Akok thun bac 2016 -2017, kayua langik pandiak bhang tua riya yau nan ye 2 hecta tangei di sang ong Pur Pur Nhiêu oh paih jaoh hu tangei. Jiak tal harei 2 urang anek tame thun bac birau, diuk pasang ong Nhiêu oh ka hu jien piah blei pandap bac megru, tapuk siphau, khan ao birau ka anek di drei piah nao bac.  Tuk hu dom gru pato di sang bac Tiểu học Phước Thành mai tal sang jak ba, pathau khan, langyah ka baoh sang ong hu dom sarak daong di Karja brei ka anek saih urang bangsa takik hu yua nan diuk pasang ong Nhiêu mboh sahanang hatai, kham merat brei ka anek bik nao sang:

“Thun ini, mboh dom anai gru, cei gru pathau khan jak ba, dahlak oh uai ka anek padeih bac”

Dahlau tuk tame thun bac birau, dom sang bac dalam huyện bhum ceik Bac Ai brei da-a amaik ame mai mai ginum biai  ka thun bac birau. Sang bac hu caong khin dom amaik ame pambuak bruk saong sang bac piah pachreih tui bruk taong abih bhap bini ba uranaih nao bac. Rilo sang bac daok da-a amaik ame anek saih bangsa Raglai mai maong iek tal bac, taom gaok dom gru akok tal bac piah brei thau dom hatai sahaneng, caong khin jeng yau dom panuac pato padar piah ngak habar jak ba  hu taong abih anek saih  tame thun bac birau. Sa-ai Chamale Tuynh daok di xa Phước Thành huyen Bac Ai, tinh Ninh Thuan brei thau:

 “ Tapa var ginum biai, ye khol dahlak hu thau dom sarak Karja hu daong ka dom anek saih drei. Dahlak sanya brei ka anek bik nao bac abih gauk. Yaom lac kan kandah yau halei brei kham merat raong ba anek mbang bac tal labik tal dhua”

Thun bac birau 2016 -2017, gah patao megru huyện bhum ceik Bac Ai hu jao brei chi tiêu jak ba 6. 844 anek saih di klau pakat tame bac. Caga ka thun bac birau dalam tuk kan kandah, kurang sap janih kayua langik pandiak bhang dui atah, yaok baoh sang hu jalan sap pagap sangka brei ka anek bik nao bac, oh caik ak anek kurang bac da-a. Ong Pham Xuân Lan, Pho akaok Jabat Pato megru huyen Bac Ai khan lac:

          “Meng blaoh khol dahlak hu khan tagok huyen brei pasang iek veik, dom bruk oh ka ngak hu ye bruk pathau tagok pakat angaok piah ngak brei ginup ka dom adei. Dom sarak halei hu brei blaoh njauk brei ngak tui ginup. Piah ngak habar  njauk tui sarak ka dom adei”

Bruk sangka di dom anai gru, cei gru bruk pambuak khang kajap di sang bac saong karja palei dalam bruk jhul pakhang bruk pathau klhan ngak salih jalan sahaneng di dom urang maik ame anek saih bangsa takik di tỉnh Ninh Thuận dalam bruk bac megru  di anek bik. Hu yau nan daong mikva hu thau ba dom anke kamuan tame thun bac birau./.