Umo 30, sa-ai Nguyễn Văn Thật, daok di xã Đông Thạnh huyện Châu Thành, tỉnh Hậu Giang lac Akaok Hợp tác xã ngak nong Thạnh Phước ngan haong yaom jien mek tame labaih sa tỷ đồng yaok thun, meng bruk pablei kruac pajaih oh hu asal saong blei veik kruac baoh.

Thun 2005, hadei di tuk bac tamat pakat klau, sa-ai Thật having akaok anak dua jalan lac patui bruk bac daa atau daok di sang daong bruk sang duah jalan nao ka phun kruac bak tiềm năng ini. Hu amaik ame pachreih ba lac ngak po rup drei siam jang nao ngak mbang pah ka urang karei nan ye dahlak khang hatai ngak meda angaok bhum taneh di drei".

Sa-ai Thật brei thau, kruac oh hu asal mbuan pala, takik hu jit ruak halak halin, brei baoh luac thun, tukvak meng harei pala tal tuk paik baih lac 18 bilan. Kuhria rah tapa sa phun brei baoh jaik 40 kg, năng suất meng jaik 30 tal 40 tấn baoh sa ha sa thun, yaom pablei meng 20 tal 30.000 đồng sa kg, kaoh abih phun jien buh tame bloh urang nong daok laba hu labaih 400 triệu đồng sa ha. Urak ini, hợp tác xã hu 84 hội viên hu mbaok tame pala kruac oh hu asal angaok mblang taneh prong 97 ha, mek hu tiêu chuẩn VietGAP saong GlobalGAP dalam thun 2012. "Piah mek hu 2 tiêu chuẩn angaok nan, dom hội viên njauk hu mbaok tame tal pato pathram ilamu kỹ thuật meng bruk buh khak, pruh jru tui njauk quy trình oh njauk lac ngak tui hatai takre di drei. Urak ini bruk pablei kruac oh hu asal tabiak negar lingiu  biak prong, hợp tác xã oh ginup baoh kruac piah pablei ka dom doanh nghiệp nan ye hu pok panuac tagok Ủy ban bhap bani tỉnh Hậu Giang brei ngak iek mblang hamu prong labaih 200ha. Dalam nan, hợp tác xã daong phun pajaih, jalan pala saong blei veik abih baoh kruac di bhap bani pala hu. Langiu di nan, dalam thun ini hợp tác xã blei di Viện Phun mbang baoh gah Meraong 400 phun kruac oh hu asal akaok pajaih piah patui bruk pambak prong pajaih chất lượng pablei ka bhap bani.

Thun 2014, hợp tác xã Thạnh Phước di sa-ai Thật pablei hu labaih 200.000 phun pajaih kruac oh hu asal saong blei veik labaih 60 tấn baoh piah pablei ka doanh nghiệp, kaoh abih phun jien buh tame daok laba hu labaih sa tỷ đồng. Langiu di nan, daok daong ka jaik 20 urang ngak palei pala hu bruk ngak tani tanat ngan haong yaom jien bilan labaih 3 triệu đồng yaok bilan. Meng dom bruk ngak hu yau nan, sa-ai Thật hu Trung ương Đoàn pok brei giải thưởng "Sáng tạo trẻ" thun 2012. Sa-ai Nguyễn Thị Ngọc Chân, Bí thư huyện Đoàn Châu Thành ndom lac, sa-ai Thật lac urang điển hình ka ralo urang đoàn dam dara karei dalam huyện bac megru. Cambaih laih, bruk pala kruac oh hu asal ba mai kein laba mboh di anak meta hu daong ka ralo dam dara urang đoàn mboh hu saong salih meng bruk ngak mbang oh hu kein laba tapa pala kruac oh hu asal piah tabiak truh kathaot./.