Mbang tapa ravang ini brei mboh Việt Nam biak iek praong, pambuak bruk abih gah saong jia tame gauk di dua taneh ia

Mon 6 melam 19/9 tui mon di Cuba, lac mon 6 mesup 20/9 tui mon di Việt Nam, bruk taduan raok ong Nguyễn Xuân Phúc - Akaok negar haong kapul urang lambaok pakat glaong di Đảng haong karja Việt Nam tapa ravang negar Cộng hòa Cuba hu peih tabiak praong prang tui adat glaong abih brei ka urang pan akaok taneh ia rah tabiak di ban ine La Habana, ala bruk tacei ba di Bí thư Thứ nhất Ban Chấp hành Trung ương Đảng Cộng sản Cuba, akaok negar Cộng hòa Cuba Miguel Díaz-Canel. Mbang tapa ravang ini brei mboh Việt Nam biak iek praong, khang hatai patui jalan caokrok, ngak brei dalam jang talei jum pataom adei sa-ai, pambuak bruk abih gah saong jia tame gauk di Đảng, karja haong bhap bini dua taneh ia. Tal urak ini, Cuba lac taneh ia camereip abih di bhum Mỹ Latinh-Caribe eng drei roh duah, ngak hu saong brei pandar chip 3 janih vaccine caga COVID-19 hu siam mekre, salamat. Cuba jeng lac taneh ia camereip abih di dunya brei klauk caga COVID-19 ka uranaih umo meng 2-18 thun.

Viện Vệ sinh dịch tễ Trung ương bahrau brei parabha 8 triệu mbang vaccine Vero Cell di Cty Sinopham Trung Quốc ka 25 tỉnh, ban dalam taneh ia. Ini lac mbang parabha vaccine ka 43 di Mintri Y tế. Hà Nội lac labik hu parabha brei rilo abih, hu 1 triệu 359 rabau mbang.

Tui yaok pataom di Mintri pato Megru, dom anek saih pakacah hu abih tih điểm pakacah tamat Trung học Phổ thông thun 2021 meng 27 điểm tagok meblah 4,7% dalam abih tih labaih 1 triệu anek saih pakacah. Dalam nan hu 69 adei laik hatai caong 1 min hu gam tame dom hatai caong karei,  61 adei oh gam tame hu hatai caong halei. Jeng tui yaok pataom, dalam 61 anek saih oh gam hu hatai caong halei, hu 60 adei tok hu 1 hatai caong, 1 adei hu 2 hatai caong. Dom anek saih pakacah hu meng 29 điểm meteh tagoklaik hatai caong jeng tut angan tame dom gah, dom sang bac hu bruk pilih ruah anek saih biak takik.

Harei 19/9, Sang bac ĐH Y Dược TP.HCM pambuak bruk haong Pasak halan hatian brei darah ngak pahla TP hu peih danak dak halan hatian brei darah ngak pahla thun 2021 tui jalan "Tanjaoh darah klah rabha – hatai anit bilan jit".  Danak dak taduan hu bruk pachreih tui di dom doanh nghiệp gam saong bruk hu mbaok di 255 urang, mek hu 255 đơn vị darah. Dom urang brei darah hu daong veik ka bruk pacang jit di sang iek ruak taong abih yaom jien alin brei menuac brei darah. Dahlau di nan, Sang bac ĐH Y Dược TP.HCM jeng hu pambuak bruk haong Sang iek ruak Truyền máu huyết học TP.HCM peih ngak danak dak brei darah ngak pahla di sang iek ruak saong di Pasak Hồi sức tích cực urang ruak COVID-19 caik di Sang iek ruak Quốc tế City, tapa nan mek hu  333 đơn vị darah meng dom urang jakar, urang ngak saong gauk gar urang ruak di sang iek ruak haong dom y bác sĩ daok taong ruak ka urang ruak COVID-19.

Harei 19/9, panuac khan meng Sở ngak nong saong patagok palei pala tỉnh Bình Phước brei thau, gah chức năng hu peih bruk klauk vắc xin caga ruak brei ka labaih 12.000 drei limo dalam tỉnh. Gam haong nan, peih bruk pruh jru pametai anek ruak di taong abih dom var ro raong limo, kubao. Bruk ini hu ngak chip hadei di tuk dalam huyện biên giới Lộc Ninh tamuh ruak laka klik angaok kubao, limo. Ruak nan lac ruak njom mbak kayua sa janih virrus dalam pajaih Poxviridae tamuh tabiak angaok kubao, limo. Virrus laka klik oh mbak tapa menuac, oh ngak brei menuac sia njom ruak hagait.

Dalam 24 mon tapa kuhria tal mesup ini, dunya hu gac 350.327 urang njom bahrau saong 5.718 urang metai bahrau. Tal urak ini, Mỹ jeng daok lac taneh ia gaok kan kandah abih kayua jit praong tuk hu abih tih 42.900.906 urang njauk ruak COVID-19, dalam nan hu 691.880 urang metai. Hadei Mỹ lac Kling haong Brazil.

Dalam tuk jit ruak COVID-19 di Kling daok ladam trun, taneh ia ini meda peih pabah mbang veik ka tuai negar lingiu, mbang camereip abih hadei di sa thun meteh.Tui dom urang ngak praong di Kling, 500.000 tuai negar lingiu camereip abih hu brei visa oh mek jien dalam kham merat dui tagok veik dom gah du lịch, hotel haong pajeng ba jalan kapal haoh, gaok kan kandah trak danak kayua jit praong COVID-19 kuhria meng bilan 3 thun bloh tuk New Delhi brei pacang veik taneh ia biak catang.

Harei 19/9/2021, sa sruh kapal haoh quân sự di Mỹ laik tuk daok par pasram di ban Lake Worth, bang Texas, ngak brei takik di abih 5 urang njauk rambus. 2 urang peih kapal haoh chat payong tabiak truh kapal haoh, 1 urang peih kapal haoh daok njauk rambus trak saong 1 urang daok veik biak trak, mbuan metai. Dom mbang khuah di labik kapal haok laik hu padam saong hu 6 baoh sang khut meng bala nan./.

Urang lang: M. Phương – 20/09 16:36:50