Pathau mikva saong taong abih gauk! Daok dalam dom baoh sang hu yaom yaok rituh triệu đồng, hu sang tal sa tỷ đồng, min bruk muan kathaot veik di dom baoh sang ini daok hu mboh,  hu  sang daok kurang mbang. Ini lac bruk di labaih 70 baoh sang bhap bini dalam khu tái định cư danao thủy điện Đăc-rinh, huyện bhum ceik Sơn Tây, tỉnh Quảng Ngãi. Kadha vak di Anh Vinh, urang pambuak bruk saong rayo sapng ndom Việt Nam brei thau ka bruk ini:

Langiu bruk kurang taneh pala drak, bhap bini oh thau kuhri kuhria pandar jien bayar jeng lac makna ba tal bruk ini.

Saai Đinh Văn Lang brei thau, sang hu 5 urang, meng tuk tame daok labik barau, sang danaok padang ngak khang kajap min rai diuk gaok ralo kan kandah kayua oh hu taneh pala drak, daok jien bayar ye pandar cai abih: “Hamu puh di drei lahik abih, daok dalam lồng hồ. Drei nao ngak pah diuk tapa harei”.

Labik tái định cư palei Nước Lang, xã Sơn Dung, huyện Sơn Tây, lac labik daok barau di labaih 70 baoh sang bhap bini dalam bhum dự án thủy điện Đắc - rinh. Tuk mai ini, dom baoh sang taduan hu sang daok, jien bayar saong jien daong salih bruk ngak mbang. Kayua oh hu bruk ngak mbang, oh hu taneh apal drak nan ye dom jien taduan hu, bhap bini hu pandar cai abih.

Ong Đinh Văn Nhóc, akaok palei Nước Lang, brei thau, rai diuk di labaih 70 baoh sang bhap bini ngan saong jaik 300 menuac di labik ini daok gaok kan kandah: “Rai diuk oh tani tanat. Ka sa lac jien bayar, salih bruk ngak mbang hu cai abih. Bhap bini mai daok dalam sang bo oh hu taneh piah ngak mbang. Ralo meng lac nao ngak pah piah diuk tapa harei”.

Oh hu taneh pala drak, oh hu bruk ngak, ralo dam dara klak palei nao ngak mbang atah atau tame jah glai ngak puh.

Tui ong Đinh Quang Ven, Phaok akaok UB bhap bini huyện Sơn Tây, ye ba bruk ngak ka mikva di labik tái định cư Nước Đang lac bruk oh mbuan./.