Piah tui bruk siam lagaih di drei, jalan ngak di huyện Ninh Sơn lac pasang iek veik bruk ngak mbang, pala drak, pilih ruah dom janih phun pala di bhum ceik piah cakrok patagok praong, ngak hu rilo pandap panda piah pabak ka darak pasar dalam taneh ia.

Meng bruk ba tabiak jalan patagok njauk jalan, tal urak ini huyện padang hu bhum phun mbang baoh di Lâm Sơn, bhum nho piah ngak alak vang di xã Mỹ Sơn, bhum pala tabau, bei plom di xã Quảng Sơn, Hòa Sơn praong abih dalam tỉnh. Huyện hu sangka ngak biak siam dom bruk pala drak lagaih haong yaok bhum, ini lac kadha praong piah ka dom kaya nong di huyện nyu karei jang, hu pren meriak gauk angaok darak pasar. Pamaong tal bruk paglaong yaom di baoh kayau, Huyện ủy Ninh Sơn hu tabiak sarak ka bruk cakrok patagok bhum phun mbang baoh di Lâm Sơn pambuak haong du lịch sinh thái,hu ngak brei salih karei jalan sản xuất, pala drak. Meng hu bruk daong di huyện, urang nong hu ngak pasiam veik bein phun mbang baoh, pala pabak dom janih phun hu yaom kinh tế glaong. Tapa nan, hu 70 sang hu mbaok tame bruk pasiam veik bein, ngan saong taneh praong abih tih lac jaik 20 ha, saong bruk ini daok hu pambak praong, tui jalan lac tal thun 2020 hu 400 ha.

Oh caik ka urang nong eng drei having akaok duah jalan, huyện hu sarak dui pachreih doanh nghiệp mai buh jien sản xuất dom janih phun hu pren khang, siam lagaih. Pala nho tui công nghệ Châu Âu di Công ty TNHH Ladora Farm Ninh Thuận nyu brei mboh bruk Huyện ủy, UBND huyện Ninh Sơn pan akaok ba jalan hu kein laba dalam bruk dui pachreih urang buh jien tame ngak mbang gah ngak nong, tapa nan pandar hu siam taneh riya di bhum ceik piah cakrok, patagok. Meng bhum taneh mbuan ceik pala drak takik hu, doanh nghiệp pasiam veik piah pala nho tui ilamu công nghệ glaong hu paglaong yaom pala di sa mbalng taneh tagok jang rilo mbang dut saong pala tangei, ratak…dahlau daih. Bruk pala nho piah ngak alak vang daok tagok glaong jang, tuk urak ini công ty daok peih praong bruk pala drak pambuak haong bruk raok tuai du lịch mai ravang bein, menyum iek alak vang nho pak di labik. Gam saong nan, bruk pala bingu lan dalam nhà lưới pandar công nghệ glaong di xã Lâm Sơn jeng brei mboh doanh nghiệp hu rik daong praong dalam bruk ngak brei medeih tagok pren khang piah patagok khang kajap. Meda lac, dalam tuk patagok, Ninh Sơn tuk halei jeng caong peih praong meta maong, duah thau dom jak jeng di ilamu saong công nghệ bahrau di dom taneh ia lingiu piah salih bahrau, ngak brei siam jang.

     Meng hu bruk daong di Tập đoàn CJ (Hàn Quốc) dalam bruk padang ngak Sang mac chai meriak hu dây chuyền ngak bahrau, huyện Ninh Sơn jeng labik nao dahlau di taneh ia dalam bruk padang hu jalan ngak nong hacih meng trun pajaih, glang iek, paik mek, chế biến tal tame kadung pandap ba tabiak darak pasar pablei. Piah khik kajap nguyên liệu ka sang mac ngak bruk saong pren khang lac 90 tấn meriak tapung sa thun, huyện daok brei pasang iek, peih praong bhum pala ameriak, peih tabiak jalan ngak kaya meda bahrau ka urang nong dalam huyện. Oh padeih di labik nan, huyện jeng daok jhul khang bruk peih praong taneh pala dom janih phun chủ lực; dalam nan mboh lac phun pa-ok blait hu siam lagaih di bhum ceik, pataom tame ieu da-a doanh nghiệp buh jien tame cakrok patagok piah paglaong raidiuk ka bhap bini, abih di nyu lac bhap bini bangsa takik. Urak ini, Hợp tác xã Điều hữu cơ Truecoop Ninh Sơn daok pambuak bruk haong huyện peih pasang iek, pilih ruah dom sang tame pambuak bruk pala pa-ok blait, sanya blei, sản xuất saong chế biến tui jalan hữu cơ, khik ka pandap mek hu tanut di châu Âu.

 Jak jeng dalam bruk cakrok patagok du lịch nông nghiệp di Ninh Sơn peih tabiak jalan ba jien tame biak rilo ka urang ngak nong, biak njauk ka dom labik karei bac megru, ngak tui./.