Labikraong pabui pajaih di tỉnh Bà Rịa - Vũng Tàu

Mbang ruak jit tả pabui Châu Phi meng blaoh, sang ong Bùi Duy Hinh di xã Tân Bình, huyện Bắc Tân Uyên, tỉnh Bình Dương njauk khat lahik trak, njauk ba nao am cuh klaak yaok ribau drei pabui. Bahrau ini, ong Hinh kuhria raong gilac 300 drei pabui rilo, min yaom pabui pajaih biak glaong nan ye ong tok raong labaih 100 drei piah duah thau darak pasar. Dom drei pabui pajaih ini hu ong blei di dom labik raong pabui pajaih di Bắc Tân Uyên, yaom 2 triệu 300 ribau đồng yaok drei, glaong JANG dua mbang dut haong dahlau di tuk rah tabiak jit tả pabui Châu Phi. Ong Hinh brei thau: “Tapa mbang jit ruak meng blaoh ye takik rilo dahlak jeng hu ilamu piah pacang caga yau brei ka pabui mbang rilo jang dom chế phẩm sinh học piah daong paglaong pren pacang caga ruak ka tapul pabui. Meyah pandar  an toàn sinh học dalam raong glang saong tani tanat jang tuk raong glang ye dahlak saneng lac drei hu jak jeng”.

Kayua yaom pabui diuk daok di tanut glaong nan ye dom baoh sang raong glang di Đông Nam Bộ caong khin raong gilac veik. Yau nan min, yaom drei pajaih glaong, labik pablei takik nan ye rilo mikva daok huac oh khin raong. Di tỉnh Bình Dương, tal tuk vak ini, tapol pabui tok hu jaik 740.000 drei; di Bà Rịa –Vũng Tàu jaik 360.000 drei. Daok pasak raong pabui Đồng Nai, hu jaik 2 triệu 100 ribau drei pabui, tagok 500-600 ribau drei dut haong dahlau di tuk jit ruak. Min jit ruak jeng daok mbuan si tamuh nan ye gah thú y dom tỉnh Đồng Nam Bộ hu panuac kakei urang raong juai raong gilac rilo bo njauk caik hatai tal bruk khik siam an toàn sinh học ka tapul pabui.

Pak Đồng Nai, urang raong saong doanh nghiệp khin raong veik njauk brei ka karja puk palei saong gah chức năng thau. Tal urak ini, Đồng Nai hu 142 labik raong pabui hu tut angan raong gilac ngan haong labaih 220 ribau drei. Piah daong ka urang raong, gah thú y tỉnh Đồng Nai peih rilo mbang pathau khan ka dom jalan khik siam an toàn sinh học, pacang caga jit ruak. Ong Nguyễn Trường Giang, Phaok Chi cục trưởng, ngak gah Chi cục Raong glang – Thú y tỉnh Đồng Nai brei thau: Thun ini, khaol dahlak dak daok padang veik dom labik raong glang oh hu jit ruak di dom trang trại, palaghaih ka urang raong glang raong gilac ka nyu siam jang. Khaol dahlak daong ka urang raong glang padang ngak van ro pacang caga hu jit ruak saong daok peih ngak Bilan pametai anek ruak piah ngak hacih asal anek ruak di dom labik mbuan tamuh ruak glaong yau darak pasar, labik thik raih, raong glang…v.v…)

Gah thú y dom tỉnh Đông Nam Bộ jeng hu panuac kakei mikva njauk raong pataom sa labik, dalam trại kín, abih di nyu lac pabui pajaih brei thau cambaih asal di nyu mai meng halei. Ong Trần Hải Hà, Phaoak akaok Chi cục Chăn nuôi Thú y saong Thủy sản tỉnh Bình Dương brei thau: “Khaol dahlak tacei pato dom Balai Raong glang - Thú y tui iek bruk  raong gilac di bhap bani, tacei pato mikva dom jalan ngak piah pacang caga jit ruak, brei thau dom kadha piah hu raong gilac. Ngan haong dom trang trại, dom kapul pasang iek meda hu mong iek, tư vấn bruk njauk brei raong gilac atau cang tal tuk jit ruak padam trun”. 

Anek pajaih daok lac bruk kan kandah ka dom baoh sang raong pabui kayua lac urak ini, pabui PAJAIH daok kurang saong rilo meng lac pajaih klak,  năng suất biar. Ong Nguyễn Kim Đoán, Phaok Akaok Hiệp hội raong glang tỉnh Đồng Nai caong lac: “Jabat chức năng njauk daong pabak anek pajaih siam piah tapol pabui binai mek hu năng suất glaong, meng nan patagok bruk raong glang khang kajap jang, plaih bruk tapol pabui binai rilo min năng suất oh glaong”. 

       Piah ka bruk raong gilac tapol pabui hu siam mekre, langiu di jalan ngak khik siam an toàn sinh học ye dom jabat chức năng njauk hu dom sarak cakrok patagok tapol pabui pajaih siam, kayua ini lac kadha ba tal bruk cakrok patagok khang kajap di gah raong glang./.

Urang lang: Jasi-27/3