Sang amuk Mang Thị Điền daok di xã Bắc Sơn, huyện Thuận Bắc biak bui sambai kayua bahrau hu jalan nding raok ia hacih mai tal sang. Dahlau deih piah hu ia pandar, sang muk song mik va dalam palei njauk nao naong ia di labik karei mai pandar, meng harei hu ia hacih pandar hu dong ka sang muk patak patom hu rilo tuk vak song pren yava. Amuk Điền brei thau: Labaih sa thun ni mai di palei Xóm Bằng pandiak bhang nan ye mikva biak kan kandah ka  bruk pandar ia, urak ni karja buh jien tame ngak nding ba ia mai palei paje, urak ni sang halei jeng hu ia, pandar yaok harei yau menei, rao papah, ngak mbang huak, pandar yaok harei lagaih jang dahlau deih biak rilo. 

Urak ni, di tỉnh Ninh Thuận hu labaih 20 jalan ia sre eng dui atah labaih 50 km, ba ia pandar ka labaih 40.000 urang bhum palei pala bhum biak kan kandah. Abih di nyu nan lac, anak bruk pandiak bhang dui atah meng puac thun 2014 mbaih tal ni ngak ka dom bhum palei pala dalam tỉnh kurang ia biak khang, Pasak ia hacih song vệ sinh môi trường palei pala Ninh Thuận brei pambuak dom nding raok ia veik… song padang ngak jalan ba ia di xã Phước Trung, huyện Bác Ái hu công suất 50m3 sa harei melam. Meng dom nding raok ia pambuak pagam veik ini, hu pabak ginup ia, nan ye bilan pandiak thun ni, di dom bhum palei najuk pandiak bhang, mikva hu ginup ia piah pandar. Saai  Huỳnh Đức Mân – Akaok Kapul khik ramik jalan ia Phước Trung, huyện Bác Ái brei thau:

Urak ni sang mac hu ba tame pandar tani tanat, anak tal kham merat ba ia tame tal yaok boh sang hu pandar ia tani tanat.

Langiu di jalan ia nduac eng, dalam tỉnh urak ni hu 40 labik ba ia praong kayua pasak ia hacih song Vệ sinh môi trường palei pala khik ramik, tong abih ia hu xử lý meng công nghệ bahrau tui jalan khép kín: hu halang meng danao halang hu rilo ngăn, keo palahik phèn song khử trùng meng Clo… bloh ka meng ba tame hệ thống ba ia mai tal sang. Meng hu yau nan, dom thun jiak di ni, dom jit ruak pagam tal jalan tung pruac song ruak lingiu klik di dom bhum palei pala hu patrun biak rilo, akaok sahaneng khik ramik vệ sinh môi trường di mik va hu tagok glong. Ong Bùi Văn Ðịnh- Phó akaok pasak ia hacih song Vệ sinh môi trường Ninh Thuận brei thau:

Anak tal brei pasang iek veik dom labik ka oh hu jalan nding mai tal sang, ye khol hulin pathau khan tal gah khik ramik jang yau UB bhap bini tỉnh piah likau jien peih prong di dom labik dok kurang ia pandar.

Tỉnh Ninh Thuận kham merat tal puac thun ni, bhap bini di palei pala, bhum ceik car hu pandar ia hacih saat labaih 86%, dalam nan lac pandar ia hacih tui tanut chuẩn di mintri Y tế lac 56% song hu tagok jang dalam dom thun anak tal./.