Urang nong dok kurang ia pandar dalam bilan pandiak 

Ong Huỳnh Tuấn Anh, paok akaok jabat ngak nong saong patagok palei pala huyện Ninh Phước, brei thau: Piah cak rok patagok bruk ngak nong tui jalan khang kajap, huyện brei salih janih phun pala takik ia di dom labik bhian njauk tua riya pandiak bhang, mong ini lac jalan ngak lagaih, tacei pato pataom tame ngak. Tui nan, huyện hu ba tabiak jalan salih cambaih laih ka yaok bilan pala, jao chỉ tiêu ka dom xã, bal sit peih ngak. Taphia di nan, gah ngak nong  huyện daok pataom tame padang ngak dom bruk pala drak hu kein laba; kham merat jhul khang bruk pathau khan, pasang iek, yaok pataom dom mblang taneh pala drak takik kein laba piah jak ba urang nong salih tapa pala dom janih phun pala hu yaom glaong, pambuak pagam haong darak pasar. Tapa duah thau, dalam bilan đông - xuân 2019-2020,  huyện hu salih meng taneh ngak padai, taneh tanu tambok saong dom công trình ba aia pruh tapa pala tangeiy, ratak naih, hareik raong limo… hu 77 ha. Mong rah tapa dom mblang taneh salih phun pala jeng ba mai kein laba, daong ka urang nong trun takik bruk klaak taneh balau dalam bilan pandiak bhang.

Phước Thái lac sa dalam dom xã nao dahlau dalam bruk salih phun pala meng taneh ngak padai takik kein laba tapa phun pala takik ia. Ong Đàng Năng Tom, Bí thư, Akaok UBND xã Phước Thái, brei thau: dahlau diah, dom labik pala drak di mblang taneh jaik binek Tà Ranh, Trạm bơm 1 saong Trạm bơm 2 daok dalam dom palei Tà Dương, Đá Trắng bhian kurang aia dalam bilan pandiak bhang, nan ye bruk pala drak di mikva gaok biak rilo kan kandah. Piah plaih bruk klaak taneh thaoh, xã hu pathau khan tal dom baoh sang ka bruk tua riya pandiak bhang, taphia di nan pataom tame pasang iek veik yaok labik piah salih janih phun pala ka nyu lagaih, khik tani tanat bruk pala drak ka mikva. Xã hu jak ba mikva di dom labik oh ngak padai salih tapa pala tangeiy, ratak naih, hareik brei ka limo mbang piah patak pataom aia pruh, ba jien mek tame ka mikva. Kurhia ta-eng dalam bilan đông – xuân 2019-2020, xã jak ba urang nong salih hu 10 ha taneh ngak padai tapa phun pala takik ia pruh. Tapa nan, patrun bruk caong hu aia pruh dalam bilan pandiak bhang, saong daok paglaong yaom jien mek tame angaok sa mblang taneh.

Meng bruk kham merat di karja xã Phước Thái, urang nong hu paglaong akaok saneng, ba dom janih janih phun tamuh hu dalam pandiak bhang salih ka phun padai, ba mai jien mek tame tani tanat. Ong Võ Văn Tin, palei Đá Trắng, brei thau: dahlak hu 3 sào taneh ngak padai, min tame bilan thu tua riya pandiak bhang bhian kurang aia pruh, tuk xã trun jak ba, sang ong hu  salih taong abih mblang taneh tapa pala tangeiy pambuak haong Công ty Cổ phần pajaih phun pala Đông Nam. Meng bruk ba aia pruh laghaih, hu tacei pato ilamu mong iek, mblang taneh pala tangei cak rok siam,  paik hu 7 tạ sa sào, ngan haong yaom pablei urak ini lac 8.500 đồng sa kg, kaoh abih phun jien buh tame daok laba hu jaik 5 triệu đồng sa sào, glaong jang 2 mbang dut haong ngak padai.

Langiu di dom janih phun pala katut panak harei yau phun tangeiy, ratak naih, hareik raong limo, dalam huyện daok hu salih tapa dom janih phun pala bahrau yau: kruac bhung kalik hujao, la-u xiêm, kandiuk …ngan haong mblang taneh labaih 10 ha, akaok mereip ba mai kein laba glaong. Taphia di bruk peih ngak samu gauk dom jalan salih janih phun pala, huyện daok jak ba dom doanh nghiệp, dom hợp tác xã jhul khang bruk mboh tangin pambuak bruk tui jalan buh jien tame ngak saong blei veik pandap panda ka urang nong. Tapa nan, ngak brei ka urang nong bui hatai peih prong taneh salih phun pala, paglaong jien mek tame.

Bruk jhul khang salih janih phun pala tukvak tapa dalam huyện Ninh Phước hu daong ka dom labik bhian gaok kan kandah kayua tua riya pandiak bhang dahlau diah jeng dom mblang taneh pala drak tani tanat, daong ka urang nong taom gaok hu dom jalan ngak bahrau, meng nan ngak jeng dom labik pala drak praong tui jalan khang kajap. Ong Nguyễn Hữu Đức, Phaok akaok UBND huyện Ninh Phước, brei thau: Meng dom siam mekre mek hu, dalam tukvak anak tal, huyện daok pasang iek taneh pala padai takik kein laba, bhian kurang aia pruh salih tapa pala dom phun tamuh hu dalam pandiak, phun mbang baoh, piah patagok jien mek tame ka urang nong; taphia di nan, tacei pato urang nong salih phun pala ka nyu lagaih haong taneh riya yaok labik; padang dom bruk ngak mbang pala drak hu kein laba, khik bruk bruk pambuak gauk haong dom doanh nghiệp dalam bruk pala drak saong blei pandap piah paglaong yaom jien phun pala./.

Urang lang: Jasi -4/5