Hiên lac urang anek ka 4 dalam sa baoh sang hu 5 urang anek, anai ndih tapui thun 1980 lac urang njauk rilo thiệt thòi di abih. Tuk ndih tapui tabiak, Hiên khang kadang, siam mekre yau dom adei saai karei. Min, oh ka bak sa thun, takai gah ieu di Hiên hu dom biểu hiện karei, blaoh dua gah takai oh daok megei hu. Hiên gaok di chứng kalik truac di truyền meng ame saong adei oh yam takai nao mai hu.

Nao bac angaok kaeng di amaik ame, adei saai, Hiên dak thau hu dom kan kandah drei njauk dang anak : gaok ayut lua, oh mein bui sambai yau dom ayut, Hiên dak harei dak tự ti, hia rilo saong caong padheih bac. Min meng di ini, hatai kham merat yam tapa kan kandah, yam tagok thar vak di adei hu tamuh tagok.

Tagok 10 thun, takai Hiên hu blac raih saong meng bruk kham merat saong hasit patoah jamo, adei  eng drei yam nao mai hu  meng takai di drei bo oh cang tal nạng hu tui drei luac dom thun bilan. Yaom lac meda nao mai eng meng takai di drei, min di chứng kalik truac  jeng daok ngak ka Hiên yam nao oh bình thường. Mbang ka dua dalam raidiuk, Hiên dang anak bruk nghiệt ngã : adei jeng daok lac sa urang jaoh jo saong kayua lac urang jaoh jo, blah bằng tốt nghiệp gah kế toán oh daong ka adei hu bruk ngak yau sa urang bình thường.

Thun 2012, Hiên hu mbaok tame sa tan pasram kỹ năng brei ka urang jaoh jo kayua sa jabat langiu rajaei peih ngak di tỉnh Đồng Nai. Tuk mereip tok tame piah thau, min kein ba meng danakdak nyu ngak brei salih hatai sahanneg di Hiên ka khả năng di urang joah jo, Hiên jeng sa urang pambuak bruk siam ka dự án pasiam raidiuk urang joah jo ban sit Biên Hòa. Di ini, adei gam saong dự án hu daong yaok ratuh urang jaoh jo hu bac bruk, hu kỹ năng ngak bruk siam, rilo urang dalam nan duah hu bruk ngak saong khik hu bruk ngak tani tanat. Hiên khan lac, kan kandah di abih min jeng lac jak jeng di abih di adei lac daong dom urang dreih yau drei, abih di nyu nan lac sang dom urang nan sahaneng hu lac urang joah jo oh njuak lac urang klak saoh:“Dom chuyên gia hu ndom abih ka dom urang joah jo. Dom urang nan brei mboh lac urang jaoh jo oh klak saoh bo meda ngak bruk hu. Yau nan ye bo rilo sang hu anek brei tame bruk ngak di bhapbini”

Tal urak ini, rilo urang joah jo hu Hiên saong dự án daong hu bruk ngak tani tanat, meda eng drei duah bruk piah diuk, oh daok cang urang raong yau dahlau thiah. Saai Trần Minh Hoàng, sa urang joah jo ngak rup cih meng brah hu angan je di Đồng Nai hu salih bahrau raidiuk meng dự án daong urang jaoh jo bo Hiên lac sa urang ngak siam bruk dalam nan, brei thau : “Brei mboh drei diuk hu ý nghĩa jang. Drei caong khin taong abih dom urang jaoh jo hu jien mek tame, meda yam tagok saong ngak dom bruk yau urang, tự tin tagok”

Tamat dự án jak jeng, maong mboh khả năng di anai jaoh jo rilo nghị lực Nguyễn Thị Hiên, kapul urang njauk jru mek kalik truac /dioxin tỉnh Đồng Nai hu ba adei tame ngak bruk. Di labik ini, Nguyễn Thị Hiên daok brei mboh labik dang saong khả năng di drei tuk yaih khan ka yaok pluh urang jaoh jo duah hu bruk ngak, tani tanat raidiuk, daong saong peih dom kapul nyaom halan hatian brei ka urang jaoh jo mein, klah rabha dom kan kandah, dom bui sambai jeng yau dom duh hatai dalam raidiuk. Anai gam nao ngak gam nao bac melam piah mek bằng đại học. Amuk Đào Nguyên, akaok kapul urang njauk jru mek kalik truac /dioxin tỉnh Đồng Nai ndom lac : “Nguyễn Thị Hiên lac urang thau kham merat, yaom lac pren yava oh siam yau urang karei, min ngak bruk biak hu trách nhiệm”

Anai kumei sit saong dua gah takai oh siam harei harei jeng gam saong sruh radaih patuh klauk baok tapa yaok pluh mbaik jalan piah taom gaok, ndom biai, klah rabha saong pachreih ba dom urang yau drei tabiak truh bruk ám ảnh tự ti, duah mai tal raidiuk ý ngĩa. Kadha yam tagok kan kandah di anai kumei jaoh jo Nguyễn Thị Hiên sa mbang tra brei mboh, urang jaoh jo oh njauk lac urang klak saoh, bo  yaok sa urang jaoh jo meng nghị lực meda dang tagok meng dua gah takai di drei.

Thúy Linh