Jaik 2 bilan ini mai, meng harei TQ padang giàn khoan sung hukum dalam bhum tasik di VN, dom urang kiểm ngư, cảnh sát tasik tuk halei jeng hu mbaok di labik pandiak HS piah đấu tranh, piah phản đối bruk ngak phi pháp di TQ. Dang gah likuk dom urang nan, lac dom urang diuk harei melam daok cang maong, theit hatai tuk pang mehit lac kapal kiểm ngư njauk kapal TQ nyu paoh angaok tasik. Dom urang diuk nan thau lac, drei ini lac labik pa-ait piah ka dom urang pasang sanang hatai ngak bruk angaok tasik. Saong taphia urang daok hu bruk klah rabha di triệu triệui menuac. Urang vak Đình Thiệu daok di bhum kreih negar hu kadha vak ndom ka nghị lực di dom urang diuk kiểm ngư.

 Dalam hẻm sit di phường Thọ Quang, quận Sơn Trà, ban sit Đà Nẵng, duk pah daok sit nan lac tổ ấm di diuk pasang ranaih umo Đặng Thị Phúc Thùy saong urang kiểm ngư Mai Văn Diệp. Saai Diệp daok ngak bruk angaok kapal KN 629 chi đội 3, chi cục kiểm ngư bhum 2. Meng 3 thun ini mai, Thùy njauk ruak ung thư tuyến giáp, 3 bilan sa mbang, saai brei tabiak HN iek ruak. Sa drei gam raong anek gam iek ruak kan kandah, saai dak harei dak glaih glar, livang lavaih min jeng mboh hadah mbaok meta tuk ndom tal pasang likei di drei. 

Saai Thùy khan lac, harei 30/5, saai Diệp saong dom đồng nghiệp ba kapal KN 629 meng bhum tasik HS mai tame gah piah ngak pasiam veik. Saai tranh thủ vaih tame rivang diuk anek. Saai Diệp kua diuk saong anek kamei dalam tangin, sanya ba anek nao me-in harei dunya uranaih 1/6. Yau nan bo melam nan, tuk kuhria ba anek nao me-in ye saai taduan hu lệnh tagok jalan, gilac veik HS ngak bruk. Harei taduan hu sổ tiết kiệm yaom 50 triệu đồng meng dom urang ngak pahla dalam taneh ia daong brei, saai haok ia meta. Saai hia kayua druc drui anak yaom jien, pandap bo saai taduan hu nan nyu ndung bak hatai anit ranam di dom adei sit, dom saai pablei ve chai, rai diuk gaok tuk daok kan kandah jang drei.

“Biak thau dhar phol dom hatai anit ranam. Drei tuk halei jeng bui sambai min gaok tuk ruak kik pandik pandua, anek ruak drei mboh tủi thân. Drei hu sanya dalam hatian lac kham merat piah ka pasang sanang hataai ngak bruk. Kayua nan lac bruk hadah mbaok meta di baoh sang”.

Daok sa palei saong saai Thùy, rai diuk di saai Nguyễn Thị Hạnh, diuk di urang kiểm ngư Nguyễn Quốc Khánh, nao angaok kapal KN 629 jeng biak kan kandah. Anek kamei kacua thun ini umo 5 thun, min takik hu gaok ame. Yaok mbang saai mai sang, nyu iek yau urang oh krein randap. Tal tuk krein bloh ye saai njauk tagok jalan. Harei diuk ndih tapui anek, saai Khánh jeng daok ngak bruk angaok tasik. Anek barau ndih tapui tabiak njauk ruak laka tanye, tuk trở trời nyu tok di thau gavao amaik kayua pandik. Urak ini, daok metian anek ka dua, saai Hạnh oh chắc lac saai Khánh hu mbaok dalam harei ndih tapui. Dom harei biển đông srau kadau, hatai saai jeng duh hatai, jeng mboh uan pasang: 

“sahneng mboh dahlau ye, kan kandah yau habar jeng kham merat yam tapa. Kham merat ngak siam bruk  di urang diuk, urang amaik. Kham merat lac labik pa-eik  khang kajap piah saai Khánh sanang hatai”.         

Dalam chi đội 3 kiểm ngư bhum 2 urak ini hu 20 baoh sang urang kiểm ngư gaok kan kandah, sang kan kathaot, hu urang daok ruak kik, hu urang njauk ung thư, anek ruak, amaik ame jeng njauk ruak, njauk pah sang daok min dom saai jeng hu sa hatung hatai yau gauk nan lac biak giàu nghị lực. Ong Đoàn Thanh Lâm, urang dang akaok Chi đội 3 Kiểm ngư bhum 2 ndom lac: meng harei TQ ba padang giàn khoan HD 981 sung hukum dalam bhum tasik di VN, đơn vị taduan hu biak ralo hatai anit ranam di bhap bini dalam taneh ia.

“Ngan song kiểm ngư kol dahlak, xác định hậu phương kol dahlak nan lac negar VN,  lac 90 triệu bhap bini VN,  lac baoh sang, diuk anek, oh thei var hu. Meyah var ye oh thei praong jeng menuac hu. Kayua yau nan ye, ngan saong urang diuk, pasang nao atah min oh thei ndom lac pasang drei yau nan bo drei rambah,, diuk pachreih pasang di drei gah langiu tasik brei ngak siam bruk di drei”.          

Dom harei biển đông dậy sóng, yaom lac dom kapal TQ hang hăng, paoh, pruh vòi rồng, ralo kapal njauk khut trak, urang kiểm ngư njauk rambuac min dom saai oh huac, daok khang hataihu mbaok đấu tranh phản đối TQ ba padang giàn khoan sung hukum. Daok angaok gah, urang diuk, urang amaik yaom lac duh hatai min urang tuk halei jeng lac hậu phương khang kajap piah pasang likei, anek bhik di drei sanang hatai ngak bruk, khik caga chủ quyền tasik VN./.