Pathau mik va urang nong: Tapa rilo thun roh duah song thau cambaih ka bruk lingik tasik kan kandah angaok bhum taneh drei dok pala drak, urang nong Lê Văn Long, umo 74 thun, dok di palei Vụ Bổn, xã Phước Ninh, huyện Thuận Nam, tỉnh Ninh Thuận hu sa jalan ngak mbang siam lagaih, jien duah hu yaok rituh triệu đồng yaok thun.

          Tuk camereip bahrau padang mbang ngui, urang nong Lê Văn Long gaok oh takik kan kandah, kayua taneh pala drak dok di labik thu lagu abih di huyện, min meng hatai kham merat yam tagok ngak kaya meda, ong oh padeih roh duah, pataom dom ilamu jang yau dom jalan ngak di bhum taneh thu lagu tapa rilo jalan khau tin gam song bruk tui iek kajap yaok bilan yuak angaok bhum taneh di drei. Urak ni, ong Long mboh njauk hatai, kayua duah hu jalan nao njauk yau drei palih ruah.

Ong Long khan lac, “bruk ngak nong dang di pandiak riak di hajan, mbuan gaok khat lihik kayua pandiak hajan oh thau dahlau. Yaok mbang khat lihik, ong duah thau makna di nyu bloh palih ruah pajaih phun pala lagaih ka yaok bilan ngak, lagaih song langik tasik, taneh riya song khang hatai ba ilamu kỹ thuật tame bruk pala drak meng mek hu dom hagait bo drei cong khin. Rilo thun tapa, yaom lac rilo sang pala drak jaik taneh di ong jeng hu buh jien tabiak oh takik, min oh ka hu sang halei mek hu năng suất glong, dalam tuk 2,4 ha taneh ngak padai mek ia pruh meng binek Kía di sang ong Long tuk halei jeng hu meng 6 tấn meteh tal 7 tấn sa ha dalam sa vụ.

Meng phun jien hu patak patom dalam rilo thun, thun 2011, ong Long blei 10 drei limo binai. Kayua thau pandar dom ilamu kỹ thuật dalam bruk iek glang, tapon limo samar prong song menek samu gauk. Bahrau ni ong pablei meneing gam song jien di sang, ong blei 1 sruh radaih li-ua, gam li-ua ka sang gam li-ua mbang pah ka mik va. Tal harei ni, tapon limo di sang ong hu 31 drei, yaom yaok rituh triệu đồng. Urak ni, meng 1,2 ha taneh ngak padai, 6 sào taneh pala medar, 4 sào taneh pala njam patam karei karei, gam song danao rong ikan praong labaih 2 sào, yaok thun, hadei meng kaoh yaom jien buh tame ngak, ong mek tame hu 150 triệu đồng. Ong ngak hu sa boh sang siam song ba bruk ngak tani tanat ka 5 urang. Langiu di nan, ong dok kham merat dong dom urang nong yam tapa kan kandah meng bruk tacei jalan ngak mbang, pato ilamu kỹ thuật bahrau dalam bruk pala drak, iek glang phun medar, tamun ia hu mejam brei rilo baoh.

Anak bruk pandiak bhang dui atah, ong Long brei thau “Hulin ba 1,2 ha padai tapa pala tamekai, ratak naih.. jien mek tame grap tanat. Piah hu ia menyum ka tapon athur rong, hulin jak ba dom boh sang dok jiak taphia pataom jien apah jamriak kuac raok danao jiak dom ribaong, doom baoh craoh piah duah ia, anak meta jeng hu tani tanat./.