12/11 - Nguyễn Thị Tố Nguyên

– cô gái trẻ đam mê nghệ thuật tài tử

Pathau mikva saong taong abih gauk! Nguyễn Thị Tố Nguyên urak ini lac phaok kapul pathau khan lưu động di pasak ilamu tỉnh Hậu Giang. Barau ini, Tố Nguyên mek hu giải nhất đơn ca cổ di mbang pakacah “sap daoh papar sap papar binguk tỉnh Kiên Giang mbang 22 thun 2014”. Urak ini Tố Nguyên daok pambuak haong kapul saong pasak ilamu tỉnh Hậu Giang daok pasram  ka dom bruk daoh tamia meda rah tabiak dalam danak dak harei pataom ilamu khmer nam bộ 2014 kayua Hậu Giang dang tabiak peih ngak:

Nguyễn Thị Tố Nguyên ndih tapui thun 1984, palei daok di xã Long Thạnh, huyện Giồng Riềng, tỉnh Kiên Giang. Sang hu 7 adei saai, Tố Nguyên lac anek kamei taluac. Dalam sang oh hu thei tui bruk daoh tamia, min Tố Nguyên biak takre daoh tamia meng sit, abih di nyu nan lac daoh tài tử. Mboh Tố Nguyên takre daoh tui tapa rayo, sa nghệ nhân urang nông dalam xã pato jalan phân nhịp, pang đờn, daoh dom điệu lý saong bài bản sit. Umo 12 thun, Tố Nguyên hu pasak ilamu xã thau saong pato pabak piah nao pakacah giải văn nghệ phong trào. Meng nan, di sang bac, di xã, di huyện saong tỉnh Kiên Giang, urang bhian mboh sa uraniah kumei mekre iek, hu sap daoh siam angan Tố Nguyên lambaok ka puk palei nao pakacah dalam dom mbang pataom pakacah daoh tamia.

Thun 2005, Tố Nguyên bac tamat THPT saong panduan nao ban sit Vị Thanh, tỉnh Hậu Giang tui sa urang gauk gar piah bac trung cấp chuyên nghiệp, bloh bac đại học tài chính kế toán kayua sang bac đại học thủy sản Nha Trang peih liên thông saong sang bac chính trị tỉnh Hậu Giang. Hu ilamu dalam bruk daoh tamia meng sit nan ye dalam luac tukvak bac di Vị Thanh, Tố Nguyên gam gam lac urang pambuak bruk abih hatung hatian, hadei di nan lac thành viên chính thức saong hu brei ngak phaok kapul thông tin truyền thông di pasak ilamu tỉnh Hậu Giang. Urak ini Tố Nguyên bac tamat bloh đại học gah kế toán min pilih ruah jalan nao ka drei nan lac sân khấu saong bruk ilamu daoh tamia di Hậu Giang. Langyah ka quyết định di drei, Tố Nguyên lac:

“Tuk camereip jeng saneng lac tamat ĐH bloh salih bruk ngak kayua diễn viên tal tuk taha, jhak, daoh oh daok bingi pang tra. Min dom cei dom wa dom saai nao dahlau ndom lac  umo halei jeng hu vai diễn lagaih nan ye adei oh klak hu bruk ini. Ka sa lac drei takre, ka dua lac bruk ngak drei yam tame ye brei kham merat ngak siam”.

Duah thau bruk ngak di Tố Nguyên, kol dahlak meng mboh: yaom lac diễn viên di pasak gam saong ralo bruk pasram, pakacah, sinh hoạt dom klup kapul tài tử, nao parang me-in di puk palei saong taom gaok ndom meyai nao mai min Tố Nguyên tuk halei jeng kham merat hu mbaok tame dalam dom mbang pakacah ca cổ, sân khấu cải lương. Tui nan, 10 thun ngak diễn viên, tài tử, jeng lac thí sinh dalam yaok pluh mbang pakacah phong trào saong chuyên nghiệp, mek hu huy chương pariak di Festival đờn ca tài tử pakat negar mbang ka sa, giải diễn viên xuất sắc di abih Harei pataom pakacah pathau khan ilamu nao mai angaok jalan mbak dalam taneh ia saong giải nhất đơn ca cổ Sap daoh papar sap papar binguk tỉnh Kiên Giang… Bruk jak jeng di Tố Nguyên hu bruk daong ba di pasak ilamu tỉnh Hậu Giang. Saai Lê Thành Vĩnh – phaok giám đốc pasak ilamu tỉnh Hậu Giang brei thau: meng áp lực saong bruk kham merat yam tagok di yaok menuac urang tapa dom mbang pakacah dak harei dak ngak ka Tố Nguyên saong yaok diễn viên hu trưởng thành jang, takre saong khang kadang jang dalam daoh tamia:

  “10 thun ngak bruk, meng sa diễn viên quần chúng tal urak ini Tố Nguyên hu angan je dalam tỉnh Hậu Giang, jeng yau dalam khu vực…hu mbaok tame dom mbang pakacah  dalam taneh ia. Gam saong kapul mek hu ralo thành tích”.

Urak ini Tố Nguyên daok caong khin hu mbaok tame bac gah đạo diễn sân khấu piah pabak siam ka bruk ngak di drei di pasak ilamu tỉnh. Takre saong kham merat, urang kamei ranaih umo angan Tố Nguyên daok rik daong ka bruk daoh tamia di bhum taneh Hậu Giang, taphia di nan daok khik ramik, patagok ilamu meng kan dalam rai diuk di dam dara harei ini./.