Sa-ai Tẩn A Sếnh menek tabiak saong prong tagok dalam sa baoh sang urang Dao kathaot, ralo anek di Bản Sèng Lảng, Xã Tả Phìn, huyện Sìn Hồ, tỉnh Lai Châu. Oh khin kan kandah, sa-ai khang hatai mesre phun jien buh tame ngak mbang patagok bruk raong glang, pambuak haong bruk ngak kiak Ba banh brei jien mek tame grap tanat, ba bruk ngak ka ralo urang ngak tuk daok sraoh di ouk palei.

Dalam baoh sang trình tường kayua diuk pasang patak pataom jien pandang ngak, sa-ai Tẩn A Sếnh khan lac: hadei di tuk tok diuk, rai diuk di diuk pasang sa-ai biak kan kandah, luac harei ngak glaih glar langiu hamu puh jeng oh ginup mbang. Hadei di tuk nao ralo labik piah duah jalan daong ka sang tapa truh kathaot, thun 2009 sa-ai mesre jien di adei sa-ai, gaup gar, buh tame raong menuk ada, anek athur raong. Gam ngak gambac megru, akaok thun 2011 sa-ai Sếnh nao mesre 100 triệu đồng di gilang pariak piah peih prong mblang taneh raong glang. Kuhria rah tapa yaok thun sa-ai pablei tabiaj darak pasar labaih 2 tấn pabui, gam haong limo, kubao, asaih pablei rilo. Yaok thun kaoh abih jien daok mek tame hu labaih 300 triệu đồng. sa-ai Tẩn A Sếnh khan lac: “tuk khin kamei, rai diuk daok gaok ralo kan kandah,  oh ka hu ilamu, saong kayua lac huyện bhum glaong Cao Sìn Hồ langik tasik biak kan kandah, kayua yau nan ye njauk palih ruah njauk tukvak raong glang. Tabiak daok karei dahlak meng raong pabui hu yau nan pabui meng prong samar. Mong mboh angaok darak pasar urang caong blei rilo asaih biak ralo, yaok thun asaih menek hu sa drei, asaih daok dalam la-ar siam nan ya  dahlak pataom tame raong asaig. Tuk langik la-ar, sang dahlak ba limo kubao trun labik biar piah plaih la-ar”

Taphia di nan, sa-ai daok buh tabiak abih jien drrei patak pataom hu meng raong glang saong nao mesre di gilang pariak piah blei 4 sruh mac ngak kiak Ba Banh pablei ka urang padang ngak dalam palei. Kaoh abih phun jien buh tame, yaok thun jien mek tame meng bruk ngak kiak Ba banh di sang sa-ai hu jaik 400 triệu đồng. Tal urak ini, sa-ai ba-yar hu abih jien mesre ka gilang pariak, bo daok blei hu dua sruh radaih ô tô  pajeng patau ngak kiak. Oh lac patagok jien mek tame ka baoh sang, anek bhik hu bac daa, xưởng ngak kiak di sang sa-ai daok ba bruk ngak ka ralo mikva dalam palei. Sa-ai Chẻo A Nái, sa baoh sang kathaot dalam palei, hu sa-ai Sếnh brei ngak bruk mbang jien harei pak xưởng kiak Ba Banh brei thau: “sa-ai Sếnh oh lac daong ilamu kinh nghiệm dalam bruk raong glang bo daok daong ka sang dahlak hu bruk ngak. Mai meng hu ghing ngak kiak Ba Banh di sang sa-ai Sếnh bo diuk pasang dahlak hu jian mek tame tani tanat, jien bilan 4 triệu đồng sa urang. Diuk pasang dahlak biak thau dhar phol sa-ai saong kham merat bac megru tui sa-ai”

Xã Tả Phìn labik sa-ai Tẩn A Sếnh daok rilo meng hu bhap bani Dao diuk rai. Dalam xã hu labaih 570 baoh sang ye hu tal 230 baoh sang kathaot. Tả Phìn daok lac bhum taneh bạc màu ngak ka ralo bhap bani labik ini having akaok oh thau pala phun hagait piah cak rok patagok kinh tế sang. Kein laba meng jalan ngak mbang kinh tế di sang sa-ai Tẩn A Sếnh hu peih ka urang nong labik ini jalan nao bahrau, hatai sahneng bahrau dalam bruk raong glang. Ralo sang daok bac megru sa-ai Sếnh piah tabiak truh kathaot. Ong Chẻo Cuổi Lù, akaok palei Sèng Lảng, xã Tả Phìn brei thau: “Di palei dahlak hu sang sa-ai Sếnh ngak mbang patagok kinh tế biak siam, oh lac patagok bruk raong glang, ngak mbang palei salih naih joi, sa-ai Sếnh daok hu daong ka ralo baoh sang hu jalan yam tagok. Meng hatung hatai gul pataom, anit ranam,  sang sa-ai ralo thun gam mek hu angan baoh sang ilamo, saong cakrok patagok raong glang, pala drak ngak mbang naih jioy”

Oh khin kathaot rambah, yam tagok ngak meda meng dua palak tangin sraoh, sa-ai Tẩn A Sếnh biak njauk lac kareih camin di puk palei bhum glaong./.