaom mbak biak khang ngak ka do labik hu menuac ruak nao tapa jeng hu virus daok veik. Virus jeng meda par dalam không khí atau njaom mbak menuac urang tapa nerak atau dom pandap pandar karei./.

Urang lang: Thu Thảo - Mousaphuong -18/12