Rilo jalan ngak hu ong peih prong piah patagok kinh tế 

Ong Lầm Chắn Vằn brei thau, dalam dom thun akaok mereip bahrau mai padang mbang ngui, ong peih taneh bilau hu 3ha rok danao padang aia, pala iek labaih 100 phun patei. Pala hu sa tukvak katut panak, bein patei di ong hu paik baoh, mboh darak pasar pablei nduac saong bruk pajeng ba mbuan laghaih nan ye ong peih prong mblang taneh pala.

Hu jak jeng, ong Vằn patui veik bac megru ilamu pala pablak patei haong panat. Dalam bein hu jaik 200 phun panat brei paik baoh. Meng bruk pala pablak 2 janih phun patei haong panat, kuhria rah tapa yaok laba hu labaih 150 triệu đồng/thun.

Meng hatai caong khin cak rok patagok dalam bruk ngak mbang, ong Vằn hu ngak jalan aia trun tal ala bein pruh ka bein phun mbang baoh. Ong Vằn khan lac, yaok phun panat pala atah di gauk meng 5 – 6m, phun patei pala atah gauk 2- 3m, pala tui jalan pablah gauk. Daok phun patei tok pala meng 1 – 2 phun sa lubang piah mbuan mong iek, hadei di tuk paik baoh njauk puh ramik hacih sa-at piah ka phun patei anek cak rok patagok saong plaih di jit ruak halak halin. Urak ini, yaok phun panat hu meng 10 – 20 baoh, yaok baoh teik trak jaik 10kg, daok hu dom urang pablei salih takre blei. Meng tari tareng ngak mbang bo kinh tế di sang cak rok patagok biak tani tanat, peih prong hu taneh pala drak saong raong glang. Ong Lầm Chắn Vằn, xã Sông Bình, huyện Bắc Bình, tỉnh Bình Thuận daok brei thau lac:

" Hadei di tuk bac megru hu ilamu tapa dom mbang nao rivang iek, ye dahlak mboh bruk pala panat, pa-aok pablak haong patei blaoh mai ginum biai haong diuk anek ngak tui chip, hadei di nan jak ba mikva ngak tui. Urak ini, bein panat dalam palei hu biak rilo saong jien mek tame jeng hu rilo. Dahlak jeng nao bac megru  rilo bruk bahrau tra, piah cak rok patagok bruk ngak mbang dak harei dak khang kajap jang".

Oh lac tok cak rok phun panat, phun patei piah patagok jien mek tame ka baoh sang, diuk pasang ong Vằn daok peih prong jang taneh puh piah pala krem mek rabhung saong pala hareik piah raong limo. Mong mboh bruk raong limo tui jalan palimek saong caih menek ba mai rilo kein laba laghaih haong taneh riya pak ini, ong Vằn pandar phun jien patak pataom hu di baoh sang piah blei dom drei limo mai raong, dahlau diah ong tok raong limo palao langiu mblang hamu. Pandap mbang ka limo lac dom pandap klak di kaya nong saong hareik. Hadei ini, tuk hu jalan ribaong ba aia mai, mikva hu taneh pak ini peih prong taneh pala drak, nan ye bruk raong limo tui jalan peih palao oh daok laghaih. Meng nan, ong pala hareik piah raong  palimek limo.

Sa-ai Lê Trường Long, akaok UBND xã Sông Bình, huyện Bắc Bình, tỉnh Bình Thuận brei thau, meng kham merat pala drak, raong glang, tal urak ini sang ong  Lầm Chắn Vằn hu jien phun prong. Taong abih dua diuk pasang thei jeng tari tareng ngak mbang, bac megru ilamu saong tuk halei jeng ba akaok nao dahlau dalam bruk ngak di puk palei, ngak siam dom sarak di Đảng, hukum di karja nan ye hu mikva dalam palei anit ranam.

" Dalam rilo thun tapa, cei  lac urang ba akaok nao dahlau dalam dom bruk ngak di puk palei yau alin brei taneh ngak jalan nao mai dalam palei, ngak dom bruk ngak pahla karei di puk palei. Abih di nyu lac, cei haong dom ban ngành di puk palei nao jak ba mikva ngak tui dom sarak di karja. Taphia di nan, cei daok lac urang ba akaok nao dahlau dalam bruk salih janih phun pala anek athur raong yau pala dom phun mbang baoh, ba mai rilo kein laba ka puk palei".

Dalam dom thun tapa, ong Lầm Chắn Vằn lingiu di bruk lac urang ba akaok nao dahlau dalam bruk ngak mbang, pala drak, ong daok lac labik pambak tame di mikva dalam palei Đá Trắng, xã Sông Bình, huyện Bắc Bình, tỉnh Bình Thuận. Ong hu palih ruah lac urang hu angan je saong hu urang jakar puk palei jao brei bruk langyah dom bruk kandah gauk dalam rai diuk yaok harei, piah ka mikva dalam palei, dalam xã hu jaik gauk jang. Taphia bruk pahadar mikva dalam puk di drei, ong daok kham merat jak ba mikva dalam palei, gul pataom gauk, anit gauk yau adei sa-ai pajeng. Dalam sang, ong Vằn daok lac urang ame gheih ghang, lac urang hu angan je nan ye hu mikva pak ini abih hatai anit ranam tuk ndom tal ong./.

Urang lang : Jasi -6/9