HĐND TP.HCM daong menuac gaok kan kandah kayua jit Covid-19

Page ini 4/8, Mentri Y tế brei thau, dalam jaik 12 tuk tapa, He thong pakat negar khik iek urang ruak Covid-19 hu mboh 4 ribau 2 rituh 7 pluh tha urang birau njom ruak, dalam nan hu 1.044 mbang urang ruak dalam bhap bini. Ta-eng Ban raya HCM hu 2365 urang, patui di nan tal Bình Dương (1.032). Dalam harei hu 405.884 mbang jru vaccine Covid-19 hu klauk.

Ngak tui Sarak 09 di HĐND TP.HCM ka bruk daong menuac gaok kan kandah kayua jit Covid-19, kuhria tal abih bilan 7/2021, dom quận huyện haong ban Thủ Đức hu daong ka jaik 380 urang haong yaom jien abih tih labaih 578 tỷ đồng. Phaok Bí thư Thành uỷ TP.HCM Nguyễn Hồ Hải brei thau, ban raya meda brei padang pasak taduan mek, parabha tabiak, daong brei pandap mbang huak ka bhap bini di 3 pakat lac ban, quận huyện haong phường xã.

Melam 3/8, Akok UB bhap bini tỉnh Tây Ninh Nguyễn Thanh Ngọc hu payua harak thư ieu pataom gah y te brei daong prein pacang caga jit Covid-19. Tui Akok UB bhap bini tỉnh Tây Ninh, anak bruk jit ruak rah tabiak kan kandah, yaom lac tỉnh saong gah y tế kham merat biak ralo, min kayua prein gah y te tok takik, manuac ruak ye ralo saong kurang urang gah y tế ngak kan kandah tal bruk pacang caga jit jeng yau bruk taduan tame, taong ruak ka urang. Mbiah tal ini, dalam tỉnh Tây Ninh hu labaih 2. 200 urang njom Covid-19, daok taong ruak ka labaih 1.900 urang, menuac metai lac 32 urang.

Anak bruk srau kadau di jit COVID-19 daok rah tabiak di TP Hồ Chí Minh haong dom tỉnh gah meraong, dom harei jaik di ini, hu yaok rabau menuac eng drei nao palei meng radaih patuh saong yaok pluh rabau menuac daok caong hu nao palei. Min bruk bhap bini eng drei nao palei mbuan ba tal rilo bala oh caga hu. Dalam bruk kham merat ba rahra meng TP Hồ Chí Minh haong dom tỉnh gah meraong nao palei plaih jit di tỉnh Nghệ An, biar harei kabroi, sruh kapal haoh pajeng 217 rahra lac menuac Nghệ An meng TP Hồ Chí Minh hu par trun mblang kapal haok Vinh.  Dalam mbang 1, tỉnh Nghệ An kuhria ba 1.000 menuac nao palei veik meng jalan kapal haok.

Măng tây xanh – rabung hijao lac janih phun hu pala ralo di tỉnh Ninh Thuận ngan saong taneh pala praong labaih 200 ha, ta-eng huyen Ninh Phuoc hu labaih 131 heta. Meng harei 20/7, dom labik blei pala măng tây hijao Ninh Thuận buh tame  TPHCM brei padeih ngak ka taneh pala rabung hijao di mikva tal tuk paih mek oh duah hu labik pablei. Urak ini, yaok rituh ha taneh pala rabung hijao kayua oh pablei hu, mikva paih mek alin, tapa dom Kapol urang kumei dom pakat, ba nao brei ka dom baoh sang kan kathaot, dom palei kurang njam mbang dalam tỉnh saong ngak pandap alin ka urang, daong prein ka ban raya HCM.

Myanmar daok rah tabiak mbang tamuh jit Covid-19 khang abih kuhria meng dahlau mai, dalam tuk taneh ia ini daok dauk dalam srau kadau kinh tế haong chính trị. Tui yaok pataom di Karja quân sự Myanmar, taneh ia urak ini hu jaik 6.000 urang njaom saong hu 300 urang metai yaok harei. Min urang jakar ngak praong ndom lac, bruk ini meda hu rilo jang kayua prein dut iek daok biar. Karja  quân sự Myanmar brei cap mek rilo urang y tế hu mbaok tame bruk trun jalan, cagar veik karja quân sự saong oh khin ngak bruk haong karja quân sự. Kadha ini ba tal kurang menuac ngak biak rilo di dom sang iek ruak, abih di nyu lac di dom bilik cấp cứu di taneh ia ini.

Harei kabroi, hu bruk radaih paoh gauk biak khang angaok jalan di gah meraong Ma-li ngak brei takik di nyu 41 urang metai. Tui Mintri jalan mbak pajeng ba Ma-li, bala nan rah tabiak angaok jalan nduac samar, atah di ban sit Segou 20 ki-lô-mét tuk sa sruh radaih pajeng pandap haong menuac ngak, paoh gauk haong 1 sruh radaih buýt pajeng tuai. Hu thau, urang peih radaih pajeng pandap blait tangin peih hadei di tuk patuh kong radaih, blaoh radaih pajeng pandap ini ginuh tame radaih buýt. Lingiu dom menuac metai, daok hu 33 urang njauk rambus.

Sở Padam pui Airling brei thau, 1 urang metai haong 2 urang njauk rambus dalam mbang patuh phao di gah langiu Lầu Năm Góc (Mỹ) harei kabroi. Dalam tuk nan, Gah khik caga Lầu Năm Góc khan haong blah Politico lac menuac cuh phao njauk cảnh sát Lầu Năm Góc cuh. Mintri Quốc phòng Mỹ jeng brei klaak bruk pacang veik saong peih pabah mbang veik labik ini. Min pabah mbang tame mblang tàu điện ngầm jeng daok brei kreik. Jeng dalam harei nan dahlau di nan hasit, Lầu Năm Góc njauk pacang veik tuk mehit lac hu bruk patuh phao di sa mblang tàu điện ngầm daok di gah langiu piah khik caga labik ngak bruk di bol bala Mỹ./.

Urang lang: M. Phương – Ái Nghiêm – 04/08 10:22:19