Meng bilan  8/2019 tal ni , tỉnh Ninh Thuận hu peih tal pato sap  Chăm ka  50 urang bac lac urang jakar, urang ngak bruk karja dok ngak bruk di dom puk palei hu rilo urang Cam daok.Muk Nguyễn Thị Thanh Huyền, Phó Hiệu trưởng Sang bac  Chính trị tỉnh Ninh Thuận – gah hu mbaok tame pato sap  Chăm brei thau, jalan ngak di danak dak piah dong ka urang bac thau ndom puac sap Chăm, thau vak akhar haroh Cham. Hadei di tuk bac bloh  khóa bac, urang bac pang hu, puac hu, nyai njauk, cih vak njauk sap Chăm.

Piah ka bruk pato pakai hu siam mekre, gru dang pato jeng lac urang Chăm dok ngak bruk di gah pato pakai, dom Sở, ngành daok padeih hưu saong hu ilamu gah pato pakai. Tài liệu pato pakai kayua  UBND tỉnh Ninh Thuận ba tabiak  song tuk vak pato song bac dalam 450 tiết hu 10 kadha meng 2 sap  Chăm - Việt nan lac: boh sang – but pajaih; puk palei; taneh ia – palei negar - dunya; palei Chăm dar phol  Đảng song Bác Hồ; langik tasik - môi trường; ngak bruk  - sản xuất; ilamu – pato pakai,  iek glang pren yava; khik caga taneh ia; ilamu  - hukum negar.

Hu mbaok dalam tal bac, ong Trần Xuân Phong, Bí thư Đảng ủy xã An Hải, huyện Ninh Hải brei thau: Bruk ngak biak jar var  min ong kham rami ramik piah hu mbaok tame tal pato sap  Chăm. Mbang akaok meti bac, mboh yau kan. Hu dom cei gru, anai gru abih hatai tacei pato, dom  học viên kham merat bac da-a, thau hu ka sap ndom, akhar vak, haroh cih, ilamu, adat cambat tanarakum di bhap bini Chăm piah ngak bruk hu siam jang.

Jeng piah thau hu sap ndom, akhar vak di urang  Chăm, muk Bùi Thị Lam, ngak bruk di  Sở Thông tin song  Truyền thông tỉnh Ninh Thuận brei thau, asar kadha danak dak  pato sap Chăm biak siam, biak lagaih, jiak song rai duik. Tapa tal bac, hu daong ka urang thau saong ndom nyai tapak meng sap Chăm, tui nan padang talei pambuak bruk haong mikva dak harei dak khang kajap jang .

Gru Lộ Minh Trại, urang dahlau deih ngak Trưởng Phòng Giáo dục – Dân tộc (Sở pato megru  tỉnh Ninh Thuận) brei thau: Tal bac rilo meng lac urang jakar, urang ngak bruk karja dok ngak bruk di dom puk palei  hu rilo urang Chăm dok  min oh thau rilo ka sap  Chăm. Tapa danak dak pato pakai ngan song 10 kadha, dom urng bac hu thau ka sap ndom, akhar vak, haraoh cih, ilamu Chăm. Meng kham merat bac da-a, hadei di tuk bac bloh khóa bac, dom  urang bac meda ndom nyai meng sap  Chăm piah pabak siam ka bruk ngak.

Yam tapa kiểm tra puac khóa ka bruk pang, thau, ndom nyai, vak, puac thau, học viên hu brei  chứng chỉ bac tamat khóa pato sap  Chăm. Thun 2019, langiu di bruk pato sap Chăm, tỉnh Ninh Thuận daok hu peih dom tal pato sap bangsa  Raglai song dom sap bangsa karei karei , palagaih ka urang jakar, urang ngak bruk karja thau hu sap ndom, haroh cih piah thau jang ka ilamu adat cambat tanarakum di mik va .

Tỉnh Ninh Thuận urak ni hu labaih  73.000 urang lac bhap bini Chăm daok rilo di dom  huyện Ninh Phước, Thuận Nam, Ninh Hải, Thuận Bắc song Bác Ái./.