Ninh Thuan paglaong bruk pato bruk ngak ka bhapbini bangsa takik

Pathau mikva saong grauk yut ! Huyện Ninh Sơn, tỉnh Ninh Thuận lac puk palei hu rilo bhapbini bangsa Raglai saong Kờ Ho diukrai. Piah paglaong kein laba bruk ngak nong ka mikva, karja puk palei saong dom gah chuc nang hu jhul pakhang bruk pato bruk ngak katut tukvak, meng dom bruk ngak mbang pala drak lagaih haong bruk di puk palei. Anak meta mboh lac, tuk  hu pabak alamu pala drak, raong glang, bhapbini pak ini khang hatai pandar dom alamu ky thuat barau piah yam tapa kan kandah, yam tagok patruh kathaot. Urang pambuak bruk Văn Cảnh - Quốc Hưng brei thau ka bruk ini,  :

Meng labaih 80% menuac sia ngak nong, urang nong huyện Ninh Sơn thau hu yaom glaong di bruk ba alamu ky thuat tame pandar dalam gah pala drak saong raong glaong piah paglaong nang suat saong kein laba kinh te. Hu mbaok tame tal bac ilamu pala tangei hu dua bilan, saai Châm Sen, urang bangsa Raglai daok di xã Mỹ Sơn, huyện Ninh Sơn thau hu rilo ilamu ka pala drak, gam pandar tame bruk ngak di sang gam tacei pato ka mikva puk paga. Ba dom bruk bac megru hu tame bruk ngak, saai Sen buh jien padai, pren yava tame pala 6 sào tangei pajaih NK- 7328, ngak tui tacei pato di urang jakar pachreih nong, taphia nan, caoh bingun khik piah ia ka tangei. Nan ye, yaom lac takik hajan, 6 sào tangei di sang saai jeng tamuh siam, hu nang suat glaong. Saai Châm Sen ndom lac : Tan pasram biak siam lagaih ka dahlak saong ka bhapbini. Tui gru Hòa tacei pato ilamu pala, phun atah di gauk hadom, buh khak tui jalan ba tabiak ngak di apuh drei, mboh phun tangei tamuh siam ngak ka drei biak chreih chrai.

Labaih sa thun ini mai, Jabat Lao động - Thương binh saong Xã hội huyện Ninh Sơn peih hu 30 tal pato bruk ngak katut harei ka jaik 1.000 mbang urang bac ilamu raong palimek limo, pala bimao, raong menuk ta palao dalam bein, pala panat, padai, tangei… Dom tan bac ngak nong hu daong ka bhapbini khang hatai pandar ky thuat, paglaong kein laba, rik daong patrun kathaot di puk palei. Abih di nyu nan lac, dalam tuk thu lagu, mikva thau salih meng padai tapa pala dom janih phun lagaih jang yau ye : bei, tangei cao sản. Ông Trần Thế Quang, akaok jabat Lao động- Thương binh saong Xã hội  huyện Ninh Sơn, tỉnh Ninh Thuận brei thau  : Hadei di tuk bac bloh, mikva thau ngak tui, mikva raong palimek limo pablei tabiak darah pasal mek jien tame glaong jang duk saong dahlau deih tuk oh ka hu bac bruk. Tui kuhria, bilan 9 ini kol dahlak peih 4 tan tra ka bhapbini bangsa piah mikva thau ilamu patruh eik patrun kathaot.

  Bruk pala drak di huyện Ninh Sơn urak ini jeng daok kan kandah kayua kurang ia. Jabat Lao động- Thương binh saong Xã hội huyện daok peih dom tan pato bruk katut harei, tacei pato mikva urang nong salih phun pala, kaya raong, oh caik rah tabiak bruk eik lipa tuk cang bilan yuak, paik. Dom taneh jhak, gah ngak nong huyen tacei pato mikva salih tapa pala hareik piah raong limo. Abih di nyu nan lac, puk palei daok pato ka mikva bruk ngak thủ công mengkan saong dom bruk lingiu bruk ngak nong piah mikva hu jien mek tame. Ông Trần Văn Hòa, urang jakar pasak pachreih nong – pachreih ngư huyện Ninh Sơn, tỉnh Ninh Thuận brei thau : Tapa tan pato bruk ka urang ngak palei pala, abih di nyu nan lac bhapbini bangsa, akaok mereip pato urang jeng oh ka thau hu bac bruk yau habal. Min tuk bac hu dua adit bloh, mikva mboh biak siam. Ka sa lac danakdak pato katut saong kein laba, bac meng bruk ngak di anak meta. Tuk nan, mikva thau lac ilamu  buh khak biak siam, pacang caga hu halak halin, meng di nan mikva biak tari tarieng, nao bac njauk tukvak.

          Meng dom siam lagaih ba mai ka mikva, tỉnh Ninh Thuận daok jhul pakhang bruk pato bruk ngak dalam dom bhum palei pala barau. Dom bruk ngak mbang hu kein laba ye : pala bimao, pala tangei, ngak pandap thủ công mây- tre đan… daok hu dom puk palei tacei pato ka mikva urang nong. Tỉnh jeng thau lac bruk pato bruk ngak lac sa dalam dom bruk praong, daong ka bhap bini, abih di nyu nan lac bhapbini bangsa takik tabiak truh kathaot saong patagok khang kajap pak di bhum taneh palei negar drei./.