Pruh aia patak pataom ka phun rabung hijao 

Nao tal dom puk palei di tỉnh Ninh Thuận, khaol dahlak mong mboh kein laba meng bruk pandar ilamu tame bruk ngak nong. Di xã Tân Hải, huyện Ninh Hải hu bruk  ngak ka tapak mbaok mblang hamu meng thiết bị laser; xã An Hải, huyện Ninh Phước pandar công nghệ ngak nong hữu cơ di mblang bein Tiên Tiến. Daok huyện Ninh Sơn hu bruk pala lan tui jalan raong pagam mô.

Ong Đặng Kim Cương, Akaok Sở ngak nong saong patagok palei pala tỉnh Ninh Thuận brei thau, tỉnh daok peih ngak 11 dự án ngak nong công nghệ glaong tapa dom bruk ngak saong ba mai kein laba mboh di anak meta. Jalan pruh aia patak pataom daong patagok mblang taneh pruh aia meng 1.437 ha di thun 2018 tagok 1.911 ha dalam thun ini. Bruk pandar kadung halam pacang anek ruai kanjik katam palai kaik labaih 140 ha meda daong pacang plaih dom ruak bhian mboh, trun 30% jien buh tame ngak, plaih jru pacang khik phun pala daok labaih kandaong, ngak brei pandap panda hu siam, patagok jien mek tame rilo jang jaik 2 mbang dut haong oh pandar kadung halam pacang dahlau diah.

Yau nan min, dalam 5 thun tapa, bruk salih janaih phun pala di  Ninh Thuận daok biar, dui pachreih urang buh jien tame bruk ngak nong daok kan kandah, abih di nyu dalam bruk pala drak saong dịch vụ ngak nong. Makna lac kayua bruk biến đổi khí hậu biak khang, tua riya pandiak bhang dui atah, jit ruak rah tabiak rilo, bruk patak pataom jien ndo dalam urang nong biak biar nan ye oh ginup pren khang piah salih khang kajap tapa phun lavik thun. Daok hu dom urang nong daok pagam pambak tame bruk daong di Karja nan ye oh kham merat paglaong kein laba dalam bruk ngak mbang pala drak.

Dalam vaktu 2020-2025, piah cakrok patagok bruk ngak nong, palei pala khang kajap, tỉnh Ninh Thuận jhul samar bruk pandar dom jak jeng di ilamu công nghệ pambuak pagam haong pato bruk ngak ka urang nong dalam bruk pala drak, ngak pandap, khik piah kaya nong saong bruk ngak du lịch; cakrol patagok dom janih pandap panda di tỉnh ngan haong dom labik pambuak gauk ngak tabiak pandap panda tui chuỗi giá trị pagam haong danak dak “Yaok xã sa janih pandap” saong nao rivang iek piah thau.  

Piah patagok bruk pablei pandap saong dak harei dak peih prong darak pasa pablei tabiak negar langiu, Ninh Thuận kham merat hu takik abih 50% mblang taneh pala drak di dom bhum pala praong hu mbaok tame dom bruk pambuak gauk pala drak gam haong padang angan je; dalam tỉnh hu labaih 10 hợp tác xã pandar ilamu công nghệ glaong dalam gah ngak nong; jaik 30% HTX ngak nong pambuak pagam haong DN tui chuỗi giá trị./.

Urang lang: Jasi-20/7