Bei plom lac phun pala praong di urang nông huyện Ninh Sơn, tỉnh Ninh Thuận. Dom thun jaik di ini, taneh pala phun bei dalam huyện gam gam patagok, min bhap bini takik đầu tư thâm canh ngak ka taneh thoái hóa, bạc màu. Dalam tuk nan, bruk pambuak gauk di urang nong pala bei saong doanh nghiệp piah padang bhum chuyên canh phun bei tui jalan thâm canh, pataom praong, tani tanat ka taneh pala oh ka hu peih ngak siam lagaih.

 Phun bei plom hu pala ralo di dua xã Quảng Sơn saong Hòa Sơn huyện Ninh Sơn ngan saong taneh jaik 2.600 ha. Kayua kurang pambuak gauk dalam bruk pala bei saong blei bei, nan ye yaom blei oh tani tanat. Dalam vụ bei thun 2017, janih bei meng 27 tal 28 chữ tapung hu yaom 1.300 đồng/kg, tui yaom ini urang pala bei khat labaih 5 triệu đồng/ha. Kayua yau nan ye, urang pala bei caong khin hu ký hợp đồng saong doanh nghiệp piah khik kajap yaom bei. Ong Phạm Thừa, urang nông xã Hòa Sơn, huyện Ninh Sơn brei thau:

“Hatai caong di mikva Hòa Sơn drei, lac hu tani tanat yaom kaom meng ngak mbang hu. Mikva biak caong hu pambuak bruk saong công ty sang mac bei”.

Công ty cổ phần Fococev lac đơn vị praong dalam bruk blei bei di urang nongg dua huyện Ninh Sơn saong  Bác Ái ngan saong abih tih taneh jaik 3.700 ha. Dalam bruk ngak mbang di drei,, công ty hu jalan pambuak bruk saong bhap bini piah daong pajaih, ilamu kỹ thuật saong vật tư ngak nông piah tani tanat bhum nguyên liệu. Min, bruk ký hợp đồng saong urang nông gaok ralo kan kandah bo makna kayua lac bhap bini oh hu drap ar đảm bản ka hợp đồng. Ong Hồ Đắc Tiên-Giám đốc Công ty cổ phần Fococev Ninh Thuận lac:

 “Oh lac oh khin đầu tư, đầu tư ye saai brei ba sổ đỏ ka dahlak, dahlak khik meng hu, daok tuk saai pala bloh, bloh đầu tư saoh bloh saai nao pathau thei, nan jeng lac sa bruk kan kandah di doanh nghiệp”.

Meng lavik mai bhap bini saong doanh nghiệp oh ka hu panuac ndom hong gauk dalam bruk pala pambuak saong pablei, kayua yau nan ye, barau ini, UB tỉnh Ninh Thuận hu tacei pato ka bruk liên kết sản xuất, doanh nghiệp brei mbaoh tangin tame pambuak bruk saong bhap bini, pala pambuak saong pablei hong chế biến sản phẩm.

Urak ini, huyện Ninh Sơn, tỉnh Ninh Thuận daok jhul khang bruk rami ramik veik sản xuất gah ngak nông tal thun 2020. Dalam nan, bei plom lac phun pala praong ngan saong taneh pala yaok thun tani tanat jaik 2.540 ha,  taphia di nan, jhul pakhang talei pambuak bruk saong doanh nghiệp dalam bruk ba ilamu kỹ thuật tame sản xuất, ba dom pajaih barau brei năng suất, lượng tinh bột glaong jang, mek hu sản lượng 27 tấn sa ha./.