Thaik thaok sit sot, samar tangin takai, drah cambuai dalah,nan lac dom hagait khaol dahlak mong mboh tuk taom gaok haong amuk Nguyễn Thị Dưỡng – Bí thư Chi bộ palei Văn Lâm 2, xã Phước Nam, huyện Thuận Nam, tỉnh Ninh Thuận. Labaih 12 thun ngak Bí thư Chi bộ, amuk Dưỡng tuk halei jeng abih hatai, patagok bruk ngak di sa urang đảng, bí thư chi bộ, abih hatai haong bruk ngak di puk palei.

Meng thun 2005 tal urak ini, amuk Nguyễn Thị Dưỡng hu mikva palei Văn Lâm 2, xã Phước Nam, huyện Thuận Nam pok ngak Bí thư chi bộ palei. Palei Văn Lâm 2 hu jaik 360 baoh sang ngan haong 1.730 urang. Taong abih bhap bani di palei ini lac urang bangsa Cam. Dom thun jaik di ini, rai diuk di mikva dalam palei hu cakrok patagok, an ninh trật tự hu khik kajap, bhap bani sahanang hatai ngak mbang pala drak, patagok kinh tế baoh sang. Hu yau harei ini, meng hu bruk sami samar, thau ba dom jalan ngak di pakat angaok tame dalam rai diuk njauk haong hatai bhap bani di chi bộ palei, dalam nan hu amuk Dưỡng. Amuk kham merat pathau khan jak ba mikva patagok bruk ngak mbang kinh tế, patruh eik patrun kathaot, dak padang rai diuk ilamo di labik daok... 

Tukvak tapa, Văn Lâm 2 lac sa dalam dom labik gaok kan kandah trak kayua biến đổi khí hậu. Bruk ngak ngak nong jeng gaok oh takik kan kandah. Piah yam tapa dom kan kandah, grap tanat rai diuk ka mikva, amuk haong chi bộ kham merat jak ba dom baoh sang salih phun pala, janih raong, pandar ilamu khoa học kỹ thuật, ba dom janih pajaih phun pala hu năng suất, kein laba glaong,lagaih haong bruk biến đổi khí hậu yau: phun trôm, phun xoan, raong limo palimek... Dalam palei hu labaih 200 hecta pala phun, hu tapol pabe, pabo, limo labaih 7.000 drei. Meng nan, jien mek tame kuhria rah tapa di ralo baoh sang dalam palei meng 50 tal 100 triệu đồng yaok thun, 60% baoh sang hu ginup, meda. Urak ihi dalam palei daok tok 5% baoh sang kathaot. Khan ka dom ilamu piah hu dom siam mekre yau nan di palei Văn Lâm 2 dalam nan hu bruk rik daong di amuk, amuk khiêm tốn lac. 

Dom bruk ilamo, daoh tamia, thể dục thể thao saong khik ramik dom ilamo meng kan tuk halei jeng hu urang Cam palei Văn Lâm 2 khik ramik saong patagok. Palei hu labaih 80% baoh sang mek hu angan baoh sang ilamo saong hu pok brei angan lac labik hadah ilamo pakat huyện. Hu yau nan njauk ndom tal dom rik daong di amuk Dưỡng. Ong Nguyễn Văn Thái, Phaok bí thư Đảng ủy xã Phước Nam, huyện Thuận Nam ndom ka amuk Dưỡng yau ini: Amuk Nguyễn Thị Dưỡng - bí thư chi bộ, lac urang kumei Cam. Dahlau diah, amuk lac urang jaka xã tal thun padeih hưu, amuk daok hu mbaok tame bruk ngak di puk palei luac 12 thun ini mai. Dalam bruk ngak, amuk Dưỡng tuk halei jeng abih hatai jai, jaik taphia bhap bani, hu ayut sahabat saong mikva dalam palei anit ranam”.   

Tapa dom rik daong di amuk Nguyễn Thị Dưỡng, ralo thun gam hu Đảng ủy xã, Huyện ủy Thuận Nam pok meyaom ka dom bruk ngak hu siam mekre dalam dak padang Đảng. Thun 2016, amuk lac sa dalam dom bí thư hu pok meyaom dalam Nyaom biai pok meyaom dom bí thư chi bộ cơ sở naih gheih pakat huyện./.