Meng hatai tari taring, oh huac glaih glar, takre bac megru, sa-a Thông Văn Đức daok di palei Hiệp Hòa, xã Tân Thuận, huyện Hàm Thuận Nam, tỉnh Bình Thuận hu ngak brei bhum taneh ngak padai oh kein laba dahlau deih urak ini jeng bein phun thanh long hijao mekre, ba mai kein laba yaok rituh triệu đồng. 

Taduan raok kol dahlak dalam bein phun thanh long di drei, sa-ai Đức oh klah hu drut drui tuk hadar veik dom thun bilan rambah rambup di sang drei. Sa-ai Đức brei thau, 16 thun dahlau, bhum taneh ini pala phun bei plom saong ngak padai, min bilan njauk, bilan oh, kayua ngak padai brei hu ginup ia pruh saong phun jien buh tame rilo…Kayua yau nan ye bo sang sa-ai gaok rilo kan kandah. Thun 1996, mboh dom baoh sang dalam xã pala phun thanh long ba mai rilo kein laba nan ye sa-ai ba 3 sào taneh ngak padai di sang drei tapa pala 300 got phun thanh long. Meng tari taring, oh huac glaih glar, kham merat hu mbaok tame dom tal pasram, hu mbaok tame bac megru ilamu pala phun thanh long kein laba meng rilo labik, nan ye hadei di 1 thun pala iek, haong 300 got thanh long, sang sa-ai mek tame hu labaih 40 triệu đồng yaok vụ.

Mboh lac phun thanh long ba mai kein laba suai livik, nan ye thun 2005, sa-ai nao mesraiy jien di gilang pariak piah pala gac 2 ha phun thanh long ( nan lac 2000 got ) saong blei 1 jamriak peih điện piah truac pui hadah di tuk melam, pachreih phun thanh long tabiak baoh karei bilan. Kayua phun thanh long yaok thun tok paik baoh hu 4 mbang (dalam nan hu 2 mbang najuk bilan, 2 mbang karei bilan). Meng nan, thanh long brei biak rilo baoh, yaok thun  sang sa-ai duah laba hu meng 200 tal 300 triệu đồng. Meng hu  thanh long, sa-ai Đức raong 4 urang anek nao mbang bac ginup abih. Sa-ai lac: “Meng hu laba, sang sa-ai blei hu dom pandap piah pandar dalam sang, anek bhik nao bac tal labik tal dhua”.

Oh njauk hatai haong dom hagait drei daok hu, puac thun 2011, Sa-ai Đức pala phun thanh long tui VietGAP. Meng ngak njauk tui dom ilamu, pandar khak, jru khik caga phun pala mbiah ginup saong thau pacang caga dom janih ruak kik halak halin... bein thanh long di sa-ai Đức hu biak rilo baoh, meng nan nyu patrun yaom phun jien pala ngak. Kadha praong jang nan lac ngak tui VietGAP nyu khik hu haci hacih ka phun thanh long. Kayua yau nan ye, thanh long di sang sa-ai hu rilo menuac mai tal bein piah blei. Ong Huỳnh Kim Nam – akaok palei Hiệp Phước – xã Tân Thuận – huyện Thuận Nam brei thau : tuk sang hu ginup meda, sa-ai Đức “Sa-ai Đức abih hatai hu mbaok tame bruk di puk palei, saong ngak siam bruk di sang”.

Kayua thau sahneng kuhria, thau bailamu bahrau tame bruk ngak mbang, sa-ai Thông Văn Đức hu ngak kaya meda ka sang drei meng pala phun thanh long. Lingiu bruk ngak kaya meda ka sang drei, sa-ai daok jak ba mikva tame pala phun thanh long tui jalan haci hacih, ba bruk ngak ka jaik 10 urang dalam palei, rik daong patruh eik, patrun kathaot./.