Pathau mikva saong taong abih gauk!

Di Tây Nguyên, taha palei lac angan hu bhap bini pok brei ka dom urang likei naih gheih, hu angan je piah dang tabiak langyah dom bruk di puk palei di adat cambat tanarakun, tacei pato puk palei khik ramik bruk tani tanat, cakrok patagok. Min jeng hu biak takik urang kumei yam tapa hu paga pacang ini, piah jeng urang kumei taha palei. Bruk thau hu rilo, hu angan je saong hatung hatian siam mekre , ngak ka abih menuac dalam puk palei iek praong, iek glaong.

Xã biên giới Ia Mơr, huyện Chư Prông bilan hajan ini jalan nao mai biak kan kandah. Meng pasak huyện nao tal xã jaik 30km min abih labaih 2h nao radaih u-oát. Jalan meng xã tame sang taha palei Ksor H’lâm di palei Krông dak kan nao jang. Min tuk kol dahlak ndom lac khin tame rivang taha H’lâm ye sa-ai Siu Kiôch, akaok kapul urang kumei xã Ia Mơr, chreih chrai ba jalan. Angaok jalan nao, tapa panuac khan di sa-ai Siu Kiôch,kol dahlak yau mboh di anak meta sa urang kumei akaok palei naih gheih, hu angan je, hatung hatian siam mekre, anit ka bhap bini: “Amuk biak siam hatung hatian, anit ka bhap bini, daong rilo ka bhap bini. Oh lac daong ka bhap bini palei Krông, bo 3 palei urang Jarai amauk jeng daong abih. Yau dahlak ini jeng ngak di  xã, nao jak ba mikva yau ye jak ba dom urang hu anek jhui palakhah anek tuk oh ka tal umo tui adat hukum, tuk camereip drei jak ba, urang ndom yau ini, lac yau daih, min drei kham merat jak ba. Rilo rilo mbang urang pang tui, tuk nan drei meng padeih.”

Taha palei Ksor H’lâm lac sa urang kumei rup sit sot min biak rap ar menuac sia, tuk halei jeng klao sambai. Thun ini amuk umo labaih 73 min daok khang kadang. Taduan tuai dalam sang bahrau ngak, taha H’lâm yaih lac, bahrau hu Bộ đội Binh đoàn 15 padang brei. Yaok pluh harak meyaom meng xã tal huyện, tỉnh saong trung ương hu tual di labik glaong dalam sang.Hu dom harak meyaom daok vak meluk taha palei H’lâm lac ong kayau sahneng lac taha palei urang likei, oh thei sahneng lac urang kumei ngak taha palei!

  Tapen cavan ia tea, taha H’lâm hadar veik, tuik umo bahrau 13 thun ye nao tui bộ đội ngak giao liên, ba công văn nao bloh mai ngak hậu cần, cáng thương binh, ba pandap mbang menyum, phao ndao, jru tavao ka bộ đội. Tuk nan, anai giao liên oh ka thau akhar haroh, min tuk salah bruk, gaok thei jeng nyim pato bac. Meng hadah hatai, oh suai livik, H’lâm vak hu angan di drei, angan palei drei, saong daok vak hu dom bruk bui sambai jeng yau bruk duh hatai dalam dom harei camereip nao ngak cách mạng.

Tal thun 1967, anai giao liên H’lâm hu ba tabiak gah brak bac haroh, bac chính trị, quân sự bloh mai veik palei Gia Lai di drei piah taong khamang. Hadei di 25 thun daok dalam bol bala, tal thun 1983 amuk padei hưu, mai veik palei Krông, daok jaik ceik glai, tapen baoh craoh Ia Mơr. Thun 1990, hadei di 7 thun daok haong bhap bini dalam palei, meng angan je, diukrai siam mekre, taha H’lâm hu pok ngak taha palei mbiah tal harei ini. Taha tuk halei jeng abih hatai dalam bruk ngak ka bhap bini puk palei:“Drei lac sa urang đảng, meyah oh ngak taha palei ye drei jeng hu trách nhiệm haong puk palei. Urak ini lac taha palei ye drei dak hu trách nhiệm jang. Hu bruk hagait jeng tal tangin drei, drei kham merat langyah ba brei siam. Pagap yau bruk meriak gauk, mesao gauk hagait nan drei jeng kham merat langyah.”

  Dalam luac 27 thun ngak taha palei, taha H’lâm tuk halei jeng sahneng duah jalan ngak ka palei Krông, piah xã Ia Mơr tabiak truh kan kathaot. Meng dom ilamu bac megru hu, taha kham merat tacei pato, daong ka mikva dalam palei pasiam bein, pala tangei, pala bei, raong limo, raong pabui, salih bahrau raidiuk. Meng jien bilan padeih hưu, taha patak pataom bloh brei ka urang ini nyim blei limo, brei ka urang daih nyim blei puh. Urang halei kan kandah biak, taha jeng daong abih. Daong rilo tal taha oh daok kanal lac daong ka hadom menuac, oh lac dalam Krông saoh bo daok hu daong ka dom palei jaik di nan. Dom bruk praong sit di palei, taha jeng dang tabiak langyah, dom bruk meriak gauk dalam palei hu taha langyah biak siam, suan – njauk biak cambaih laih. Dom bruk ngak bloh biak rilo, min taha H’lâm tuk halei jeng khiêm tốn, pabiar rup:“Hu bruk hagait ye drei pachreih ba bhap bini kham mertat ngak mbang, duah jien, raong glang. Di labik ini hu dua janih nan min. Dahlak oh karei hagait sa asar cuah di tasik praong, oh hu hagait piah ndom tal”

Ong Rơ Lan Chim, akaok UB bhap bini xã Ia Mơr brei thau, oh lac gah ngak mbang kinh tế, amuk taha palei H’lâm daok hu labik dang biak praong dalam bruk daong khik tani tanat an ninh trật tự di bhum biên giới ini. Meng thau rilo, meng angan je di drei, taha H’lâm hu daong karja tacei mikva jhui pang, jhui jia tui kol kanjah jhak. Nan ye xã biên giới Ia Mơr tuk halei jeng khik hu sron mbon, tani tanat:“Taha H’lâm rik daong biak rilo dalam bruk khik caga siam mekre, sron mbon puk palei. Tukvak tapa, taha pathau khanmikva jhui pang tui kol pacuh pajarak vượt biên suan hukum. Nan ye  xã Ia Mơr hu 5 palei biak siam, oh hu urang halei pang tui kol kanjah jhak nao vượt biên suan hukum. Dom mbang nyaom praong kol dahlak jeng hu da-a taha H’lâm piah tacei pato, pathau khan brei bhap bini thau cambaih jang ka jalan ngak di Đảng, hukum di karja saong cakrok jang gah kinh tế.”

  Yam tapa paga cang meng kan mai, taha H’lâm hu jeng sa dalam dom urang kumei taha palei biak takik mboh di Tây Nguyên. Akaok sahneng hadah hadai, angan je saong jalan diuk rai siam hatung hatai di urang kumei taha palei daok pambak praong dalam bhap bini, rik daong jhul patagok kinh tế  jeng ye khik tani tanat an ninh trật tự di bhum biên giới Ia Mơr./.