Langik tasik bal raya Hồ Chí Minh dak harei dak pandiak tagok nan ye dalam dom doanh nghiệp, khuôn viên sang mac njauk hu ralo phun kayau hijao piah lọc không khí, pabak ôxy. Bruk pala phun hijao saong bingu pak labik ngak bruk hu daong ka labik ngak bruk hijao – hacih – mekre, ba chreih chrai saong patagok pren ngak bruk ka urang ngak. Piah daong ka urang ngak patrun stress, patagok năng suất lao động, ralo doanh nghiệp dalam bal raya  Hồ Chí Minh hu padang labik ngak bruk hijao – hacih – mekre.

       Kreh pandiak dom harei ini, Bal raya Hồ Chí Minh pandiak yau apui min di Công ty Cổ phần In ka 7 (dalam Tổng Công ty Văn hóa Sài Gòn, hu sang xưởng di Khu công nghiệp Tân Tạo, Bal raya Hồ Chí Minh) biak la-hơi bingi kayua hu biak ralo phun hijao saong bingu dalam mblang bein.

Pak ini, bingu saong phun hijao hu pala grauk labik meng langiu mblang, paga pacang tal gei kanjal, sang mbang... ngan haong ginup janih, ginup sambo nerak bingu luac thun. Oh lac yau nan saoh, công ty daok caik taneh piah padang ngak danao ikan prong saong pala biak ralo phun prong vin taom dhar, caik kik patau ka urang ngak daok hóng mát.

      Piah hu sambo màu hijao di labik ngak bruk, taong abih urang ngak di công ty tuk halei jeng khik ramik yaok dhal bingu, gha phun piah ngak jeng sa labik ngak bruk hijao – hacih – gheih mekre. Ong Trương Hoàng Tâm, Akaok Công đoàn Công ty Cổ phần In ka 7, khan lac công ty hu pah menuac mong iek phun saong ngak vệ sinh. Min piah ngak brei paglaong akaok saneng di urang ngak jeng yau klah rabha haong menuac ngak vệ sinh, yaok van page, dom công nhân ranaih salih gauk puh ramik saong dlul hala di mblang. Tal tuk ngak bruk, dalam công ty labik halei jeng hacih sa-at.

     Lingiu di nan, công ty daok caik sa labik piah njuk pakao. “Pachreih tui danak dak oh hu pakao hala di labik ngak bruk, Công đoàn công ty hu tabiak bruk saong pok meyaom dom công nhân klaak njuk pakao. Min ralo sa-ai jeng oh ka klaak njuk pakao hu. Tuk padeih kreih pandiak, padeih giải lao, dom sa-ai mai tal labik caik ka urang njuk pakao piah njuk bo oh huac pambak tal urang karei” - ong Tâm lac yau nan.

      Ralo urang ngak biak takre ngak bruk di công ty kayua lac lingiu di bruk sangka tal rai diuk, bruk ngak, bruk ma-in bui, giải trí, công ty daok hu dak padang sa môi trường laneng lanoi ngan haong ralo phun kayau hijao saong bingu hala.  Sang xưởng hu sap gap biak gheih mekre, tani tanat.

      Harei tabiak bruk “Harei adit hijao” kayua Công đoàn saong Đoàn Dam dara Công ty Cổ phần Dệt may Gia Định bahrau peih ngak di Công ty Cổ phần Bông Bạch Tuyết pak Khu công nghiệp Vĩnh Lộc, bal raya Hồ Chí Minh hu urang ngak pachreih tui biak ralo. Labaih 100 urang ngak hu mbaok tame bruk cakak tỉa phun, sơn mbong gha kayau, uak hacih bảng hiệu công ty, puh ramik sắt vụn di sang caik radaih, puh uak sang xưởng...

      Abih di nyu nan lac, ralo urang ngak biak takre tuk gam haong ban giám đốc hu mbaok pala phun pak công ty. Ala pandiak dah page, sa-ai Nguyễn Thị Tiên kham merat takac haluk pala phun anek saong pruh aia. “Yaok harei tame tabiak công ty, mong mboh dom phun kayau drei pala prong tgok ndaih dhal tabiak bingu, dahlak bui sambai ralo! Tuk halei phun hu bingu, dahlak jeng thaot binguk piah meyaih haong ayut sahabat di sang trọ” – sa-ai Tiên khan lac yau nan.

     Amuk Võ Thị Bích Thúy, Akaok Công ty Cổ phần Bông Bạch Tuyết, taong yaom: “Ini lac danak dak biak hu yaom glaong, oh lac paglaong hatai sahneng khik iek môi trường hacih mekre ka urang ngak bo daok rik daong pabak phun hijao ka công ty, patrun hiệu ứng nhà kính ka bal raya daok quá tải kayua hu ralo sang glaong tal, sang mac...”.

      Ong Phạm Văn Có, Akaok Công đoàn Công ty Cổ phần May Sài Gòn 3, brei thau, mai tal Công ty Cổ phần May Sài Gòn 3 (dalam Công ty Cổ phần Dệt may Gia Định; daok pak quận Thủ Đức, bal raya Hồ Chí Minh), tuai damuai biak takre anak phun cảnh vil taom dhal. Harei Tết, bingu mai, lộc vừng nerak bingu biak ralo sambo. Dom HAREI daok veik, bingu sứ ralo janih nerak pacoh. “Phun hijao, bingu oh lac tok pabak ôxy bo daok ba mai li-an bingi, patrun stress biak siam ka urang ngak”./.