Pathua mikva saong taong abih gauk!

Dom thun jaik di ini, dak harei dak hu rilo mikva urang Bahnar di tỉnh Kon Tum ngak lakhah tui adat Et rok.  Ini lac bruk ngak likhah sit, abih takik jien padai, bo pataom hu ralo mikva adei sa-ai but pajaih. Hadei di ini, kol drei duah thau ka ndam likah Et rok di urang Bahnar daok di tỉnh Kon Tum tapa kadha vak di AmưZưt urang vak di rayo sap ndom Việt Nam dapok di bhum Tây Nguyên.        

Adat likah Et rok di urang Bahnar biak mbuan, oh ndok pandap likhah yau dom bangsa  takik karei karei daok di Tây Nguyên. Ndam likhah hu ngak tui jien ndo di 2 gah, tok hu alak, rilo menuk, rilo pabui. Saong likhah hu ngak sa mbang di sang gah likei atau gah kumei jeng hu. 

Piah ngak ndam likhah Et rok, gah likei saong gah kumei brei caga takik di abih 5 jeik alak, hu 5 angan ieu lac: jeik alak parui, jeik alak cô dâu chú rể, jeik alak taha palei, jeik alak dam dara, jeik alak tuai damuai. Saong tui jien ndo di sang likhah, meda ngak rilo sa atau dua drei pabui piah payak tuai saong brei ka tuai ba nao sang. Meyah sang hu jien ndo, mikva meda sik limo atau kubaopiah ngak likhah.  Meyah 2 gah jeng likei- kumei jeng lac sang kan kandah, likhah jeng hu ngak, kayua hu mikva, puk palei, but pajaih rik daong.

Tui amuk Pưk, daok di  Plei Don, phường Quang Trung, ban sit Kon Tum, tỉnh Kon Tum: tuk da-a tuai mbang menyum ye chú rể, cô dâu nao dahlau saong taong abih adei sa-ai dua gah but pajaih nao tui gah likuk.  Dom likei dam nao gah likuk chú rể, daok dom kumei dara nao gah likuk cô dâu.  Patui di nan lac gauk gar but pajaih dua gah sui gia.  Maik ame chú rể, cô dâu nao dahlau, taong abih gauk gar but pajaih duah gah jeng ba gauk nao Et rok.  Dom urang mai mbang ndam likhah yar glih alak, brei pandap ka dua diuk pasang bahrau, ba gauk ngak likhah “Et rok”. Amuk Pưk khan lac:

  “ ndam likhah et rok hu meng saman ong muk ong kei.  Dahlau daih, mai mbang likhah gauk gar 3 rai ye takik di abih brei hu gè rượu cần, drei menuk, daok but pajaih jaik di abih brei hu drei pabui. Meyah sang kan jeng brei hu sa drei menuk.  Min urak ini mbuan jang, sa klaok alak patih, sa baoh menuk tuh atau kẹo lac hu ye”.

Ndam likhah mbuan, sit min ndung bak bruk jum pataom gauk. Kayua yau nan ye, yaom lac mikva urang Bahnar daok di phường Quang Trung, ban sit Kon Tum, tinh Kon Tum, tui Thiên chúa giáo meng sa rituh thun ini mai, min ndam likhah Et rok jeng daok hu khik tamo.  Saong kayua urang Bahnar “oh hu họ”, piah plaih plaih bruk “Iok hơgăm” (lac tok diuk, taok pasang dalam ralo darah), ndam Et rok lac tuk piah ka mikva thau ka but pajaih, yaom lac nao ngak mbang atau daok di puk palei karei. Sa-ai Mari, daok di palei Plei Don, khan lac:

  “Adei sa-ai daok di palei atah hu taom gaok gauk rilo mbang min oh thau lac adei sa-ai but pajaih. Tuk mai mbang likhah Et rok meng thau gauk. Meng ong muk amaik ame hu patoa veik mbiah tal harei ini, drei jeng patoa veik ka anek taco harei ahdei, piah ngak ka adat cambat tanarakun mekre ini oh lihik nao, saong piah ka gauk gar but pajaih atah 4, 5 rai jeng thau gauk, mai rivang gauk, daong gauk tuk kan kandah jeng yau tuk ginup meda”.

Lac menuac roh duah ilamu meng kan saong thau cambaih ka adat cambat tanarakun di bangsa Bahnar, ong A Jar, daok di Plei Don, phường Quang Trung, ban sit Kon Tum, tỉnh Kon Tum, brei thau, ndam likhah Et rok dahlau daih tok hu dom palei gah pai ban sit Kon Tum yau Plei Don, Plei Tơngia... ngak.  Min dom thun jaik ini, dom palei di urang Bahnar daok di gah timur ban sit Kon Tum jeng ngak likhah tui Et rok.  Ong A Jar brei thau:

“kayua habar adat cambat ini daok hu khik ramik mbiah tal harei ini? Ka sa lac nyu ndung bak bruk jum pataom gauk, ka 2 lac abih takik jien ndo, lagaih haong raidiuk kan kandah di mikva drei. Meng ndam likhah et rok ini, mikva but pajaih 2 gah parui hu thau gauk , hu bruk hagait jeng daong gauk. Dahlak caong lac, adat Et rok ini tuk halei jeng hu mikva drei ngak tuk likhah”.

Ngan saong dom urang oh hu họ yau bangsa Bahnar, mikva biak kan thau adei sa-ai but pajaih meyah daok di palei atah gauk, takik taom gaok gauk, takik khan brei gauk thau, abih di nyu nan lac dom rairah anek taco.  Kayua yau nan ye, ndam likhah Et rok lac sa dalam dom labik piah brei anek taco thau gauk, thau ka but pajaih.  Ini jeng lac bruk jum pataom gauk, oh lac di duah gah sui gia, bo abih but pajaih dua gah jeng lac  “Rui ra” (adei sa-ai jaik).  Kayua yau nan ye bo adat likhah Et rok hu mikva  Bana iek praong, khik ramik, abih di nyu nan lac dalam raidiuk bahrau harei ini./.