Ninh Thuan – alamu khik ia bilan tuariya

Pathau mikva saong grauk yut !

Dalam bilan pandiak bhang, bruk pataom mek ia daok hu biak takik piah khik bruk pala drak  hu bhap bini dom puk palei pataom tame ngak. Ralo labik, bhap bini hu saneng tabiak dom jalan ngak piah khik ia pala drak. Kadha vak hadei ini di urang pambuak bruk haong rayo sap ndom daok di tỉnh Ninh Thuận hu daong ka kol drei thau cambaih jang ka bruk ini.

Dom harei tapa, piah daong labaih 55 ha padai daok kurang ia pruh di bhum gah ala ribaong di palei cuah patih (Thành Tín), xã Phước Hải, huyện Ninh Phước, rilo urang nong hu sahaneng tabiak bruk pandar kadung cuah nilon piah pacang ia nduac di ribong Ốc Rọ, oh caik ka ia nduac tabiak tasik, khik ia pruh daong ka phun padai. Nan ye rilo taneh padai di mikva hu ia nduac tame hamu hadei di 10 harei kurang ia pruh. Ông Châu Tím, xã Phước Hải, huyện Ninh Phước, tỉnh Ninh Thuận lac  : Bhapbini eng drei ba kadung nao pacang ribong  Ốc Rọ mek ia tagok piah pruh ka padai. Nan ye  bilan đông xuân thun ini meng khik hu bineih ini, ia meng akaok vụ tal urak ini meda lac hu ginup. 

Piah hu ia pala drak, mikva palei Katuh (Tuấn Tú), xã An Hải, huyện Ninh Phước hu rilo jalan caga pandiak bhang, dalam nan hu bruk di anak meta lac paglaong đập dâng Tuấn Tú piah khik ia saong ba ia nao labik pala drak. Bruk ini tuk camereip mboh hu siam lagaih. Mbaok bineih hu pok tagok jaik 50 cm meng bê tông khang kajap, taphia nan pandar kadung cuah piah pacang ia, ngak ka ia  tagok glaong ba nao pruh ka jaik 100 ha taneh ngak nong labik ini. Ông Bùi Thế Ly - Phó akaok Uỷ ban hapbini xã An Hải, huyện Ninh Phước, tỉnh Ninh Thuận ndom lac: Di xã An Hải hu binek Tuần Tú ba ia pruh ka 100 ha padai, njam patam saong dom janih phun livik thun karei. Piah khik hu ia ka bhum ba ia di binek Tuấn Tú tal urak ini, yaom lac kurang jang dahlau min meng hu pok binek piah ba ia tame, khik ginup ia pruh ka labaih 100 ha.

Di bhum thulagu xã Mỹ Sơn, huyện Ninh Sơn, saai Đào Văn Tuấn hu buh tabiak 70 triệu đồng ngak 1 đập tràn tapa kraong Hòn Dồ khik ia, ngak 300 mét jalan ống ba ia tame apuh pruh ka phun pala. Taphia nan, saai daok klah rabha ia pruh ka dom sang daok jaik nan. Anak bruk panidak bhang dui atah ba tal kurang ia pruh , bruk ngak đập tạm thời ini hu daong saai saong bhapbini bhum ala baok ribong hu ia pala drak ka labaih 20 ha taneh. Saai Đào Văn Tuấn brei thau : Siam lagaih anak meta lac drei pacang veik, khik ia veik piah plaih ia nduac tabiak ribong. Khi ia ka sang pandar saong mikva angaok ini jeng pandar saong gauk di baok đập ini. 

Ông Phạm Văn Hường, Giám đốc Công ty Trách nhiệm hữu hạn sa thành viên khai thác công trình thuỷ lợi tỉnh Ninh Thuận taong yaom : Bruk  mikva  ngak  dom baok đập tạm angaok dom kraong, ribaong lac sa bruk  njauk pok meyaom saong dahlak sahaneng lac biak siam piah khik ia, mek ia nan pruh ka phun pala. Jalan ngak ini biak gheih saong biak siam dalam tuk pandiak bhang yau urak ini. 

Rajaei hu phê duyệt lac buh jien ngak đập dâng saong ribaong praong Tân Mỹ daok kham merat ngak piah duh ka bruk caga pandiak bhang, tua riya. Hadei di tuk ngak blaoh meda pruh tapak ka 6.800 ha taneh pala drak. Đập jeng ba ia ka danao Cho Mo, pabak ia pruh ka 1.200 ha taneh, ba ia ka danao Bà Râu, danao Sông Trâu saong lưu lượng ia 1,5 mét khối yaok giây. Tui kuhria, Công trình hu ba tame pandar di bilan 6 thun ini.

Lac puk palei thulagu di abih dalam taneh ia, bruk caik piah ia, khik ramik, pandar siam halau ia lac jalan ngak suai lavik piah Ninh Thuận pacang cakak saong tua riya./.