Bruk njauk caik hatai di kol dahlak tuk gaok Má A Nủ (ndih tapui thun 1994), urang mek hu Giải thưởng Lương Định Của thun 2015 (lac giải thưởng pok meyaom dom urang ngak nong daok ranaih umo naih gheih dalam bruk ngak mbang, pala drak, panduan ba ilamu - kỹ thuật, công nghệ) lac mboh biak anit ranam urang likei dam bangsa  Mông chreih chrai saong rap ar tuai damuai. Takik urang halei thau lac, umo bahrau labaih 20 thun, A Nủ ngak Chủ nhiệm Hợp tác xã Mông Cát Cát (xã San Sả Hồ, huyện Sa Pa, tỉnh Lào Cai), bhian pablei salih dom janih menyek ngak meng tự nhiên, jru menei ia, sara tram takai, sabon menei ia, nến sáp ong, dịch vụ menei ia hala jru, homestay… hu rilo tuai damuai dalam saong lingiu taneh ia thau tal. Meng dom janih pandap ini, Hợp tác xã Mông Cát Cát yaom lac bahrau padang tagok min jien mek tame hu tani tanat, ba bruk ngak gam gam ka 14 xã viên saong rilo urang ngak daok dalam palei. 

Tuk Má A Nủ bac tal 9, sa-ai kacua pakacah tame đại học. Sang kan kandah , oh nao bac hu taong abih dua adei sa-ai,  A Nủ khang hatai klaak bac nao duah bruk ngak. 4 thun ngak mbang pah ka 1 labik ngak du lịch, A Nủ thau hu bruk ngak tinh dầu bloh kham merat tui bruk. Menek tabiak saong praong tagok di bhum ceik glai, Má A Nủ thau cambaih yaok janih phun, janih hareik, abih hatai ka bruk ngak tabiak janih jru pakhang pasiam pren yava bhap bini drei. Nan ye A Nủ saong dom ayut padang kapul, peih bruk roh duah, ngak iek dom janih phun jru hu dalam palei. Tuk camereip, amaik ame adei sa-ai saong ayut sahabat oh khin brei ngak, min A Nủ khang hatai tui bruk. Thun 2013, sa-ai pataom hu hasit phun jien bloh jak ba adei sa-ai, ayut sahabat rik jien tame ngak. Sa-ai padang xưởng sản xuất di angaok taneh praong  200m2, abih labaih 400 triệu đồng (dalam nan Sở Công Thương tỉnh Lào Cai daong 150 triệu đồng). Taong abih jamriak hu blei bahrau, khik ka dược liệu hu chiết suất siam mekre, hacih sa-at. Min tuk bahrau ngak, xưởng di sa-ai jeng gaok rilo kan kandah, rilo mbang thảo dược ngak bloh oh pandar hu njauk tuh klaak. Min A Nủ oh kadun likuk, bo kham merat ngak veik. Bloh dom sản phẩm di A Nủ jeng hu pablei tabiak darak pasar.

Thun 2014, hợp tác xã laba hu labaih 300 triệu đồng. Sản phẩm hu rilo menuac thau tal jang, jien mek tame dak harei dak rilo jang, A Nủ duah mesraiy phun jien saong pok panuac tagok karja palei piah peih praong jeng hợp tác xã. 

Hu ilamu meng dom janih jru meng kan, A Nủ sahneng tal bruk ngak ka nyu jeng dom janih pandap yaih khan tal tuai du lịch saong hatai sahneng lac: Piah ka menuac sia hu pandar dom  sản phẩm siam di abih mai meng ceik glai. Oh lac ngak tinh dầu saoh, sa-ai daok ngak dom janih jru meng kan di urang Mông, Dao di Sa Pa, A Nủ ngak hu dom sản phẩm bahrau meng tinh dầu dược liệu yau sabon menei ia, sabon menei ia, jru menei, tram… Piah hu ginup pandap piah ngak, A Nủ pala jaik 5 hecta phun jru yau laya, palang, thảo quả, long não saong nao duah dom phun màng tang, chùa dù... tamuh dalam glai. Urak ini, taneh pala phun jru di hợp tác xã daok peih praong tapa xã Sơn Bình, huyện Tam Đường, tỉnh Lai Châu. Pandap di A Nủ hu urang takre kayua nyu siam, hu tính tự nhiên. Tal urak ini, dom đơn hàng oh lac daok dalam huyện Sa Pa, tỉnh Lào Cai saoh, bo par tabiak dom tỉnh jaik taphia, tal Hà Nội saong ban raya Hồ Chí Minh, hu tuk tabiak tal taneh ia lingiu. Lingiu di nan, hợp tác xã di A Nủ daok hu peih dom dịch vụ menei ia, tram takai meng thảo dược pambuak saong du lịch piah ba bruk ngak ka rilo menuac dalam palei, daong patruh eik patrun kathaot. 

Meng sit lac sang kan daman,  A Nủ thau cambaih bruk khat lihik di dom uraniah sang kan kandah dalam palei, nan ye sa-ai brei padang kadung jien daong bhap bini, kaoh tabiak 5% meng yaok sản phẩm pablei tabiak, rik tame kadung jien. A Nủ jeng kham merat jak ba dom urang ngak pahala rik pataom tapuk klak jeng sa gilang tapuk saong peih tal pato sap Anh dalam mblang bein hợp tác xã brei  ka dom adei sit sang kan kandah.. A Nủ khan lac: "Dahlak tok caong ka taong abih uraniah kan kathaot hu nao bac, hu thau akhar haroh ye meda ngak kaya saong rik daong dak padang puk paga". Ong Má A Nủ, Chủ tịch xã San Sả Hồ, huyện Sa Pa, tỉnh Lào Cai, ndom lac: Dom sản phẩm di hợp tác xã kayua A Nủ ngak chủ nhiệmhu labik dang saong hu angan je dalam hatai tuai du lịch. Karja xã saong A Nủ hu gium biai jalan ngak, pachreih ba dam dara dalam palei tame hợp tác xã di A Nủ saong pambak praong bruk ngak ini, tapa nan, daong patruh eik, patrun kathaot hu siam lagaih./.