-Tuk akaok mereip, kayua daok rilo kan kandah ka cơ sở vật chất, jeng ya menuac urang mong ye oh ka hu thei lac urang Cam ngak bruk dalam gah papar sap –papar binguk yau nan ye bruk peih ngak danakdak sap Cam di Ninh Thuan tok daa dom urang thau khar tapuk Cam  tame pambuak bruk langyah sap Cam veik dom tin, kadha vak hu papar meng sap Việt dalam dom bản tin thời sự di tỉnh tapa sap Cam, tukvak ini yaok adit tok hu dua danakdak papar binguk ngan saong tukvak 30 minit saong 4 danakdak paparsap ngan saong tukvak 15 minit sa danakdak. Gah ngak danakdak jao ka gah thời sự di rayo dang ngak.

-Piah ka bruk lang sap, biên tập dom danakdak sap Cam hu njauk, hu siam, meng thun 2003, tỉnh Ninh Thuận hu pilih ruah saong brei dom urang vak, biên tập viên, kỹ thuật viên urang Cam nao bac megru di sang bac Cao Đẳng Truyền hình Hà Nội. Urak ini, dom urang ngak danakdak sap Cam di rayo Ninh Thuận dak harei dak gheih. Rilo danakdak papar binguk sap Cam hu mbaok tame harei pataom papar binguk pakat negar mek hu giải glaong ye: kadha “Vũ điệu Chămpa”, giao thoa ilimo Chăm – Raglai, Taneh thulagu mbeik drei, dom danakdak tổng hợp sap Cam hu rilo huy chương ameh…

Rilo tan bac ka nghiệp vụ hu peih ngak yaok thun piah pabak dom ilamu ka dom urang ngak danakdak papar binguk sap Cam. Meng di nan bo bruk ngak di dom biên dịch viên, biên tập viên hu siam jang, gheih jang.

         -Urak ini, di Ninh Thuận, hu 3 urang vak, BTV lac urang Cam daok ngak dom danakdak paparsap saong papar binguk sap Cam lac Bá Minh Triều, Não Thanh Thắng saong Bá Văn Đoan Trang. Menuac takik bo ngak rilo danakdak papar sap papar binguk di puk palei saong pambuak bruk ngak danak dak ka VTV5 – rayo papar binguk Việt Nam 4 danakdak yaok bilan nan ye dom urang ngak danakdak sap Cam di Ninh Thuan gam lac urang vak gam lac urang ba danakadak, gam lac urang quay phim saong jeng lac urang bien tap, urang lang sap Cam. Ngak bruk yau nan gaok oh takik kan kandah, min rilo thun hamiet dom urang ngak báo di rayo papar sap papar binguk sap Cam di Ninh Thuan jeng gam gam ngak “ 3 dalam sa” yau nan.

-Tui urang vak Bá Minh Triều, peih ngak danakdak sap Cam sa drei lac sa jalan ngak anek meta daong ka dom urang ngak báo di puk palei yam tapa tukvak kan kandah ka menuac urang urak ini.Meng gam ngak rilo bruk saong bhian nao ngak bruk sa drei, gam quay phim gam ba danakdak di mblang ngak, gam vak kịch bản hu tuk gam dựng saong puac danakdak. Meng di nan, dom urang vak, biên tập viên urang Cam hu ba mai ka bhapbini lac bhapbini Cam hu maong, hu pang rilo kadha vak hu chất lượng glaong, rilo tin kadha vak pambuak pagam papar riyak angaok NTV, VTV5 saong dom rayo dalam bhuma. Tabhia nan hu rilo kadha mek hu giải di harei pataom phim papar binguk pakat negar saong harei pataom paparsap pakat negar. Urang vak Bá Minh Triều, rayo paparsap papar binguk Ninh Thuan brei thau dom kan kandah di dom urang ngak danakdak sap Cam di Ninh Thuan.

-Phóng viên Não Thang Thắng, dang ngak danakdak papar sap Cam di Ninh Thuan ye kan kandah akaok mereip bo dom urang lang sap Cam bhian gaok praong di abih nan lac lang habal ka ginup asal kadha min mbuan pang, mbuan thau piah mikva pang hu abih. Min hu biak rilo baoh panuac bo sap ndom saong akhar vak di urang Cam oh hu, njauk nyim sap Việt saong dom urang lang sap njauk pandar tal inelang. Min meng kham merat bac megru meng bhapbini di drei yau nan ye urak ini dom bruk kan kandah nan hu pasiam veik. Saai Não Thanh Thắng khan lac:

  -Dom danakdak paparsap saong papar binguk sap Cam di rayo Ninh Thuan dak harei dak hu mikva anit ranam. Jak jeng oh mai mbuan bo hu bruk kham merat di kapul nyaom. Ngak paparsap saong papar binguk lac kan paje, ngak danakdak sap Cam daok kan kandah jang, meda lac sahaneng hu bruk nan bo dom urang hu mbaok tame ngak danakdak tuk halei jeng kham merat yam tapa abih dom kan kandah piah rik pren tame bruk pathau khan tal bhap bini Cam hu siam lagaih.

-Yaom lac daok rilo kan kandah, min danakdak paparsap saong papar binguk sap Cam di rayo Ninh Thuan dak harei dak gheih, oh kurang hu ngan saong urang pang, urang maong rayo, abih di nyu nan lac ka bhapbini Cam dalam tỉnh. Tapa nan, dom danakdak sap Cam hu daong ka bhapbini thau hu thông điệp di danakdak saong tuk halei jeng lac jalan khau tin njauk, tin cậy di mikva dom bangsa takik di tỉnh Ninh Thuận./.