Tuk ngak brei urang ruak ta-aok brei caik akaok tagok glaong, mbleing tapa sa gah

Kadha bhian mboh tuk njauk jru mek pandap mbang lac pandik tian labik angaok pasak gam haong khin ta-aok, atau pandik tian labik gah ala pasak, pandik abih tian gam haong aih ia, hu labar, hu tuk hu gam darah saong pandiak. Langiu di nan, urang ruak meda parinh takai tangin kayua lahik ia saong chất điện giải. Mayah trak, urang njauk jru mek mbuan metai.

Tuk hu manuac mboh yau njauk jru mek pandap mbang, njauk ngak dom jalan taong ruak tuk camereip yau ni:

Dahlau di abih lac ngak ka urang ruak ta-aok tabiak, mayah urang nan oh eng drei ta-ol tabiak hu. Urang ruak ta-aok dak rilo dak siam, piah patakik jru mek njom tame darah tapa jalan tung pruac. Tuk ngak brei urang ruak ta-aok brei caik akaok tagok glaong, mbleing tapa sa gah. Bruk ngak ni piah plaih ia ta-aok nduac tame jalan suak yava, ngak trak jang  bruk njauk jru mek pandap mbang.

Hadei di nan, brei ka urang ruak manyum rilo ia. Dom janih ia manyum hu lac ia li-u, ia tathak caik laar, ia bu atau dung dịch oresol. Pabak ia piah daong hu ia veik dalam rup njauk lahik kayua aih traoh, ta-aok.

Puac di abih lac ieu radaih cấp cứu atau eng drei ba urang ruak nao tal labik y tế jaik di abih piah hu taong ruak samar drah.

Urang dalam sang njauk mek mẫu pandap mbang medil lac ba tal njauk jru mek, gam haong bi-ar tauk di pandap mbang piah ka dom chuyên gia y tế  dut iek duah tabiak makna ba tal njauk jru mek pandap mbang. Mayah rahtabiak bruk njauk jru mek rilo menuac, langiu di bruk ba dom urang ruak nao tal labik y tế taong ruak, drei njauk pathau khan ka jabat chức năng thau piah pacang cakak njauk jru mek pandap mbang rahtabiak praong.

Mbang manyum pandap oh siam, ngak ka bruk njauk jru mek pandap mbang tagok glaong. Kayua yau nan ye, bhap bini njauk caik hatai jang tuk pilih ruah pandap mbang, khik salamat ka drei haong gauk gar dalam sang./.

Urang lang: Thu Thảo – 18/03