Thun 2013, Công ty cổ phần Khoáng sản Sài Gòn hu UBND tỉnh Ninh Thuận brei adat kuac duah Titan di palei Nam Cương, xã An Hải, huyện Ninh Phước di angaok taneh praong 1 ribau 132ha tui rami ramik parabha bhum tui iek, kuac duah quặng Titan hu Rajaei pasang iek, brei ngak. Ini lac sa dalam dua doanh nghiệp hu Bộ Tài nguyên saong Môi trường brei adat kuac, duah Titan di xã An Hải, huyện Ninh Phước. Min hadei di sa tukvak kuac duah iek di mbalng taneh praong 2ha di mbuan cuah Nam Cương oh mboh hu hagait, puac thun 2014, đơn vị ini padeih abih bruk kuac, duah.

Ong Lê Văn Kỳ, sa urang daok di xã An Hải- h.Ninh Phước- t.Ninh Thuận brei thau: bruk ngak mbang ngak huak di sang ong saong dom sang karei daok jaik taphia nan gaok srau kadau meng di tuk mỏ titan hu peih tabiak ngak: Dahlau daih bruk kuac, duah titan di labik ini ngak kan kandah oh sit tal raidiuk kol dahlak, halau ia thu lagu, njom nerak, pala drak di labik oh jeng. Hadei di tuk ngak oh hu, dom cty klaak nao. Tal urak ini oh daok mboh cty halei kuac, duah titan tra. Bruk padeih duah Titan lac sa jalan ngak njauk, bhap bini kol dahlak biak uan tabuan.

Yaom lac cty padeih ngak min  bhap bini jeng daok dang anak dom kan kandah karei meng bruk kuac, duah Titan dahlau nan kayua ia njar takik, taneh, cuah dalam bhum kuac duah nan nyu glut, jaleih, hu rilo lubang dalam meng 4-5m, saong daok hu dom lubang dalam tal jaik 20m, praong yaok ribau mét vuông... Menuac sia nao mai labik ini meyah oh caik hatai ye mbuan labuh saong njauk mbuk cuah lam lahik.

Tui UBND xã An Hải, dalam hồ sơ tut angan kuac, duah Titan di xã, doanh nghiệp ini sanya oh ngak jhak hagait tal môi trường, oh ngak nerak halau ia, tuk padeih ngak ye ramik veik mbaok haluk ka nyu samu yau di tuk camereip. Yau nan min, urak ini tok daok veik dom mblang taneh glut jaleih, dom mbual cuah glaong. Di bilan hajan ia sua, ia nyu tuh tame dom mbual cuah ini, ba cuah tame tapak taneh pala drak di mikva , ngak khut njam patam saong rilo drap ar karei angaok mblang taneh ngak nong nan. Ong Bùi Thế Ly – Phó chủ tịch UBND xã An Hải brei thau: Hu dom labik tuk cty padeih ngak, klaak nao caik veik dom mbual cuah glaong ngak kan kandah tal bruk pala drak di mikva daok di gah ala. 

Bahrau ini, Rajaei hu tabiak Sarak ka bruk peih ngak dom cơ chế, chính sách đặc thù daong ka tỉnh Ninh Thuận patagok kinh tế - xã hội, tani tanat raidiuk, meng ini tal thun 2023. Thủ tướng Rajaei jeng hu tabiak quyết định brei padeih dom dự án kuac, duah Titan di Ninh Thuận padang ngak tỉnh thành pasak năng lượng tái tạo di taneh ia. Min anak meta, dom gah chức năng njauk samar hu jalan bayar veik yau tuk camereip ka mbuan cuah, plaih ngak tayah cảnh quan saong ngak khat lihik ka bruk pala drak di bhap bini, abih di nyu nan lac tuk bilan hajan ribuk daok mai jaik./.