3 thun ini mai, kayua langik oh siam lagaih ngak ka bruk raong tathur hu takaiy di bhum urang Cam jeng yau di tỉnh Ninh Thuận gaok ralo kan kandah tavak tave. Abih di nyu nan lac jit ruak laka cambuai tapok kakau di tapol limo, thoái hóa pajaih angaok tapol pabe, pabo; kurang pandap mbang hijao ngak ka tapol pabo, pabe lavang lavaih, pablei oh hu yaom. Bruk ini, ngak ka ralo urang raong glang gaok ralo kan kandah, hu sang  njauk klaak trang trại, salih tapa bruk ngak karei atau nao ngak công nhân.

Khaol dahlak mai tal huyện Thuận Nam, sa dalam dom palei raong athur hu take prong abih dalam tỉnh, di dom harei akaok bilan Mat, hu mboh ralo trại raong pabo njauk klaak thaoh. Khaol dahlak taom gaok sa-ai Ninh Thị Mộng Thu daok mong iek jaik 45 drei pabo saong labaih 20 drei limo di sang drei pak mblang hamu xã Văn Lâm, huyện Thuận Nam. Tuk ini dom drei pabo di sa-ai daok menyum aia di dom labik daok kandaong ia veik, mbang hareik langiu mblang hamu hadei di dom harei hajan meng bloh. Sa-ai Thu brei thau, tuk mblang hamu daok hu hareik nan ye sa-ai palao pabo tabiak mbang, hu harei halei thau harei nan.

Oh ta-eng tapol pabo di sa-ai Thu, labaih 138 ribau drei athur hu take pak dom trang trại raong athur di huyện Thuận Nam jeng laik tame bruk kurang pandap mbang hijao trak kayua langik oh siam. Gam haong nan lac bruk thoái hóa pajaih kayua phối pajaih cận huyết nan ye tapol athur pak ini nyu lavang lavaih, suai praong dui tui bruk pablei oh hu yaom. Anak kan kandah ini, urang raong glang oh daok mbak carak haong bruk ngak, klaak bruk, salih tapa ngak bruk karei atau nao ngak công nhân di dom tỉnh.

Huyện Thuận Bắc urak ini hu tapol athur hu take labaih 40 ribau drei. Dalam nan ralo meng raong tui jalan sit sot nan ye bruk lai tạo, pasiam tapul daok lac bruk tui labik, ba tal bruk lai tạo cận huyết, pajaih njauk thoái hóa nan ye tapol athur suai prong, suai menek. Hu sang raong praong ye eng drei nao blei anek pajaih mai lai tạo, min jeng oh ka hu đồng bộ saong khoa học.

Meng thun 2007 tal 2010, bruk raong athur hu take nan lac: Pabe, pabo, hu mong yau pren khang di gah raong glang tỉnh Ninh Thuận jeng yau di bhum bhap bani Cam. Meng raong glang bo kinh tế di mikva Cam labik ini hu kaya meda tagok. Bahrau ini, tỉnh Ninh Thuận hu sangka tal bruk pala hareik, pabak kaya mbang di var ro, padang ngak dự án raong glang tui chuỗi giá trị meng mô hình pambuak bruk 4 sang nan lac: Karja, urang nong, urang khoa học saong urang pablei salih… min nyu oh ka samu gauk, oh ka gam gam saong oh ka ngak siam. Nan ye 3 thun ini mai (meng thun 2014 tal ini), anak dom kan kandah angaok nan, bruk raong glang di bhum bhap bani Cam daok dang anak dom kan kandah saong mbuan khat lihik.

Caong khin prong abih urak ini di dom baoh sang raong glang di bhap bani Cam nan lac bruk daong brei anek pajaih atau jien  phun di gah ngak nong piah ka mikva blei pajaih bahrau pasiam veik chất lượng athur raong; quy hoạch mblang taneh pala hareik piah pabak kaya mbang hijao ka athur; patagok mô hình pambuak pagam 4 sang, mô hình raong bán thâm canh. Hu yau nan, bruk raong glang di bhap bani Cam meng cakrok patagok khang kajap./.