Oh ka tuk halei, startup, padang mbang ngui hu caik hatai sangka ralo yau tukvak jaik di ini. Bruk ini di negar drei daok yau mùa xuân saong bak pren khang di umo ranaih. Ini lac dom kadha siam mekre dalam mùa xuân bahrau Đinh Dậu…

Daok angaok ar tapen mblang hamu padai hacih daok si tathak, dom phun mai kanjik katam rah tui jalan tame mblang hamu hadah tanjak uan raok thun bahrau, Võ Văn Tiếng brei thau dom kham merat di drei angaok jalan kan kandah piah ngak tabiak padai Nàng hoa 9 angan iew “Tâm Việt”: “Hatai caong di adei tantu hu jak jeng kayua nyu lac mô hình hacih, pacang khik môi trường. Dom urang jaik taphia mboh adei ngak lạ ralo, ngak padai bo oh pruh jru hóa học. Salih ka bruk pandar jru hóa học, adei pandar thiên địch piah pametai dom jit hại nan. Bruk ngak di adei piah padang angan je saong chất lượng.”.

Ngan haong kadha “Brah bingi meng haluk – Brah siam meng hatai”, Võ Văn Tiếng, umo 26 thun, daok pak xã Thường Thới Tiền, huyện Hồng Ngự, tỉnh Đồng Tháp padang mbang ngui meng bruk ngak karei jang urang. Nan lac ngak padai oh pandar khak drak, jru khik caga phun pala piah ngak tabiak asal brah hacih. Jalan ngak ini hu daong ka Tiếng mek hu giải Nhất mbang pakacah “Dự án khởi nghiệp” kayua Pasak Roh duah pablei salih saong daong ba doanh nghiệp saong Kadung jien Start-up Vietnam Foundation pambuak bruk peih tabiak.

TS. Nguyễn Thanh Mỹ, Chủ tịch Mỹ Lan Group, tỉnh Trà Vinh hu tukvak ngak bruk ka IBM, Sun Chemicals saong Kodak Polychome Graphics, hu 200 bằng phát minh, sáng chế jeng lac sa điển hình di bruk padang mbang ngui oh cang umo thun. Klaak tapa sa thun jan van, mong iek veik bruk ngak di drei, ong Mỹ brei thau, jak jeng akaok mereip di Mỹ Lan Group atau padang mbang ngui mbang ka klau di umo labaih 60 dalam gah ngak nong công nghệ glaong jeng lac hatai takre. Meng kham merat ngak ka bahu hatai caong di drei, oh njuak lac umo thun, meng lac jalan ba tal jak jeng dalam padang mbang ngui. Min caong hu jak jeng dalam padang mbang ngui, njauk padang tabiak sa kapul ngak bruk hu dom pren khang karei di gauk: “Caong padang mbang ngui, drei njauk duah sa kapul nyaom ayut sahabat saong hu dom chuyên môn karei di gauk. Kadha bo dahlak bhian rah tapa dalam dom thun camereip padang mbang ngui, nan lac nao duah dom kỹ sư hu ilamu gah khoa học kỹ thuật dreh dahlak oh njauk lac thau ka bruk pablei salih, kinh doanh!”

 Yau nan min, meyah padang mbang ngui tok sangka tal dom kadha anak meta yau iew pataom phun jien, dak padang kapul ngak bruk, ngak marketing,vv... ye padang mbang ngui oh jak jeng hu. Zalo, sa biểu tượng ka dom urang patagok ứng dụng Việt, urak ini hu tal 45 triệu urang tut angan pandar, yaom lac bahrau tabiak darak pasar meng thun 2012, brei ka drei ralo kadha bac megru ka bruk jak jeng. Đầu tư lac jalan ba tal jak jeng halei oh? Amuk Vũ Kim Hạnh, Akaok Pasak Roh duah pablei salih saong daong ba doanh nghiệp ndom lac, biak di nyu nan tok lac makna ka klau. Kadha praong abih lac tính năng kỹ thuật di sản phẩm atau bruk kein lagaih ngan haong urang pandar: “Thau bruk darak pasar, dak padang hu sa mô hình pablei salih meng lac kadha praong. Nan lac, pambuak pren khang di drei saong hatai caong khin di darak pasar saong dung lượng di darak pasar piah ngak tabiak sa mô hình kinh tế. Nan lac kadha praong di abih.”

Taong abih dom bruk ngak hu jeng mai meng dom hatai sahneng. Khaol drei bahrau nao angaok jalan padang mbang ngui. Kayua nan ye, njauk peih mbaok meng akhar “tâm” saong ngak hu jeng meng akhar “tâm”. Kayua yau nan ye, tui ong Lê Minh Hoan, Bí thư Tỉnh ủy Đồng Tháp, caong khin padang puk palei khởi nghiệp, njauk peih akaok meng hatai sahneng veik labik dang di karja dom pakat: “Đồng Tháp daok salih bahrau saong caong khin ralo jang bruk salih bahrau piah pachreih ba ngak tabiak dom doanh nghiệp ranaih, doanh nghiệp khởi nghiệp. Đồng Tháp jeng caong khin lac, dom doanh nghiệp puk palei, abih di nyu lac dom urang ranaih njauk khang hatai piah padang mbang ngui.”

Dalam harak payua tal dam dara saong uranaih dalam negar tukvak Tết Bính Tuất thun 1946, WA HỒ vak: “Sa thun peih tabiak meng mùa xuân, sa rai peih tabiak meng umo ranaih.” Harei ini, umo ranaih padang mbang ngui, dut pren khang haong langik glaong, tasik prong yau dom seok chim, truac hadah tagok dom hatai takre saong caong khin ngak pô tri thức, ngak po taneh aia, ngak jeng dom bilan xuân padang mbang ngui.

Hatai jia nan lac pren khang piah ngak ka dom hatai caong khin, dom bruk daok kuhria ngak, jeng pren khang vật chất ka yaok urang saong xã hội./.