Ủy ban bhap bini huyện Ninh Hải song gilang pariak ngak nong song patagok palei pala tỉnh Ninh Thuận bahrau peih bruk hạ thủy song peih pakak kapan Dịch vụ Hậu cần Việt Anh di urang tong ikan angan Nguyễn Đức Hải daok di xã Thanh Hải, huyện Ninh Hải. Sruh kapan atah labaih 21m, gar 5m7 m, công suất labaih 500 CV, saong yaom jien ngak abih jiak 8 tỷ đồng. Ni jeng lac sruh kapan camereip di tỉnh Ninh Thuận hu ngak tui sarak 67 ka bruk patagok kaya ikan. Dok urang tong ikan angan Nguyễn Đức Hải mboh biak hadah mbaok meta kayua lac urang camereip di tỉnh Ninh Thuận hu ngak pô sruh kapan hậu cần prong, bahrau song cong khin kapan prong jamriak khang meda dong ka sa-ai ngak mbang hu kein laba jang.

Hulin uan tabuan lô song sinya pandar siam sruh kapan piah patagok kinh tế sang, ka dua lac bayar sre ka karja.

Urang tong ikan angan Lê Minh Trí daok di xã Thanh Hải, huyện Ninh Hải jeng dok caga taduan mek sruh kapan tong ikan kayua Viện Roh duah ngak kapan, Đại học Nha Trang ngak. Kapan hu ngak meng composit, atah labaih 22 m, gar 6 mét meteh, công suất labaih 829 CV, yaom jien ngak jiak 14 tỷ đồng song tui kuhria hu hạ thủy dalam bilan 12 tal. Sang saai Trí hu caga ginup menuac saong pandap panda, cang tal tuk kapan hu ngak bloh ye tabiak tasik njauk tuk vak tong chap ikan Bấc. Saai Trí brei thau

Mboh biak bui sambai, kayua sang hu 2 sruh kapan dahlau lac 325CV song 280 CV min tong chap jiak takai tasik oh kein laba. Urak ni gilang pariak brei mesraiy tui sarak 67 kapan prong jang nan ye nao tasik taong chap lavik harei piah hu kein laba jang song dong khik caga chủ quyền tasik pulao.

Tal tuk vak ni, UB bhap bini huyện Ninh Hải hu pambuak bruk song gilang pariak ngak nong song patagok palei pala tỉnh Ninh Thuận taduan song peih jien brei ka 7 urang hu mesraiy jien tui Nghị định 67 di Rajaei. Dalam nan hu 1 urang mesraiy jien ngak kapan Dịch vụ hậu cần bruk ngak ikan song 6 urang mesraiy jien ngak kapan taong chap kaya ikan, hu công suất abih tih labaih 4000CV. Dom kapan ni hu công suất sit di abih lac 500 CV song prong di abih lac 830 CV, saong yaom jien hu peih brei mesraiy abih tih labaih 51 tỷ đồng. Dalam nan hu sa kapan hậu cần song 2 kapan ikan hu ngak di Viện roh duah ngak kapan, Đại học Nha Trang hu ba tame pandar dalam thun 2015 ni. Ong Lưu Xuân Hải - Phó chủ tịch Ủy ban bhap bini huyện Ninh Hải, tỉnh Ninh Thuận brei thau

Ub bhap bini huyện Ninh Hải bhian tacei pato, pambuak bruk song dom gah pathau khan jak ba mik va ka makna, jalan ngak di sarak 67 song ba mbuan lagaih ka urang tong ikan hu mesraiy phun jien. Kayua yau nan ye, dalam thun 2015 ni huyện Ninh Hải hu 3 sruh kapan tabiak tasik nan lac kapan di saai Hải, saai Trí song saai Mười. Tuk tabiak tasik 3 sruh kapan ni hu dong patagok pren tong ikan ka huyện Ninh Hải, dong patagok kinh tế jang yau dong khik caga chủ quyền tasik palao di taneh ia.

Huyện Ninh Hải urak ni lac labik nao dahlau di tỉnh Ninh Thuận dalam bruk peih ngak sarak 67 di rajaei ka dom sarak patagok kaya ikan. Tapa nan, brei mboh bruk sangka di pakat ủy, karja dalam bruk pathau khan, lang talaih kan kandah, dong ka urang tong ikan hu mesraiy phun jien ngak kapan bahrau nao tabiak tasik atah, tong chap kaya ikan, dong khik caga chủ quyền tasik palao di taneh ia./.

                               Cộng tác viên Văn Cảnh-Hoài Hương-A Xuyên