Ribuk ka 12 pambak praong tabiak dom tỉnh gah kreih negar song Bắc Trung bộ

Tui Mban tacei jalan pakat negar ka bruk pacang caga bala meng langik tasik, ribuk ka 12 ngak brei dua urang metai, sa urang lahik saong 5 urang njauk rambuac; labaih 310 sang bhap bini par tabung, jaleih, khut tayah; labaih 2.500 drei manuk metai, ia ba theik; labaih 2.400 ha padai, njam patam dauk dalam ia, bruk, metai. Mban tacei jalan pakat negar ka bruk pacang caga bala meng langik tasik iew dom palei brei peih tathuak ia caga bruk pala drak; samar pasiam veik dom khut khat hadei di ribuk ia sua, pasiam veik bruk pala drak, tani tanat raidiuk bhap bini.  

Harei kabroi, hajan ia sua meng ribuk ka 12 pambak praong tabiak dom tỉnh gah kreih negar song Bắc Trung bộ. Bruk dauk ia song glut jaleih taneh rah tabiak di dom tỉnh meng Quảng Ngãi tal Thừa Thiên Huế. Mon 2 meteh jala pandiak harei 11-11, jalan roya 40B labik nao tapa xã Trà Tân, huyện Bắc Trà My (Quảng Nam) rah tabiak bruk glut jaleih taneh lam lahik 1 urang dalam taneh song sa urang karei njauk rambuac. Dom jabat chức năng dok ieu pataom menuac, pandap panda piah duah urang gaok bala. Dalam tuk nan, labaih sa bilan tapa , kayua tasik riyak khang nan ye palao Bé, di huyện Lý Sơn oh nao mai hu, ba tal kurang pandap mbang menyum. Karja huyện Lý Sơn hu buh tabiak 1,5 tấn brah dong ka 100 boh sang.

Tui danak daka mbang nyaom ka 10 di Quốc hội, dự thảo Hukum khik caga alam moi truong pasiam veik meda hu brei yer tangin brei tapa di biar harei 11/11, yau nan min Quốc hội hu khan brei thau bruk ramik veik danak di mbang nyaom, brei kadun veik harei yer tangin brei tapa Hukum khik caga alam moi truong pasiam veik tal harei 17.11. Bruk kadun harei yer tangin brei tapa lac piah jabat ngak hukum, gah taong yaom patui bruk taduan panuac pato padar, ramik veik saong pasiam veik hukum nan.

Brei panuac tame tame dự thảo dom sarak pok tagok nyaom roya 13 di Đảng, TS. Nguyễn Duy Thụy - Ủy viên Hội đồng Lý luận Trung ương Đảng, Akaok Viện Khoa học xã hội bhum Tây Nguyên ndom lac, Dự thảo dom sarak nyaom roya mbang 13 di Đảng hu ngak tani tanat, tabiak meng bruk di anak meta saong meng lý luận. Dalam nan hu bruk patagok rai duik ka bhum bangsa takik. Abih di nyu nan lac dom bhum bangsa takik kan kandah.. Dom jalan ngak, hatai sahneng di Đảng ka bruk patagok rai duik ka bhum bangsa takik hu mong mboh, tong yaom dalam dom sarak di nyaom roya mbang 13 ni. Rik panuac tame ka dom bruk, jalan ngak piah patagok kinh tế xã hội, đối ngoại, an ninh quốc phòng ka bhum bangsa takik tuk vak anak tal, tui Tiến sĩ Nguyễn Duy Thuỵ sarak njauk ngak cambaih laih asar kadha salih bahrau siam lagaih ka yaok kapul menuac urang; Sa dalam dom jalan ngak salih bahrau biak prong saong mek hu kein laba kinh tế glong nan lac bruk ngak nong hữu cơ piah patrun kathaot ka bhum bangsa takik dok kan kandah.

Muk Trương Thị Mai, Ủy viên Mentri Chính trị, Bí thư Trung ương Đảng, Trưởng Ban dân vận Trung ương hu taom mbaok dom halau janeng agama lac urang di Quốc hội mbang XIV di page harei 11/ 11 di Hà Nội. Di var taom mbaok nan, dom halau janeng hu ndem meyai nao mai, brei thau ka bruk ngak tui dom sarak, jalan tacei ba di Đảng, hukum di Karja ka adat cambat tanarakun; rik daong di dom kapol agama dalm thun 2020. Taong yaom glaong bruk rik daong di dom agama, muk Trương Thị Mai lac: Hukum tín ngưỡng, agama hu Quốc hội brei tapa thun 2016, hu ba tame pandar meng thun 2018 lac bruk ngak hu siam abih di Quốc hội mbang XIV. Langiu di bruk ngak di dom jabat ngak hukum, daok hu bruk rik tame biak praong di dom halau janeng lac urang Quốc hội piah hu lagaih sang raidiuk, adat cambat, agama di bhap bini drei. Thun ini, dom gah dom agam, dom halau janeng ngak biak siam bruk pacang caga jit ruak Covid-19. Dom bruk pataom rilo manuac brei padeih, ngak tui dom jalan tacei ba di Đảng, Karja piah khik hu salamat ka bhap bini, urang tui agama.

Nga bahrau tabiak panuac brei thau vắcxin pacang Covid-19 Vê Sputnik V di negar ni siam hu tal 92%. Tui kadung jien buh tabiak ngak tapak di Nga, bruk ni hu batabiak meng ngak iek tuk vak ka 3 ngan song 16 ribau urang hu mbaok tame klauk abih 2 mbang vắcxin. Pathau khan ka bruk siam lagaih di vắcxin Sputnik V hu gah Nga batabiak  2 harei hadei di tuk hãng jru Pfizer di Mỹ song BioNTech hu jabat di Đức brei thau janih vắcxin pacang Covid-19 kayua 2 công ty ni pambuak gauk ngak hu siam lagaih tagok tal 90% dalam mbang ka 3 ngak iek angaok menuac.

Tui duah thau di Đại học John Hopkins, Mỹ urak ini hu 10 trieu 200 ribau urang njom Covid-19 saong urang metai tagok tal 240.000. Dalam harei 11/11, dalam taneh ia Mỹ tagok glaong abih lac 136.000 mbang urang njom ruak birau, tanut tagok glaong di abih kuhria meng tuk jit ruak tamuh di labik ini. Dalam tuk nan, urang tame sang iek ruak kayua Covid-19 jeng tagok 30% meng kaok bilan saong yam tapa tanut 60.000 dalam harei 11/11. Bruk nan ngak ka dom sang iek ruak di Mỹ dang anak bruk quá tải yau bruk hu rah tabiak dahlau diah.

Tổng thống Mỹ Donald Trump harei kabroi (11/11) hu mai rivang caik bingu di kubo di dom urang lin oh hu angan di labik taneh kubo pakat negar Arlington, bang Tếch-dát di tuk pahadar harei urang dahlau deih ngak bol lin. Ni lac mbang tabiak mbaok anak bhap bini camereip abih meng di tuk ong batabiak panuac lac hu bruk paleik saleik dalam bầu cử. Mbiah tal urak ni, Tổng thống Đô-nan Trăm jeng oh ka taduan lah, saong oh taduan bruk palih ruah nan hu ka ong Giô Bai-đân. Daok ong Giô Bai-đân di đảng Dân chủ, harei kabroi, ong song haduik di ong jeng hu nao caik bingu di rup patau pahadar bruk mesruh metak Triều Tiên di Phi-la-đen-phi-a./.

Urang lang: Ái Nghiêm – Hani Pha – 12/11 10:34:16